গুৱাহাটী,২৯ জুন:অত্যাৱশ্যকীয় সামগ্ৰীৰ ব্যাপক মূল্যবৃদ্ধিয়ে জনসাধাৰণক কোঙা কৰি তোলাৰ সময়তেই চৰকাৰৰ দ্বাৰা পুনৰবাৰ আৰোপিত বৰ্দ্ধিত বিদ্যুৎ মাচুলে ৰাইজৰ মূৰত আন এক মাধমাৰ সোধাইছে । সেয়েহে ইয়াৰ বিৰুদ্ধে শনিবাৰে অসম তৃণমূল কংগ্ৰেছ দলে বিদ্যুতৰ মাচুলৰ অস্বাভাৱিক বৃদ্ধি আৰু মোবাইল ৰিচাৰ্জ প্লেনৰ দাম বৃদ্ধিৰ বিৰুদ্ধে এক বৃহৎ প্ৰতিবাদী কাৰ্যসূচী ৰূপায়ণ কৰে । দলৰ সভাপতি ৰিপুণ বৰাৰ সৈতে প্ৰায় শতাধিক দলীয় কৰ্মীয়ে বিদ্যুতৰ মাচুল হ্ৰাস কৰাৰ দাবী তথা শাসকীয় বিজেপি চৰকাৰ আৰু মুখ্যমন্ত্ৰী ড৹ হিমন্ত বিশ্ব শৰ্মা মুৰ্দাবাদ ধ্বনিৰে ৰাজপথ উত্তাল কৰি তোলে ।
এই সন্দৰ্ভত দলৰ সভাপতি ৰিপুণ বৰাই সংবাদ মাধ্যমক সম্বোধন কৰি কয়, "এই চৰকাৰখনে ব্যাপক কৰ বৃদ্ধি আৰু বিভিন্ন সামগ্ৰীৰ মূল্য বৃদ্ধিৰে জনসাধাৰণক কেঁকোৰা চেপা দি আহিছে । দেশৰ বিকাশ তথা প্ৰগতিৰ কথা কোৱা এই চৰকাৰখনে প্ৰতি মূহুৰ্ততে সাধাৰণ জনতাক কেৱল কৰ সংগ্ৰহৰ আহিলাৰূপে ব্যৱহাৰ কৰিছে । এয়া সম্পূৰ্ণৰূপে জনবিৰোধী কাৰ্যপন্থা । স্বৈৰাচাৰী বিজেপিয়ে নিৰ্বাচনী লাভালাভৰ অংকত নিৰ্বাচনৰ সময়ত বিভিন্ন উৎসৰ পৰা ধন সংগ্ৰহ কৰাৰ ফলত এতিয়া সেই ঋণ পৰিশোধৰ বাবেই বিভিন্ন সামগ্ৰীত অভাৱনীয়ভাৱে কৰ বৃদ্ধি কৰিব বিচাৰিছে । এয়া সম্পূৰ্ণৰূপে জনবিৰোধী আৰু আমি ইয়াৰ তীব্ৰ বিৰোধিতা কৰিছো ।"
উল্লেখ্যযোগ্য যে, উক্ত প্ৰতিবাদী কাৰ্যসূচীৰ পিচতেই জয়ানগৰস্থিত অসম তৃণমূল কংগ্ৰেছৰ মুখ্য কাৰ্যালয়ত এক বৰ্ধিত কাৰ্যনিৰ্বাহক সভাও অনুষ্ঠিত কৰা হয় । উক্ত কাৰ্যনিৰ্বাহক সভাত বিগত লোকসভা নিৰ্বাচনত অসম তৃণমূল কংগ্ৰেছ দলৰ ফলাফলৰ পৰ্য্যালোচনা আৰু সাংগঠনিক বিষয় সন্দৰ্ভত এক গুৰুত্বপূৰ্ণ আলোচনা কৰা হয় ।