লক্ষ্যত উপনীত হ'বৰ বাবে বদ্ধপৰিকৰ উমা চেত্ৰী : কেনেদৰে চলাইছে প্ৰস্তুতি ? - Interaction With Cricketer Uma Chetry

Interaction With Cricketer Uma Chetry : অসমৰ ক্ৰীড়াক্ষেত্ৰক পুনৰবাৰ গৌৰৱান্বিত কৰি ভাৰতীয় মহিলা ক্ৰিকেট দলত স্থান লাভ কৰিছে অসমৰ প্ৰতিশ্ৰুতিবান ক্ৰিকেটাৰ উমা চেত্ৰীয়ে । দক্ষিণ আফ্ৰিকাৰ বিৰুদ্ধে অনুষ্ঠিত হ'বলগীয়া আগন্তুক ঘৰুৱা শৃংখলাৰ বাবে জাতীয় পোছাক পিন্ধিব বোকাখাতৰ জীয়াৰী উমাই । তাৰ বাবে কেনেদৰে প্ৰস্তুতি চলাইছে উমা চেত্ৰীয়ে ? ই টিভি ভাৰত অসমৰ কাজিৰঙাৰ সাংবাদদাতা ধ্ৰুৱজ্যোতি সাহাৰ সৈতে উমা চেত্ৰীৰ বিশেষ সাক্ষাৎকাৰ ।

কাজিৰঙা, ৬ জুন : শেহতীয়াভাৱে অসমৰ ক্ৰীড়াক্ষেত্ৰলৈ আন এক সুখবৰ কঢ়িয়াই আনিছে অসমৰ প্ৰতিশ্ৰুতিসম্পন্ন ক্ৰিকেটাৰ উমা চেত্ৰীয়ে । দক্ষিণ আফ্ৰিকাৰ বিৰুদ্ধে ভাৰতৰ মহিলা ক্ৰিকেট দলে খেলিবলগা আগন্তুক ঘৰুৱ শৃংখলাত ৰাষ্ট্ৰীয় দলক প্ৰতিনিধিত্ব কৰাৰ সুযোগ লাভ কৰিছে অসম কন্যা উমা চেত্ৰীয়ে । টেষ্ট, এদিনীয়া আৰু টি-২০ শৃংখলাৰ বাবে ভাৰতীয় দললৈ আমন্ত্ৰণ লাভ কৰাত গৌৰৱান্বিত হৈছে প্ৰতিগৰাকী অসমবাসী । আনহাতে, আগন্তুক শৃংখলাৰ বাবে ঘৰতে কঠোৰ অনুশীলন অব্যাহত ৰাখিছে উমা চেত্ৰীয়ে ।

উল্লেখ্য, নিৰ্বাচনৰ ধামখুমীয়াত মানুহৰ মনবোৰত কেৱল ৰাজনৈতিক চিন্তাই আৱৰি থকাৰ সময়তে ভাৰতীয় মহিলা ক্ৰিকেট দলত বোকাখাতৰ সন্তান উমা চেত্ৰীয়ে স্থান লাভ কৰিবলৈ সক্ষম হোৱাত অসমৰ ক্ৰিকেট জগতত নতুন জোৱাৰ উঠিছে ।

ক্ৰিকেট বুলিলে এটা সময়ত ক্ৰিকেটৰ ভগৱান মাষ্টাৰ-ব্লাষ্টাৰ শচীন তেণ্ডুলকাৰৰ নাম মনলৈ আহিছিল ৷ শচীন তেণ্ডুলকাৰে কেনেকৈ খেলে অথবা সৌৰভ গাংগুলী, ৰাহুল ড্ৰাবিড়ৰ শ্বটবোৰে দোলা দি যায় বহুতৰে মনত ৷ পৰৱৰ্তী সময়ত এম এছ ধোনী অথবা তাৰ পিচৰ পৰ্যায়ত বিৰাট কোহলীৰ দৰে ক্ৰিকেটাৰৰ নাম উঠি অহা প্ৰজন্মৰ বহুতৰে মনলৈ আহে ৷

আজি কিন্তু অসমৰ ক্ৰিকেট জগতত এটা নামেই সকলোৰে মুখে মুখে ৷ সেয়া হৈছে উমা চেত্ৰী ৷ ভাৰতীয় মহিলা ক্ৰিকেট দলত স্থান লাভ কৰা উমা চেত্ৰীক লৈ আজি সকলোৱে গৌৰৱান্বিত ৷ ভাৰতীয় মহিলা ক্ৰিকেট দলত স্থান লাভ কৰিবলৈ সক্ষম হোৱা বোকাখাতৰ সন্তান উমা চেত্ৰীয়ে ৰাজ্যৰ ক্ৰিকেট ক্ষেত্ৰলৈ এক আশাৰ বতৰাও কঢ়িয়াই আনিছে ৷ ভাৰতীয় দলত উইকেটৰক্ষক বেটছমেন হিচাপে স্থান লাভ কৰিছে উমা চেত্ৰীয়ে ৷

বৰ্তমান বোকাখাতৰ ৰাজহুৱা খেলপথাৰত উমাই কঠোৰ অনুশীলন চলাই আছে ৷ যিসকল স্থানীয় প্ৰশিক্ষকৰ জৰিয়তে আজি উমা ৰাষ্ট্ৰীয় দলত জিলিকিবলৈ সক্ষম হৈছে, তেওঁলোকক লৈয়ে উমাই অনুশীলন চলাই আছে ৷ তেওঁলোকৰ তত্ত্বাৱধানতেই বোকাখাত ৰাজহুৱা খেলপথাৰত তেওঁ অনুশীলন অব্যাহত ৰাখিছে ৷ সীমিত সা-সুবিধাৰ মাজেৰেও আন আন খেলুৱৈৰ স’তে তেৱোঁ ক্ৰিকেট অনুশীলন চলাই গৈছে ৷

লগতে পঢ়ক :ভাৰতীয় মহিলা ক্ৰিকেট দলত স্থান লাভ কৰা উমা ছেত্ৰীক বোকাখাতত সম্বৰ্ধনা অতুল বৰাৰ - WOMEN CRICKETER Uma Chetry