গুৱাহাটী, ১৮ অক্টোবৰ: ৰাজ্য চৰকাৰৰ শিক্ষা বিভাগে চৰকাৰী মাধ্যমৰ বিদ্যালয়ৰ শিক্ষকসমাজক অতিৰিক্ত চৰকাৰী কামৰ বোজা জাপি দিয়াৰ বিৰুদ্ধে সৰৱ হৈছে সদৌ অসম সন্মিলিত শিক্ষক মঞ্চ । শৈক্ষিক দিনপঞ্জীত সন্নিৱিষ্ট নথকা তথা অতিৰিক্তভাৱে জাপি দিয়া নিৰ্দেশনা পালন নকৰাৰ বাবে সিদ্ধান্ত গ্ৰহণ কৰিছে শিক্ষক মঞ্চই । লগতে শিক্ষকসকলক অতিৰিক্ত কামৰ নিৰ্দেশ দিয়াৰ বাবে ব্যৱস্থা কৰা শিক্ষা বিভাগৰ ভিন্ন পৰ্যায়ৰ বিষয়া কৰ্মচাৰী আৰু সমল কেন্দ্ৰ সমন্বয়কসকলৰ হোৱাটছ এপ গ্রুপ বৰ্জন কৰাৰো সিদ্ধান্ত গ্ৰহণ কৰিছে শিক্ষক মঞ্চই ।
এই সন্দৰ্ভত প্ৰতিক্ৰিয়া প্ৰকাশ কৰি সদৌ অসম সন্মিলিত শিক্ষক মঞ্চৰ প্ৰচাৰ সম্পাদক তথা অসম ৰাজ্যিক প্ৰাথমিক শিক্ষক সম্মিলনৰ প্ৰধান সম্পাদক ৰাতুল চন্দ্ৰ গোস্বামীয়ে কয়, ‘‘ৰাজ্যৰ সকলো স্তৰৰ শিক্ষকে ১৮ অক্টোবৰৰ দিনা পুৱা ৯ বজাৰ পৰা ১ বজাৰ ভিতৰত শিক্ষা বিষয়া, সমল কেন্দ্ৰ সমন্বয়ক আদিয়ে খোলা সকলো হোৱাটছ এপ গ্রুপৰ পৰা ওলাই অহাৰ লগতে এক নৱেম্বৰৰ পৰা শৈক্ষিক দিনপঞ্জীত সন্নিৱিষ্ট নথকাকৈ জাপি দিয়া নিৰ্দেশনা পালন নকৰাৰ সিদ্ধান্ত গ্ৰহণ কৰিছে ।’’
‘‘পূজা বন্ধ চলি থকা সময়তে ৰাজ্যৰ সকলো জিলাতে পেট (periodic assessment test) আৰু নাছ ( National achievement survey) আদিৰ দৰে কাৰ্যসূচী ৰূপায়ন কৰিবলৈ নিৰ্দেশনা প্ৰকাশ কৰিছে । অভ্যাসন-মূল্যায়নৰ বহী যোগান নিদিয়া বিভাগটোৱে, পুনৰাই প্ৰশ্ন আদিৰ যোগান নিদিয়াকৈ কেৱল হোৱাটচ এপ গ্রুপে গ্রুপে মেছেজ আগবঢ়াই নি পেট, নাছৰ পৰীক্ষা সমাপন কৰাৰ কৌশল কৰিছে । এনেদৰে বিগত দিন সমূহতো ৰাজ্যৰ শিক্ষক সমাজে অতিৰিক্ত দায়িত্বৰ ভৰত বিৰ দি বাট নোপোৱা হৈছে । একেদৰে শিক্ষাৰ্থীসকলো গিনিপিগত পৰিণত হৈছে । পাঠ্যক্ৰমৰ পাঠদান ধোঁৱা চাঙত উঠিছে, শৈক্ষিক দিনপঞ্জীখনকো সমগ্র শিক্ষাই অর্থহীন কৰি তুলিছে,’’ তেওঁ লগতে কয় ৷