গুৱাহাটী, 24 জুলাই: দুদিনৰ পিছতো নিখোজ যশস্বী সংগীত পৰিচালক ৰমেন বৰুৱা । মঙলবাৰে সমগ্ৰ দিনটো ব্ৰহ্মপুত্ৰত অভিযান চলোৱাৰ পিছতো সন্ধান ওলোৱা নাই ৰমেন বৰুৱাৰ । সোমবাৰৰ দিনা ৰমেন বৰুৱাক গুৱাহাটী উচ্চ ন্যায়ালয়ৰ ওচৰত থকা এটা চি চি টিভি ফুটেজত প্ৰত্যক্ষ কৰা হৈছিল আৰু শিল্পীগৰাকীৰ ম'বাইল লোকেশ্যন ব্ৰহ্মপুত্ৰৰ পাৰত পোৱা গৈছিল ।
আশ্চৰ্যজনকভাৱে সন্ধানহীন হৈ পৰা বিশিষ্ট শিল্পীগৰাকীৰ সন্ধানত মঙলবাৰৰ নিশা স্নিফাৰ ডগৰ সহায়ত ব্ৰহ্মপুত্ৰৰ পাৰৰ বিভিন্ন স্থানত আৰক্ষীয়ে অভিযান চলায় যদিও কোনো শুংসূত্ৰ উলিয়াবলৈ সক্ষম নহ’ল । অভিযানৰ সময়ত উক্ত স্থানত উপস্থিত থাকে মহানগৰ আৰক্ষী আয়ুক্ত দিগন্ত বৰা ।
আৰক্ষী আয়ুক্ত দিগন্ত বৰাই সংবাদ মাধ্যমৰ আগত কয়, "বুধবাৰেও ব্ৰহ্মপুত্ৰত গুৱাহাটীৰ পৰা ধুবুৰীলৈ অভিযান চলিব । ৰমেন বৰুৱাৰ সন্ধান উলিয়াবলৈ প্ৰশাসনে কোনো ক্ৰুটি নাৰাখে । ইতিমধ্যে মুখ্যমন্ত্ৰী হিমন্ত বিশ্ব শৰ্মাইও বিষয়টো সন্দৰ্ভত প্ৰতিক্ৰিয়া প্ৰকাশ কৰি কোনো ত্ৰুটি নৰখাকৈ বৰুৱাৰ সন্ধান উলিয়াবলৈ ক্ষীপ্ৰ ব্যৱস্থা গ্ৰহণ কৰিবলৈ নিৰ্দেশ দিছে ।"
উল্লেখযোগ্য যে সোমবাৰে পুৱা প্ৰায় 10.30 বজাৰ পৰা বিশিষ্ট সংগীত পৰিচালকগৰাকী সন্ধানহীন হৈ আছে । সংগীত পৰিচালকগৰাকীৰ সন্ধানহীন হোৱাৰ খবৰে গুৱাহাটীৰ লগতে ৰাজ্যবাসীক উদ্বিগ্ন কৰি তুলিছে । প্ৰসিদ্ধ শিল্পীগৰাকীয়ে গুৱাহাটীৰ লতাশিলস্থিত বাসভৱনৰ পৰা সমীপৰ লতাশিল গণেশ মন্দিৰলৈ বুলি ওলাই গৈছিল । ইয়াৰ পিচত দুপৰীয়া পর্যন্ত তেওঁ ঘৰলৈ ঘূৰি নহাত পৰিয়ালৰ সদস্যই শিল্পীগৰাকীক ফোন কৰে যদিও তেওঁৰ ম’বাইলটো ছুইচ অফ পায় । এই লৈ পৰিয়ালৰ সদস্যসকল চিন্তিত হৈ পৰে ।