গুৱাহাটী, 20 জুলাই : পুনৰ গুণোৎসৱ অনুষ্ঠিত কৰাৰ বাবে সাজু হৈছে ৰাজ্যৰ শিক্ষা বিভাগ ৷ 2025 বৰ্ষৰ বাবে অনুষ্ঠিত হ'বলগীয়া গুণোৎসৱৰ সময়সূচী প্ৰকাশ কৰিছে সমগ্ৰ শিক্ষা অসমে ৷ আগন্তুক বৰ্ষৰ 6 জানুৱাৰীৰ পৰা 6 ফেব্ৰুৱাৰীলৈ অনুষ্ঠিত হ'বলগীয়া গুণোৎসৱে তিনিটা পৰ্যায়ত ৰাজ্যৰ সকলো জিলাক সামৰি ল'ব ৷ প্ৰতিটো পৰ্যায়ত চাৰিদিনকৈ হ'বলগীয়া গুণোৎসৱৰ প্ৰথম দিনটোত বিদ্যালয়ৰ স্ব-মূল্যায়ন হ'ব আৰু পৰৱৰ্তী দিনকেইটাত হ'ব বহিঃমূল্যায়ন ৷ সমগ্ৰ শিক্ষাৰ মিছন সঞ্চালকে ৰাজ্যৰ সকলো জিলাৰ মিছন সমন্বয়ক আৰু প্ৰগ্ৰেম কো-অৰ্ডিনেটৰসকললৈ সমগ্ৰ শিক্ষাই গুণোৎসৱৰ সময়সূচী প্ৰস্তুত কৰি নিৰ্দেশ জাৰি কৰিছে ৷
গুণোৎসৱৰ সময়সূচী প্ৰকাশ (ETV Bharat Assam) প্ৰথম পৰ্যায়ত 6 জানুৱাৰীত আৰম্ভ হ'বলগীয়া গুণোৎসৱত সামৰি লোৱা 11 খন জিলা হৈছে ক্ৰমে বৰপেটা, বজালী, কৰিমগঞ্জ, কামৰূপ, কাৰ্বি আংলং, কোকৰাঝাৰ, লখিমপুৰ, নগাঁও, শিৱসাগৰ, দক্ষিণ শালমাৰা-মানকাচৰ আৰু ওদালগুৰি ৷ 18 জানুৱাৰীৰ পৰা আৰম্ভ হ'বলগীয়া দ্বিতীয় পৰ্যায়ৰ গুণোৎসৱে সামৰি ল'বলগীয়া 13 খন জিলা হৈছে ক্ৰমে বাক্সা, চিৰাং, চৰাইদেউ, ধেমাজি, ধুবুৰী, গোলাঘাট, হাইলাকান্দি, হোজাই, যোৰহাট, কামৰূপ মহানগৰ, শোণিতপুৰ, তামুলপুৰ আৰু তিনিচুকীয়া ৷
লগতে পঢ়ক :চৰকাৰী শিক্ষা ব্যৱস্থাৰ ফোঁপোলা স্বৰূপ : অতি শোচনীয় গৃহত চলি আছে ৰাজ্যৰ ৭ শতাধিক বিদ্যালয় - Education Department of Assam
তৃতীয় পৰ্যায়ত 6 ফেব্ৰুৱাৰীৰ পৰা মুঠ 11 খন জিলাত গুণোৎসৱ অনুষ্ঠিত হ'ব ৷ এই জিলাসমূহ হৈছে ক্ৰমে বঙাইগাঁও, বিশ্বনাথ, দৰং, ডিব্ৰুগড়, গোৱালপাৰা, কাছাৰ, নলবাৰী, মৰিগাঁও, ডিমা হাছাও, মাজুলী আৰু পশ্চিম কাৰ্বি আংলং ৷ বৰপেটা আৰু বাক্সা জিলাই ক্ৰমে বজালী আৰু তামুলপুৰৰ গুণোৎসৱ পৰিচালনা কৰিব ৷ উল্লেখ্য যে ৰাজ্যৰ 35 খন জিলাৰ মুঠ 45,629 খন বিদ্যালয়ত অনুষ্ঠিত হ'ব 2025 বৰ্ষৰ গুণোৎসৱ ৷ 43.23 লাখ শিক্ষাৰ্থীৰ গুণগত শৈক্ষিক মান পৰীক্ষা কৰা হ'ব এই গুণোৎসৱত ৷ ইতিমধ্যে সমগ্ৰ শিক্ষাৰ মিছন সঞ্চালকে নিৰ্দেশনা দিয়াৰ উপৰিও শিক্ষামন্ত্ৰী ডাঃ ৰণোজ পেগুৱে গুণোৎসৱৰ বিষয়ে সদৰী কৰিছে ৷
এইবাৰো পূৰ্বৰ দৰে অ' এম আৰ পদ্ধতিত অনুষ্ঠিত হ'ব গুণোৎসৱ ৷ অৱশ্যে চৰকাৰীভাৱে শিক্ষাৰ্থীক প্ৰদান কৰা বিনামূলীয়া ইউনিফৰ্মৰ গুণগত মানৰ ভিত্তিত এইবাৰ প্ৰথমবাৰৰ বাবে সংযোজিত হ'ব অতিৰিক্ত নম্বৰ ৷ এইবাৰো গুণোৎসৱৰ নম্বৰ প্ৰক্ৰিয়া পূৰ্বৰ দৰেই প্ৰায় একে থাকিব ৷ এইবাৰ ইউনিফৰ্মৰ গুণগত মানৰ ওপৰত অতিৰিক্ত নম্বৰ প্ৰদানৰ ব্যৱস্থা কৰা হৈছে ৷ শিক্ষাৰ্থীক কি মানৰ ইউনিফর্ম যোগান ধৰা হৈছে তাক নিশ্চিত কৰিবলৈ এইবাৰ এই অতিৰিক্ত নম্বৰৰ ব্যৱস্থা কৰা হৈছে ৷
লগতে পঢ়ক :ৰাজ্যজুৰি অব্যাহত গুণোৎসৱ 2024 ৰ তৃতীয় পৰ্যায়ৰ আভ্যন্তৰীণ মূল্যায়ন
