গুৱাহাটী, 24 মে’ : মে’ মাহৰ মাজভাগৰ পৰা উৎকট গৰমে দহিছে ৰাজ্য ৷ দৈনিক উৰ্ধমুখী হৈছে পাৰাস্তম্ভ ৷ বাহিৰত যেন এতিয়া ৰ’দ নহয়, জুইহে বৰষিছে ! শুকুৰবাৰে পুৱাৰ ভাগৰে পৰা প্ৰখৰ ৰ'দ তথা উৎকট গৰমে দহিছে ৰাজ্য ৷ মহানগৰীৰ পাৰাস্তম্ভ 38 ডিগ্ৰীৰ পৰা পালেগৈ 40 ডিগ্ৰী চেলছিয়াচ ৷ গৰমৰ পৰা পৰিত্ৰাণ পাবলৈ এতিয়া বহুজনে আশ্ৰয় লৈছে গছৰ তল, শীতল পানীয়, ফলৰ ৰসৰ ৷ শীতল পানীয়ৰ দোকানী সকলৰ কাষত বহুজনে ভিৰ কৰিছে যদিও ব্যৱসায়ীসকলৰ মতে আজিৰ দিনটোত পূৰ্বৰ তুলনাতকৈ সেৰেঙা গ্ৰাহক ৷
ইফালে গৰমৰ পৰা পৰিত্ৰাণ পাবলৈ গা জুৰ পেলাবলৈ কৰোবাৰ হাতত যদি ডাব নাৰিকল, কোনোবাই আকৌ খাইছে নেমু পানী, কুঁহিয়াৰৰ ৰস ৷ গৰমৰ প্ৰকোপৰ বাবে এতিয়া বিপৰ্যস্ত হোৱাৰ উপক্ৰম হৈছে মহানগৰীৰ স্বাভাৱিক জীৱনযাত্ৰাও ৷ গাড়ী মটৰ, যানবাহনতো যাত্ৰীৰ ভিৰ সেৰেঙা ৷ গৰমৰ প্ৰকোপ তথা প্ৰখৰ ৰ'দৰ বাবে এতিয়া ঘৰৰ পৰা ওলাবলৈ বহুবাৰ চিন্তা কৰিবলগীয়া হৈছে ৰাইজে ৷ গৰমৰ এই মাত্ৰা যদিহে অব্যাহত থাকে তেন্তে স্বাভাৱিক জীৱনযাত্ৰাত প্ৰভাৱ পৰাটো এতিয়া নিশ্চিত হৈ পৰিছে ৷