গুৱাহাটী: মহানগৰীত সংঘটিত হৈছে এক চাঞ্চলকৰ ঘটনা । ফটাশিল আমবাৰী থানাৰ অন্তৰ্গত জ্যোতিকুছিৰ এটা বন্ধ কোঠাত উদ্ধাৰ হৈছে এটা নৰকংকাল । উদ্ধাৰ হোৱা কংকালটো পূৰ্ণিমা দে’ নামৰ এগৰাকী মহিলাৰ বুলি জানিব পৰা গৈছে ।
জানিব পৰা মতে, জ্যোতিকুছিৰ ধপলিয়াত পুত্ৰৰ সৈতে বাস কৰিছিল পূৰ্ণিমা দে’ নামৰ মহিলাগৰাকীয়ে । কিন্তু ওচৰ-চুবুৰীয়াই সদৰী কৰা অনুসৰি বিগত প্ৰায় চাৰি মাহে মহিলাগৰাকীক প্ৰত্যক্ষ কৰা নাছিল তেওঁলোকে । পুত্ৰ জয়দ্বীপ দে’ক চুবুৰীয়াই সুধিলে মাতৃ ভালে থকা বুলি জানিবলৈ দিছিল । আনকি হাবি-জংঘলেৰে আৱৰি থকা চৌহদটোত কোনোৱে সোমাব বিচাৰিলেও পুত্ৰ জয়দীপে কাকোৱেই সোমাব নিদিছিল । জয়দ্বীপ মানসিকভাৱে বিকাৰগ্ৰস্ত বুলিও জানিবলৈ দিছে চুবুৰীয়াই ৷
দেওবাৰে চুবুৰীয়াই পূৰ্ণিমা দে’ৰ খবৰ লোৱাৰ উদ্দেশ্যে ঘৰটোত বলপূৰ্বকভাৱে সোমাব বিচাৰত পুত্ৰই বাধা দিয়ে । ইয়াৰ পাছতে ওচৰ-চুবুৰীয়াই সমগ্ৰ ঘটনা সন্দৰ্ভত স্থানীয় ফটাশিল আৰক্ষীক অৱগত কৰে । ঘটনাৰ খবৰ পাই আৰক্ষী উপস্থিত হোৱাৰ পাছত কোঠাটোত প্ৰবেশ কৰি নৰকংকালটো প্ৰত্যক্ষ কৰে । লগে লগে সমগ্ৰ ঘটনাক লৈ সৃষ্টি হয় তীব্ৰ চাঞ্চল্যৰ ।