নলবাৰী, ৪ মাৰ্চ :পঞ্চভূতত বিলীন হ'ল ৰাজ্যৰ প্ৰাক্তন মন্ত্ৰী ৰমণী বৰ্মন । ৰাজ্যিক মৰ্যাদাৰে সম্পন্ন হয় অন্তিম সংস্কাৰ । গোলাপ বৰবৰা নেতৃত্বাধীন চৰকাৰৰ শিক্ষা, গৃহ, সমাজ কল্যাণ আৰু ক্ৰীড়া বিভাগৰ প্ৰাক্তন মন্ত্ৰী ৰমণী বৰ্মনৰ মৃত্যুত ৰাজ্যজুৰি শোকৰ ছাঁ পৰিছে । মহান নেতাগৰাকীলৈ অন্তিম শ্ৰদ্ধা জ্ঞাপন কৰে অজস্ৰ গুণমুগ্ধই ।
উল্লেখ্য, এগৰাকী মন্ত্ৰী হৈয়ো ৰমণী বৰ্মনে কটাইছিল অনাড়ম্বৰ জীৱন । আমৃত্যু নিজৰ আদৰ্শত তেওঁ আছিল অলৰ-অচৰ । এক কথাত তেওঁ আছিল সততা আৰু মূল্যবোধ সম্পন্ন ৰাজনীতিৰ এক প্ৰতিভূ । ১৯৩৭ চনত জন্মগ্ৰহণ কৰা ৰমণী বৰ্মনে ১৯৫৪ চনত তেতিয়াৰ গৰ্ডন হাইস্কুলৰ পৰা প্ৰৱেশিকা পৰীক্ষাত উৰ্ত্তীণ হৈছিল । পৰৱৰ্তী সময়ত ১৯৫৯ চনত স্নাতক ডিগ্ৰী লাভ কৰি তেওঁ ১৯৬৩ চনত স্নাতকোত্তৰ ডিগ্ৰী অৰ্জন কৰে ।
স্নাতকোত্তৰ ডিগ্ৰী লাভ কৰাৰ পিচতেই তেওঁ নলবাৰী মহাবিদ্যালয়ত ৰাজনীতি বিজ্ঞান বিভাগৰ অধ্যাপক হিচাপে যোগদান কৰে । আনহাতে, অধ্যাপক হৈ থাকোতে মহাবিদ্যালয়খনৰ অধ্যক্ষ প্ৰয়াত ত্ৰৈলোক্য নাথ গোস্বামী আৰু উমাকান্ত শৰ্মাৰ সংস্পৰ্শলৈ আহি তেওঁ সমাজবাদী আন্দোলনত জঁপিয়াই পৰে । তদানীন্তন কংগ্ৰেছ চৰকাৰৰ দুৰ্নীতি, ভ্ৰষ্টাচাৰ, অন্যায়ৰ বিৰুদ্ধে তেওঁ আন্দোলন সাব্যস্ত কৰিছিল ।
পৰৱৰ্তী সময়ত ১৯৭৮ চনত গোলাপ বৰবৰা নেতৃত্বাধীন চৰকাৰত তেওঁ শিক্ষা, গৃহ, সমাজ কল্যাণ আৰু ক্ৰীড়া দপ্তৰৰ ৰাজ্যিক মন্ত্ৰীৰ দায়িত্ব লাভ কৰিছিল । ধৰ্মপুৰ বিধানসভা সমষ্টিৰ পৰা ৰাজ্যৰ প্ৰয়াত মুখ্যমন্ত্ৰী ডাঃ ভূমিধৰ বৰ্মনক পৰাস্ত কৰি তেওঁ অসম বিধানসভালৈ নিৰ্বাচিত হৈছিল । অৱশ্যে সেই সময়ত ৰাজ্যজুৰি চলা বিদেশী খেদা আন্দোলনৰ বাবে বেছিদিন নিটিকিল তেওঁলোকৰ চৰকাৰ ।