জীৱন যুঁজত ধুঁৱলী-কুঁৱলী দেখিছে বিশেষভাৱে সক্ষম ভাতৃ-ভগ্নীয়ে

বিশেষভাৱে সক্ষম দুই ভাতৃ-ভগ্নীৰ কৰুণ জীৱন কাহিনী শুনিলে চকুলো ওলাব আপোনাৰ । পিতৃ-মাতৃক হেৰুৱাই অনাথ হৈ পৰিছে বিশেষভাৱে সক্ষম খোৱাঙৰ দুই ভাতৃ-ভগ্নী ।

মৰাণ:ব্যস্ততাৰ পৃথিৱীত জীৱন এক সংগ্ৰাম । কোনোবাই ত্যাগ কৰে, কোনোবাই গ্ৰহণ কৰে । ইয়াৰ মাজতেই পোৱা-নোপোৱাৰ হিচাপ চলে জীৱনৰ । সংগ্ৰামৰ পৃথিৱীত বহুতে জীৱনক লৈ সুখী বুলি দাবী কৰিলেও কিছু সংখ্যকে সুখৰ অনুভূতিৰ পৰা আঁতৰি জীয়াই থকাৰ বাবে চিন্তা কৰিব লগা হয় । ইয়াৰ মাজতে ডিব্ৰুগড় জিলাৰ টিংখাং বিধানসভা সমষ্টিৰ অন্তৰ্গত খোৱাঙৰ বিশেষভাৱে সক্ষম দুই ভাতৃ-ভগ্নীৰ জীৱন কাহিনী শুনিলে আপোনাৰো দুচকু সেমেকি উঠিব ।

খোৱাঙৰ আজাৰগুৰিৰ নিমি শইকীয়া আৰু পলু শইকীয়া দুয়ো ভাতৃ-ভগ্নী জন্মৰে পৰা বিশেষভাৱে সক্ষম । পিতৃ প্ৰয়াত জীৱন শইকীয়া আৰু মাতৃ প্ৰয়াত জুনা ৰাণী শইকীয়াৰ দুই সন্তান নিমি আৰু পলু । পিতৃ জীৱন শইকীয়া আজিৰ পৰা ১৫ বছৰ আগতে এই পৃথিৱীৰ পৰা ইহলীলা সম্বৰণ কৰিছে । মাতৃ জুনা ৰাণী শইকীয়াই অনেক কষ্টৰে দুই বিশেষভাৱে সক্ষম পুত্ৰ আৰু জীক ডাঙৰ দীঘল কৰিছিল ।

দুয়োকে উচ্চতৰ মাধ্যমিক উত্তীৰ্ণও কৰালে মাতৃয়ে । কিন্তু ভগৱানৰ কি লীলা ? তিনিটা দিনৰ আগতে মাতৃৰো উচ্চ ৰক্তচাপজনিত কাৰণত মৃত্যু হয় । তিনি দিনৰ ধৰ্মীয় কাজ ৰাইজেই কৰি দিলে । দহা-কাজো ৰাইজেই কৰি দিয়াৰ সিদ্ধান্ত লৈছে । অৱশ্যে ইয়াৰ পিছত ঘৰখনত দুই বিশেষ ভাৱে সক্ষম ল'ৰা-ছোৱালীহালে কেনেদৰে জীৱন নিৰ্বাহ কৰিব তাক লৈহে চিন্তিত হৈ পৰিছে সকলো ।

কাৰণ নিজে একোৱেই কৰিব তেওঁলোকে। নিজে খোজকাঢ়িব নোৱাৰে, তেওঁলোক আন কাম কৰাৰ কথা ভাবিবও নোৱাৰে । পৰিয়ালটোৰ আপোন বুলিবলৈ কোনো নাই । সেয়ে স্থানীয় ৰাইজে দুয়োটি সন্তানৰ ভিতৰত কোনোবা এজনক চৰকাৰীভাৱে সংস্থাপন দিবলৈ মুখ্যমন্ত্ৰী ড৹ হিমন্ত বিশ্ব শৰ্মা আৰু মন্ত্ৰী বিমল বড়াক আহ্বান জনায় । বিশেষভাৱে সক্ষম দুই ভাতৃ-ভগ্নীক লৈ বিপাঙত পৰিছে ওচৰ- চুবুৰীয়া ।

মাতৃৰ মৃত্যুৰ বাবে ওচৰ চুবুৰীয়া কিছুৱে ঘৰখনলৈ আহি খবৰ লৈছে তেওঁলোকৰ । কিন্তু দিন পাৰ হৈ যোৱাৰ পাছতেই সকলো নিজক লৈ ব্যস্ত হ'ব, তেতিযা কি কৰিব বিশেষ ভাৱে সক্ষম দুই ভাতৃ-ভগ্নীয়ে ? যদি চৰকাৰে কিবা এটা সহায় নকৰে বন্ধ কোঠাৰ ভিতৰতে মৃত্যুৰ ক্ষণ গণিব লাগিব বিশেষভাৱে সক্ষম দুই ভাতৃ-ভগ্নীয়ে ।

লগতে পঢ়ক:সুধাকণ্ঠৰ সান্নিধ্য় লাভ কৰা দিব্য়াংগ শিল্পীৰ জীৱন সংগ্ৰামৰ জীয়া কাহিনী - Struggle of Life