ৰাষ্ট্ৰীয় একতা দিৱসত দৌৰিলে সঞ্জয় কিষাণে

২০১৪ চনৰ পৰা উদযাপন কৰা ৰাষ্ট্ৰীয় একতা দিৱস এইবাৰ দুদিন আগতীয়াকৈ উদযাপন কৰা হয় ৷

তিনিচুকীয়া: তিনিচুকীয়াৰ ৰাজপথত আজি পুৱাই স্থানীয় বিধায়ক তথা শ্ৰমমন্ত্ৰী সঞ্জয় কিষাণ, তিনিচুকীয়াৰ জিলা আয়ুক্ত স্বপ্নীল পাল,আৰক্ষী অধীক্ষক অভিজিৎ গৌৰৱ দিলীপসহ বিভিন্নজনৰ একতাৰ দৌৰ । 'লৌহ পুৰুষ' চৰ্দাৰ বল্লভভাই পেটেলৰ জয়ন্তী উপলক্ষে আজিৰ দিনটো 'ৰাষ্ট্ৰীয় একতা দিৱস'ৰূপে তিনিচুকীয়াত উদযাপন কৰা হৈছে ।

তিনিচুকীয়া জিলা প্ৰশাসন, তিনিচুকীয়া জিলা আৰক্ষী বিভাগ আৰু জিলা ক্ৰীড়া বিভাগৰ উদ্যোগত আয়োজন কৰা হয় এই একতাৰ দৌৰ শীৰ্ষক কাৰ্যসূচী । এই উপলক্ষে মঙলবাৰে পুৱাই তিনিচুকীয়া থানা চাৰিআলিৰ পৰা আয়োজিত 'একতাৰ দৌৰ' আনুষ্ঠানিকভাৱে পতাকা জোকাৰি মুকলি কৰে ৰাজ্যৰ শ্ৰম মন্ত্ৰী সঞ্জয় কিষাণে ।

এই দৌৰত জিলা আয়ুক্ত স্বপ্নীল পাল, আৰক্ষী অধীক্ষক গৌৰব অভিজিৎ দিলীপ, অতিৰিক্ত আয়ুক্ত চিন্ময় পাঠকসহ আৰক্ষী আৰু জিলা প্ৰশাসনৰ জ্যেষ্ঠ বিষয়া, আৰক্ষী জোৱান, অৰ্ধসামৰিক বাহিনী আৰু বহু সংখ্যক ছাত্ৰ-ছাত্ৰী আৰু ৰাইজে অংশগ্ৰহণ কৰে ।

চহৰৰ মাজেৰে অতিক্ৰম কৰা এই দৌৰৰ শেষত তিনিচুকীয়া সদৰ আৰক্ষী থানাৰ প্ৰাংগনত সকলোৱে ৰাষ্ট্ৰীয় একতা, সংহতি আৰু নিৰাপত্তা ৰক্ষাৰ শপতগ্ৰহণ কৰে । সমান্তৰালভাৱে জিলাখনৰ অন্যান্য প্ৰান্ততো এই দিৱস উদযাপন কৰা হৈছে । এই শুভক্ষণত দেশৰ মহান নেতাগৰাকীলৈ গভীৰ শ্ৰদ্ধাঞ্জলি জ্ঞাপন কৰা হয় ।

উল্লেখ্য় যে ৩১ অক্টোবৰৰ দিনটো প্ৰতিবছৰে দেশত ৰাষ্ট্ৰীয় একতা দিৱস হিচাপে উদযাপন কৰা হয় । ভাৰতৰ লৌহ মানৱ খ্যাত চৰ্দাৰ বল্লভভাই পেটেলৰ জন্মবাৰ্ষিকী উপলক্ষে প্ৰতিবছৰে অক্টোবৰ মাহৰ ৩১ তাৰিখটো ৰাষ্ট্ৰীয় একতা দিৱসৰূপে উদযাপন কৰি অহা হৈছে । অৱশ্যে দীপাৱলী আৰু কালীপূজাৰ পৰিপ্ৰেক্ষিতত এইবাৰ এই দিৱসটো ২৯ অক্টোবৰত উদযাপন কৰা হৈছে ।

লগতে পঢ়ক:ৰাষ্ট্ৰীয় একতা দিৱস; সৰুসজাইত ৰাষ্ট্ৰীয় একতা দৌৰ উদ্বোধন কৰি লৌহ মানৱক স্মৰণ সৰ্বানন্দ সোণোৱালৰ