লখিমপুৰ,২০ জুন: এইবাৰ জাহাংগীৰৰ ছিন্ন মুণ্ডৰ সন্ধানত আৰক্ষী । সুনীল গগৈৰ বাসগৃহৰ চৌহদৰ দুটাকৈ পুখুৰীত চলিছে অভিযান । ক্ৰমে ৰহস্যঘন হৈ পৰা লখিমপুৰৰ ঢকুৱাখনা সাপতীয়া চেতিয়া গাঁৱৰ হত্যাকাণ্ডৰ ৰহস্য ভেদ কৰিবলৈ আৰক্ষীয়ে নিৰন্তৰ প্ৰচেষ্টা অব্যাহত ৰাখিছে । প্রথম অৱস্থাত সুনীল গগৈক হত্যা কৰা বুলি আৰক্ষীয়ে সুনীলৰ ছিন্নমুণ্ডৰ সন্ধানত অভিযান চলাইছিল ।
পৰৱৰ্তী সময়ত ঘটনাই অন্য মোৰ লোৱাত এতিয়া আৰক্ষীয়ে জাহাংগীৰৰ ছিন্নমুণ্ডৰ সন্ধানত অভিযান চলাইছে । ঘটনা সংঘটিত হোৱাৰ পাচতে ঘটনাস্থলীৰ সমীপতে থকা এটা পুখুৰীৰ পানী সিঁচি আৰক্ষীয়ে সুনীলৰ ছিন্নমুণ্ডৰ সন্ধান কৰিছিল । পিছে ডি এন এ পৰীক্ষাৰ ফলাফলত মৃতদেহটো জাহাংগীৰৰ বুলি প্ৰমাণ হোৱাত আৰক্ষীয়ে জাহাংগীৰৰ ছিন্নমুণ্ডৰ সন্ধানত অভিযান অব্যাহত ৰাখে । বৃহস্পতিবাৰে আৰক্ষীয়ে এছ ডি আৰ এফৰ সহযোগত সুনীল গগৈৰ ঘৰৰ চৌহদত থকা দুটাকৈ পুখুৰীত জাহাংগীৰৰ ছিন্নমুণ্ডৰ সন্ধানত অভিযান চলায় ।
এছ ডি আৰ এফৰ সহযোগত পুৱাৰ ভাগত এটা পুখুৰীৰ পানী সিঁচি অন্ত কৰি ছিন্নমুণ্ডৰ সন্ধান কৰে যদিও সফল নহয় অভিযানকাৰী দলটো । বিয়লি পুনৰ আনটো পুখুৰীত আৰক্ষীয়ে অভিযান আৰম্ভ কৰে । আনহাতে বুধবাৰে ঢকুৱাখনা থানাত সন্ধিয়া পর্যন্ত সুনীল গগৈৰ পত্নী পুষ্পা গগৈ, পুত্র সৌৰভ গগৈ আৰু ভতিজাক জয়ন্ত গগৈক আৰক্ষীয়ে জেৰা কৰে । সুনীল গগৈৰ মাতৃকো জেৰাৰ বাবে আনিছিল যদিও তেওঁক সোনকালেই আৰক্ষীয়ে যাবলৈ দিয়ে ।