তেজপুৰ :প্ৰতিৰক্ষা মন্ত্ৰী ৰাজনাথ সিঙে বৃহস্পতিবাৰে পুৱা তেজপুৰৰ পৰা টাৱাঙত চৰ্দাৰ বল্লভভাই পেটেলৰ প্ৰতিমূৰ্তি আৰু মেজৰ ৰালেংনাও বব খাটিঙৰ স্মৃতিত এটা সংগ্ৰহালয় মুকলি কৰে । প্ৰতিৰক্ষা মন্ত্ৰীগৰাকী দুদিনীয়া কাৰ্যসূচীৰে টাৱাঙলৈ আহিছিল যদিও প্রতিকূল বতৰৰ বাবে তেজপুৰতে অৱতৰণ কৰিবলগীয়া হয় । নিশা তেজপুৰত সেনা বাহিনীৰ সৈতে নৈশ আহাৰ গ্ৰহণ কৰি পুৱা টাৱাঙৰ এই দুটা অনুষ্ঠানত মন্ত্ৰীগৰাকীয়ে ভাৰ্চুৱেলী অংশগ্ৰহণ কৰে ।
তেওঁ ভাষণত কয়,"মেজৰ খাটিঙে কেৱল টাৱাঙক ভাৰতত শান্তিপূৰ্ণভাৱে একত্ৰিকৰণৰ নেতৃত্ব দিয়াই নহয় সশস্ত্ৰ সীমা বল, নাগালেণ্ড সশস্ত্ৰ আৰক্ষী, নাগা ৰেজিমেণ্টকে ধৰি গুৰুত্বপূৰ্ণ সামৰিক আৰু নিৰাপত্তাৰ কাঠামো স্থাপন কৰিছিল । ভাৰত আৰু চীনৰ মাজত লাভ কৰা ঐক্যমতৰ ভিত্তিত এল এ চিৰ কিছুমান বিশেষ অঞ্চলত সেনা স্থানান্তৰৰ প্ৰক্ৰিয়া প্ৰায় সম্পূৰ্ণ । আমাৰ লক্ষ্য হ'ব বিষয়টোক সেনা প্ৰত্যাহাৰৰ বাহিৰলৈ লৈ যোৱা ।"
বল্লভভাই পেটেলৰ প্ৰতিমূৰ্তি আৰু মেজৰ বব খাটিঙৰ স্মৃতিত সংগ্ৰহালয় মুকলি (@defencePRO) তেওঁ উল্লেখ কৰে, "অখ্যাত নায়কৰ ওচৰত এই দেশ ঋণী । ইতিহাসৰ পৃষ্ঠাত এইবোৰ নাম বেছি স্থান নাপালেও কিন্তু তেওঁলোকৰ ত্যাগ আৰু গুৰুত্ব কমি নাযায় । তেওঁলোকৰ ত্যাগৰ কথা মনত ৰখা, গুৰুত্ব বুজি পোৱা, তেওঁলোকক যথাযথ সন্মান দিয়া আমাৰ কৰ্তব্য । এই দৃষ্টিকোণৰ পৰা আজি আমি এই দুটা সম্পদ জাতিৰ বাবে উৎসৰ্গা কৰিছো ।"
বল্লভভাই পেটেলৰ প্ৰতিমূৰ্তি আৰু মেজৰ বব খাটিঙৰ স্মৃতিত সংগ্ৰহালয় মুকলি (@defencePRO) উত্তৰ-পূৱৰ প্ৰশংসা
উত্তৰ-পূৱৰ কথা উল্লেখ কৰি তেওঁ কয়,"উত্তৰ-পূৰ্বাঞ্চলখন যি প্ৰাকৃতিক আৰু সাংস্কৃতিক সৌন্দৰ্যৰে ভৰি পৰিছে, সেয়া আচৰিত । সাধাৰণতে উত্তৰ-পূৰ্বাঞ্চলৰ বিষয়ে কোৱা হয় যে ই পূব দিশত ভাৰতৰ চৰম মূৰত আছে । কিন্তু এইবোৰ কথাত মই একমত নহয় । মোৰ দৃষ্টিত উত্তৰ-পূৰ্বাঞ্চলক ভাৰতৰ শেষ মূৰ হিচাপে স্বীকৃতি দিয়া উচিত নহয়, বৰঞ্চ ভাৰতৰ আৰম্ভণিৰ মূৰ হিচাপে স্বীকৃতি দিয়া উচিত । এই অঞ্চলতো প্ৰথমে সূৰ্য উদয় হয়, তাৰ পিছতহে ভাৰতৰ আন আন অঞ্চলত । প্ৰথমে সূৰ্য উদয় হোৱা সেই অঞ্চলটোক কেনেকৈ শেষ মূৰ বুলি ক'ব পাৰি, এইটোৱেই প্ৰথম মূৰ হ'ব ।"
বল্লভভাই পেটেলৰ প্ৰতিমূৰ্তি আৰু মেজৰ বব খাটিঙৰ স্মৃতিত সংগ্ৰহালয় মুকলি (@defencePRO) বিভিন্ন ক্ষেত্ৰত উত্তৰ-পূৱৰ অৱদানৰ কথা উল্লেখ কৰি তেওঁ কয়,"ভাৰতৰ ভূগোল, সংস্কৃতি আৰু সভ্যতাৰ প্ৰতি সমগ্ৰ উত্তৰ-পূৰ্বাঞ্চলৰ অৱদান প্ৰশংসনীয় । এই সমগ্ৰ অঞ্চল স্বাভাৱিকতে ভৌগোলিক আৰু সাংস্কৃতিকভাৱে চহকী । অৰুণাচল প্ৰদেশত প্ৰকৃতিৰ অধিক আশীৰ্বাদ দেখিবলৈ পাওঁ । আমাৰ বাবে উত্তৰ-পূবৰ এই অঞ্চলটো অবিশ্বাস্য আৰু লগতে অমূল্য । আজি দীপাৱলী আৰু দেশৰ ঐক্য আৰু অখণ্ডতাক সুদৃঢ় কৰি তোলা চৰ্দাৰ বল্লভভাই পেটেলৰ জন্ম বাৰ্ষিকীও । দীপাৱলীয়েও আমাক ঐক্যৰ বাৰ্তা দিয়ে । ইয়াৰ উপৰিও এই উৎসৱে আমাক এই বাৰ্তাও দিয়ে যে 'ঐক্য'ৰ সহায়ত আমি সহজেই ডাঙৰ ডাঙৰ লক্ষ্যত উপনীত হ'ব পাৰো । উদাহৰণস্বৰূপে, এটা মাত্ৰ লেম্পে অলপ দূৰত্বৰ বাবেহে পোহৰ দিব পাৰে । কিন্তু বহুতো লেম্প, লাইনত জ্বলাই দিলে গোটেই ঠাইখন পোহৰাই তোলে । এই লেম্পৰ ঐক্যই এই বাৰ্তা দিয়ে যে ইচ্ছা যিমানেই ডাঙৰ নহওঁক কিয়, যদি আমি একত্ৰিত হও সেইবোৰক সফল কৰাৰ দিশত আগবাঢ়ি যাব পাৰো ।"
বল্লভভাই পেটেলৰ প্ৰতিমূৰ্তি আৰু মেজৰ বব খাটিঙৰ স্মৃতিত সংগ্ৰহালয় মুকলি (@defencePRO) দীপাৱলী উপলক্ষে তেওঁ দেশবাসীক উদ্দেশ্যি কয়,"এই উৎসৱে আমাক এই বাৰ্তাও দিয়ে যে সমাজৰ কোনোবা এটা প্ৰদীপ ইচ্ছা কৰিলে ই নিজৰ পোহৰেৰে সমগ্ৰ সমাজখনক আলোকিত কৰিব পাৰে আৰু সমগ্ৰ সমাজখনক একত্ৰিত কৰি ইমানবোৰ আন্ধাৰ আঁতৰোৱাৰ ক্ষমতা আছে । আজি আমি ইয়াত সমবেত হৈ দেশৰ সাহসী পুত্ৰ দুজনক স্মৰণ কৰিছো । মোৰ বিশ্বাস যে তেওঁলোক আমাৰ জাতি আৰু সমাজৰ এনেকুৱা লেম্প আছিল । তেওঁ নিজৰ দৃঢ়তা আৰু সংগ্ৰামৰ পোহৰেৰে নিজকে আলোকিত কৰাই নহয়, সমগ্ৰ সমাজ আৰু জাতিটোক আলোকিত কৰি একত্ৰিত কৰিলে ।
চৰ্দাৰ বল্লভভাই পেটেলক স্মৰণ
তেওঁ লগতে কয় ,"দেশৰ প্ৰথম গৃহ মন্ত্ৰী আৰু তাতোকৈ ডাঙৰ কথা দেশৰ ঐক্যৰ স্থপতি চৰ্দাৰ বল্লভভাই পেটেল জীক প্ৰণাম জনাইছো । ভাৰত স্বাধীন হোৱাৰ সময়ত বিশ্বৰ বহু অঞ্চলৰ বহু নেতাই আগন্তুক কেইবছৰমানৰ ভিতৰত দেশখন বিভাজিত হ'ব বুলি ভৱিষ্যদ্বাণী কৰিছিল । এই দেশক মুক্ত কৰিবলৈ দিনে নিশাই একত্ৰিত হোৱা ব্যক্তিজনে এই দেশখনক বহু টুকুৰাত বিভক্ত হ'বলৈ কেনেকৈ অনুমতি দিব ? এই জাতিটোৱে তেওঁলোকৰ প্ৰতি যিমানেই কৃতজ্ঞতা প্ৰকাশ নকৰক কিয়, ই বহু কম ।"
বল্লভভাই পেটেলৰ প্ৰতিমূৰ্তি আৰু মেজৰ বব খাটিঙৰ স্মৃতিত সংগ্ৰহালয় মুকলি (@defencePRO) মেজৰ বব খাটিঙৰ অৱদান
ইফালে মেজৰ বব খাটিঙৰ অৱদানৰ কথা উল্লেখ কৰি তেওঁ কয়, "মেজৰ বব খাটিঙৰ অৱদান কেৱল টাৱাঙক ভাৰতত অন্তৰ্ভুক্ত কৰাতে সীমাবদ্ধ নাই । যি সময়ত নগা পাহাৰ আৰু উত্তৰ-পূব সীমান্ত এজেন্সিৰ টুয়েনছাং বিভাগত বিদ্ৰোহৰ পৰিৱেশ আছিল, সেই সময়ত তেওঁ বিদ্ৰোহৰ অন্ত পেলোৱাতো গুৰুত্বপূৰ্ণ ভূমিকা পালন কৰিছিল । মেজৰ বব খাটিঙৰ অৱদান কেৱল অৰুণাচল আৰু নাগালেণ্ডতে সীমাবদ্ধ নাছিল । মণিপুৰৰ সৈতেও তেওঁৰ গভীৰ সম্পৰ্ক আছিল । তেওঁৰ জন্ম মণিপুৰত । মেজৰ খাটিং আছিল মণিপুৰৰ প্ৰথম জনজাতীয় ৰত্ন যিয়ে স্নাতক ডিগ্ৰী লাভ কৰিছিল । আনকি দ্বিতীয় বিশ্বযুদ্ধৰ সময়ত মণিপুৰৰ এই পুত্ৰই জাপানৰ আগ্ৰাসনৰ পৰা মণিপুৰক বচাবলৈ গুলীও গাত পাতি লৈছিল ।"
বল্লভভাই পেটেলৰ প্ৰতিমূৰ্তি আৰু মেজৰ বব খাটিঙৰ স্মৃতিত সংগ্ৰহালয় মুকলি (@defencePRO) তেওঁ কয়,"মণিপুৰ, অৰুণাচল প্ৰদেশ, নাগালেণ্ড, ছিকিম, অসম, উত্তৰ-পূৰ্বাঞ্চলৰ কোনো অঞ্চলে মেজৰ খাটিঙৰ সৈতে সংযোগ অনুভৱ নকৰাকৈ নাই । যদিও মেজৰ খাটিঙৰ দৰে ব্যক্তিত্ব সমগ্ৰ দেশৰ সৈতে সম্পৰ্কিত উত্তৰ-পূব অঞ্চলৰ বাবে তেওঁ কৰা কামবোৰ ইতিহাসত সদায় স্মৰণীয় হৈ থাকিব । আজি উত্তৰ-পূব অঞ্চলত বিভাজন সৃষ্টিৰ চেষ্টা কৰা শক্তিসমূহে পাহৰিব নালাগে যে উত্তৰ-পূৱৰ জনসাধাৰণে মেজৰ খাটিঙৰ পৰা প্ৰেৰণা লাভ কৰিছে । এই অঞ্চলক বিভক্ত কৰা নহ'ব, কোনো লোককে ইয়াক বিভক্ত কৰিবলৈ দিয়া নহ'ব ।"
তেওঁ লগতে কয়, "চৰ্দাৰ বল্লভভাই পেটেল আৰু মেজৰ বব খাটিঙৰ মাজৰ আমি এটা ডাঙৰ মিল দেখা পাওঁ । এই দুয়োজন মহাপুৰুষে যি কাম কৰিছিল বাহ্যিক শক্তিৰ ভিত্তিত নহয়, নিজৰ অন্তৰ্নিহিত শক্তিৰ ভিত্তিতহে কৰিছিল । সমগ্ৰ বিশ্বৰ ইতিহাসলৈ চাওঁক । সমগ্ৰ বিশ্বতে য'তেই একত্ৰিকৰণৰ কাম কৰা হৈছে, তাত কিছু শক্তিৰ ব্যৱহাৰ নিশ্চিতভাৱে কৰা হৈছে । যেতিয়াই একত্ৰিকৰণ হৈছে তেতিয়াই তাত বাহ্যিক শক্তিৰ ব্যৱহাৰ নিশ্চিতভাৱে কৰা হৈছে । কিন্তু এই দুজন মহাপুৰুষে কেৱল আভ্যন্তৰীণ শক্তিৰ বলত নিজৰ কাম কৰিছিল । নিজৰ আভ্যন্তৰীণ শক্তি অৰ্থাৎ মাতৃভূমিৰ প্ৰতি সমৰ্পণ, দেশপ্ৰেম আৰু কূটনৈতিক শক্তিৰ বলত তেওঁলোকে দেশক একত্ৰিত কৰাৰ বাবে কাম কৰিছিল । এটা বা দুটা ব্যতিক্ৰমক বাদ দিলে হিংসাৰ আশ্ৰয় নোলোৱাকৈ তেওঁলোকে কৰা কামটো আছিল আচৰিত । এয়াই আমাৰ সভ্যতাৰ পৰিচয় । এয়া আমাৰ সংস্কৃতি । আজিও সমগ্ৰ বিশ্বতে শান্তিৰ আকাংক্ষা ভাৰতীয় সংস্কৃতিৰ চিহ্ন । দেশৰ এই দুই পুত্ৰৰ নীতিয়ে এতিয়াও আমাক পথ প্ৰদৰ্শন কৰি আছে ।"
ৰাষ্ট্ৰীয় একতা দিৱস
সিঙে তেওঁৰ ভাৰ্চুৱেল ভাষণত একতা দিৱস সম্পৰ্কত কয়,"আজি ৰাষ্ট্ৰীয় একতা দিৱস । আমি সকলোৱে জনা মতে চৰ্দাৰ পেটেলৰ জন্মদিনত এই দিৱস পালন কৰা হয় । সমগ্ৰ বিশ্বতে যেতিয়াই ভাৰতৰ নাম লয় তেতিয়াই এইটোও যোগ কৰে যে এইখন দেশ বৈচিত্ৰ্যৰ ঐক্যৰ নিদৰ্শন । ভগৱানে জানে কিমান ভাষা, ভগৱানে জানে কিমান সংস্কৃতি, ভগৱানে জানে কিমান ধৰ্ম, ভগৱানে জানে এই দেশত কিমান পন্থা আছে । কিন্তু ইয়াৰ পিছতো আমাৰ দেশত যি ঐক্য দেখা গৈছে সেয়া আচৰিত । ঐক্যৰ কথা আহিলে মই দেশৰ ঐক্যত উত্তৰ-পূব অঞ্চলৰ গুৰুত্ব আৰু ইয়াৰ ওপৰত আমাৰ মনোযোগৰ বিষয়ে ক'ব পাৰো ।"
তেওঁ কয়,"আপোনালোক সকলোৱে জানে যে প্ৰধানমন্ত্ৰীৰ নেতৃত্বত আমাৰ চৰকাৰে সমগ্ৰ উত্তৰ-পূৰ্বাঞ্চলৰ অৰ্থনৈতিক উন্নয়ন আৰু বিশেষকৈ আন্তঃগাঁথনি উন্নয়নৰ প্ৰতি সদায় গুৰুত্ব দি আহিছে । আমি বিশ্বাস কৰো যে ভাৰতৰ উত্তৰ-পূর্বাঞ্চলৰ উন্নয়ন নোহোৱালৈকে ভাৰতৰ সম্পূর্ণ বিকাশ অসম্ভৱ ৷ গতিকে আমাৰ চৰকাৰে অৰ্থনৈতিক উন্নয়ন আৰু আন্তঃগাঁথনিৰ দৃষ্টিকোণৰ পৰা সমগ্ৰ ভাৰতক একত্ৰিত কৰাত বিশেষ গুৰুত্ব আৰোপ কৰিছে ।"
সমগ্ৰ উত্তৰ-পূৰ্বাঞ্চলৰ আন্তঃগাঁথনি উন্নয়নত প্ৰতিৰক্ষা মন্ত্ৰালয়ে অতি গুৰুত্বপূৰ্ণ অৱদান আগবঢ়াইছে বুলি মন্তব্য কৰি তেওঁ কয় ,"যদি মই অৰুণাচল প্ৰদেশৰ বিষয়ে বিশেষভাৱে কও, তেন্তে যোৱা কেইদিনমানৰ ভিতৰত সীমান্ত পথ সংস্থাই বহু আন্তঃগাঁথনি প্ৰকল্প সম্পূৰ্ণ কৰিছে । মাত্ৰ দুসপ্তাহমান পূৰ্বে অৰুণাচলত বিআৰঅ'ৰ ১৮ টা প্ৰকল্প উদ্বোধন কৰিছিলো । ইয়াৰ উপৰিও অসমৰ তেজপুৰক অৰুণাচলৰ টাৱাঙৰ সৈতে সংযোগ কৰা ১৩ হাজাৰ ফুট উচ্চতাত নিৰ্মিত ছেলা সুৰংগটোও অঞ্চলটোৰ বিআৰঅ'ৰ অন্যতম গুৰুত্বপূৰ্ণ প্ৰকল্প । আগন্তুক সময়ত অৰুণাচল সীমান্ত ঘাইপথ প্ৰকল্পই সমগ্ৰ উত্তৰ-পূৰ্বাঞ্চল বিশেষকৈ সীমান্তৱৰ্তী অঞ্চলসমূহক সংযোগ স্থাপনৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰিব । প্ৰায় ২০০০ কিলোমিটাৰ দৈৰ্ঘৰ এই ঘাইপথটো উত্তৰ-পূব অঞ্চলৰ লগতে সমগ্ৰ ভাৰতৰ বাবেও এক গুৰুত্বপূৰ্ণ কৌশলগত সম্পদ হিচাপে প্ৰমাণিত হ'ব । ইয়াৰ উপৰিও ই সমগ্ৰ অঞ্চলটোৰ বাবে অৰ্থনৈতিক সম্পদ হিচাপেও কাম কৰিব ।"
প্ৰতিৰক্ষা মন্ত্ৰীগৰাকীয়ে কয়,"পথ আৰু দলঙৰ জৰিয়তে বিআৰঅ'ই কেৱল ঠাইৰ মাজৰ দূৰত্ব সেতুবন্ধন কৰাই নহয়, হৃদয়ৰ মাজৰ দূৰত্বৰ সেতু হিচাপে কাম কৰিছে । সীমান্তৱৰ্তী অঞ্চলসমূহৰ আন্তঃগাঁথনি উন্নয়নৰ জৰিয়তে বিআৰঅ'ই এই বাৰ্তা দিছে যে সীমান্তৱৰ্তী অঞ্চলসমূহ চৰকাৰৰ বাবেও দেশৰ বাকী অংশৰ দৰেই গুৰুত্বপূৰ্ণ । এয়া এক প্ৰকাৰে ঐক্যৰ বাৰ্তা । চৰ্দাৰ পেটেল আৰু মেজৰ বব খাটিঙৰ দৰে মহান ব্যক্তিয়ে যেনেকৈ নিজৰ কৰ্মৰ জৰিয়তে ভাৰতক একত্ৰিত কৰিছিল, একেদৰে বিআৰঅ'ই তেওঁলোকৰ প্ৰেৰণা লৈ আগবাঢ়িছে আৰু ইয়াৰ আন্তঃগাঁথনি প্ৰকল্পৰ জৰিয়তে সমগ্ৰ জাতিটোক একত্ৰিত কৰিছে ।"
সেনা বাহিনীক প্ৰশংসা
সেনা বাহিনীক উদ্দেশ্যি তেওঁ কয় যে,"আমাৰ সশস্ত্ৰ বাহিনীয়ে সমগ্ৰ উত্তৰ-পূব অঞ্চলত শান্তি আৰু নিৰাপত্তা সুনিশ্চিত কৰি আছে । কিন্তু আমাৰ সশস্ত্ৰ বাহিনী কেৱল সীমান্ততে সীমাবদ্ধ হৈ থকা নাই । ইয়াৰ বাহিৰেও এন চি চিৰ জৰিয়তে, সৈনিক বিদ্যালয়ৰ জৰিয়তে আৰু প্ৰয়োজন সাপেক্ষে এইছ এ ডি আৰ অভিযানৰ জৰিয়তে আমাৰ সশস্ত্ৰ বাহিনী এই অঞ্চলৰ জনসাধাৰণৰ সৈতে জড়িত হৈ আছে । উত্তৰ-পূব অঞ্চলৰ আভ্যন্তৰীণ নিৰাপত্তা সুনিশ্চিত কৰাৰ ক্ষেত্ৰতো আমাৰ সেনাই বৃহৎ ভূমিকা পালন কৰি আছে । এই অঞ্চলৰ জনসাধাৰণৰ সৈতে একেলগে কাম কৰাটো আমাৰ প্ৰচেষ্টা । ইয়াৰ বাবে আমি সেনাবাহিনীৰ জৰিয়তে উত্তৰ-পূৰ্বাঞ্চলৰ স্থানীয় অৰ্থনীতিকো প্ৰসাৰিত কৰাৰ বাবে কাম কৰি আছো । সেনাবাহিনীৰ কেণ্টিনত উপলব্ধ সামগ্ৰীৰ সন্দৰ্ভত আমি স্থানীয় যোগানকাৰী আৰু সামগ্ৰীক অগ্ৰাধিকাৰ দিবলৈ চেষ্টা কৰো ।
উত্তৰ-পূৱবাসীক আশ্বাস ৰাজনাথ সিঙৰ
উত্তৰ-পূৱৰ ৰাইজক উদ্দেশ্যি তেওঁ কয়,"আপোনালোক সকলোকে আশ্বাস দিছো যে বিআৰঅ' হওঁক বা আমাৰ সশস্ত্ৰ বাহিনী হওঁক বা ভাৰত চৰকাৰেই হওঁক বা ৰাজ্য চৰকাৰেই হওঁক আমি সকলোৱে উত্তৰ-পূব অঞ্চলৰ উন্নয়নৰ বাবে দায়বদ্ধ । এই সমগ্ৰ অঞ্চলটোৰ উন্নয়নৰ বাবে যি প্ৰয়োজনীয় আমি কৰিম । অনাগত সময়ত আমি এনে এখন উত্তৰ পূৰ্বাঞ্চল সৃষ্টি কৰিম যি কেৱল স্বাভাৱিক আৰু সাংস্কৃতিকভাৱেই নহয় আৰ্থিকভাৱেও সবল আৰু সমৃদ্ধিশালী হ'ব । এনে এখন উত্তৰ পূৰ্বাঞ্চল যিটো কঠিন পথৰ বাবে নহয়, সুন্দৰ আৰু সুগম পথৰ বাবেই জনা যাব । এক উত্তৰ-পূৰ্বাঞ্চল য'ত প্ৰতিজন ব্যক্তিয়ে নিজৰ বিকাশৰ বাবে সম্পূৰ্ণ সুযোগ পাব । চৰ্দাৰ পেটেলৰ প্ৰতিমূৰ্তি 'দেশ কা বল্লভ' আৰু মেজৰ বব খাটিঙক উৎসৰ্গিত 'মিউজিয়াম অৱ ভেলো'ৰ এই দুয়োটা স্থান আজিৰে পৰা এই অঞ্চলকে ধৰি দেশৰ ঐতিহ্য হিচাপে পৰিগণিত হৈছে । এতিয়া অৰুণাচল প্ৰদেশলৈ অহা যিকোনো পৰ্যটক এই স্থান ভ্ৰমণ নকৰাকৈ নাথাকিব ।"
উল্লেখ্য যে প্ৰতিৰক্ষা মন্ত্ৰীগৰাকীয়ে ভাৰ্ছুৱেলী মুকলি কৰাৰ সময়ত টাৱাঙৰ মুখ্য অনুষ্ঠানত উপস্থিত থাকে অৰুণাচল প্ৰদেশৰ ৰাজ্যপাল লেফটেনেণ্ট জেনেৰেল অৱসৰপ্ৰাপ্ত কে টি পাৰনাইক, মুখ্যমন্ত্ৰী পেমা খাণ্ডু, উপ-মুখ্যমন্ত্ৰী চৌনা মেন', কেন্দ্ৰীয় মন্ত্ৰী কিৰেন ৰিজিজু আৰু মণিপুৰৰ মুখ্যমন্ত্ৰী এন বীৰেন সিং ।
লগতে পঢ়ক :কংগ্ৰেছে বল্লভভাই পেটেলক অন্ধকাৰত ৰাখিছিল: কেন্দ্ৰীয় মন্ত্ৰী সোণোৱাল
