তিনিচুকীয়া, ১৪ ফেব্ৰুৱাৰী: বুধবাৰে তিনিচুকীয়াত দুটাকৈ সংঘটিত হয় বিধ্বংসী অগ্নিকাণ্ড ৷ প্ৰথমটো অগ্নিকাণ্ড দিনৰ ভাগতেই তিনিচুকীয়াৰ বৰদলৈ নগৰত সংঘটিত হয় । লোকপ্ৰিয় গোপীনাথ বৰদলৈ খেলপথাৰৰ সমীপৰৰ এটা বাসগৃহৰ ভাড়াঘৰত অগ্নিকাণ্ডটো সংঘটিত হয় । অগ্নিকাণ্ডৰ ফলত দুটাকৈ ভাড়াঘৰ সম্পূৰ্ণৰূপে জুইত ভস্মীভূত হয় ।
উক্ত ভাড়াঘৰৰ গৃহস্থ পুৱা ভাগতেই নিজ কৰ্মৰ বাবে গন্তব্যস্থানলৈ যায় আৰু তাৰ পিছতেই ৰন্ধন গেছৰ চিলিণ্ডাৰ বিষ্ফোৰণ ঘটে ঘৰটোত । স্থানীয় লোকে জুই প্ৰত্যক্ষ কৰাৰ পিছত ততাতৈয়াকৈ অগ্নিনিৰ্বাপক বাহিনীক খবৰ দিয়ে ৷ কিন্তু অগ্নিনিৰ্বাপকক বাহিনীৰ গাড়ী সময়মতে উপস্থিত নোহোৱাত স্থানীয় লোকসকলে নিজা প্ৰচেষ্টাৰে অগ্নিনিৰ্বাপিত কৰিবলৈ সক্ষম হয় ৷ অৱশ্যে জুইত সম্পূৰ্ণৰূপে জাহ যায় যাৱতীয় নথি-পত্ৰ আৰু বহু লক্ষাধিক টকাৰ সা-সম্পত্তি । স্থানীয় লোকসকলে অগ্নি নিৰ্বাপিত কৰাৰ বহু সময়ৰ পিছতহে অগ্নিনিৰ্বাপকক বাহিনী ঘটনাস্থলীত উপস্থিত হয় ।
আনহাতে, পুনৰ নিশা প্ৰায় ৮ বজাত তিনিচুকীয়াৰ তিনিকোণীয়া IOC ৰে’ল গেটৰ সমীপৰ বাসগৃহত সংঘটিত হয় দ্বিতীয়টো বিধ্বংসী অগ্নিকাণ্ড । অগ্নিকাণ্ডটো ইমানেই বিধ্বংসী যে ক্ষন্তেকতেই জুই বিয়পি পৰিছে একাধিক বাসগৃহলৈ ৷ পৰৱৰ্তী সময়ত অগ্নিকাণ্ড সংঘটিত হোৱাৰ স্থানত ততাতৈয়াকৈ তিনিচুকীয়াৰ অগ্নিনিৰ্বাপক বাহিনীৰ কেইবাখনো গাড়ী উপস্থিত হৈ ঘণ্টাজোৰা চেষ্টা চলোৱাৰ পাছত অগ্নিনিৰ্বাপন কৰিবলৈ সক্ষম হয় ৷