গুৱাহাটী, ১৩ ছেপ্টেম্বৰ :ৰাজ্যত এতিয়াও অব্যাহত আছে বিশাল ফুকন, চুমী বৰা আৰু তাৰ্কিক বৰাৰ প্ৰসংগ । দীৰ্ঘদিনৰ অপেক্ষাৰ অন্ত পেলাই পলাতক হৈ থকা চুমী বৰা আৰু তাৰ্কিক বৰাক বৃহস্পতিবাৰে পুৱা প্ৰায় ৫.৩০ মান বজাত আৰক্ষীয়ে আটক কৰিছিল । তাৰ পিছত ডিব্ৰুগড়ৰ বিলাসী জিমখানা ক্লাবলৈ লৈ গৈছিল চুমী আৰু তাৰ্কিকক ।
আৰক্ষীয়ে চুমী বৰা আৰু তাৰ্কিক বৰাক আটক কৰি থানালৈ নিনি কিয় বিলাসী জিমখানা ক্লাবলৈ লৈ গৈছিল ? আনকি একাংশই উত্থাপন কৰিছিল যে চুমী বৰা আৰু তাৰ্কিক বৰাক ৰাজআতিথ্য দিয়া হৈছে । এই সমগ্ৰ বিষয়ৰ ওপৰত শুকুৰবাৰে পুনৰ মুখ্যমন্ত্ৰী ড৹ হিমন্ত বিশ্ব শৰ্মাই মন্তব্য আগবঢ়ায় ।
মুখ্যমন্ত্ৰীগৰাকীয়ে কয়, ‘‘চুমী-তাৰ্কিকক গ্ৰেপ্তাৰ কৰি থানালৈ আনিব লাগিছিল, কিন্তু ডিব্ৰুগড়ৰ জিমখানা ক্লাবলৈ নিয়াটো যুক্তিসংগত হোৱা নাই ৷ বিষয়টোক লৈ মই DGPৰ লগত কথা পাতিছো ৷ ঘটনাৰ তদন্তৰ নিৰ্দেশ দিছো কেনেকৈ থানালৈ লৈ নগৈ জিমখানা ক্লাবলৈ নিয়া হ’ল । জিমখানা ক্লাবলৈ নি এটা চেনেলক সাক্ষাৎকাৰ ল’বলৈ দিয়া হৈছে ৷ সেয়েহে আৰক্ষী আৰু সাংবাদিকৰ মাজৰ সম্পৰ্কটো চিন্তনীয় হৈছে । অপৰাধীক থানালৈ নিয়াৰ সলনি জিমখানা ক্লাবলৈ নিয়া হৈছে । ময়ো কালি টিভিত চাই আছিলো । তাৰ পিছতে মই DGPলৈ ফোন কৰি হুলস্থূল লগাইছো । আটক হোৱা মানু্হ থাকিব লাগে থানাত, আছে টিভিত ওলায় । কেবিনেটত ইয়াৰ বিৰুদ্ধে সাহসী সিদ্ধান্ত লোৱা হ’ব ।’’
ইফালে চুমী বৰা আৰু তাৰ্কিক বৰাক ইউটিউবৰ যোগেদি প্ৰমোশ্যন কৰা ইউটিউবাৰসকলকো সাঙুৰি কয়, ‘‘যিসকলে এওঁলোকক প্ৰমোশ্যন কৰি আছিল তেওঁলোকে লোকসভা নিৰ্বাচনত মোক গালি পাৰি আছিল । এতিয়া এওঁলোকৰ বিৰুদ্ধে ব্যৱস্থা গ্ৰহণ কৰিলে পুনৰ মোক আপোনালোকে ধৰিব ।’’