আমগুৰি, ১২ অক্টোবৰ :শিৱসাগৰ জিলাৰ আমগুৰি । এক ঐতিহাসিক স্থান । লগতে এই আমগুৰিৰ এক সুকীয়া বৈশিষ্ট্যও আছে, সেয়া হৈছে হিন্দু-মুছলিমৰ মাজত একতা আৰু সম্প্ৰীতি । আনহাতে, এই শিৱসাগৰ জিলাতে খ্ৰীষ্টীয় বাৰ শতিকাতে আজান ফকীৰে সম্প্ৰীতিৰ বাণী বিলাইছিল এনেদৰে, 'মোৰ মনত ভেদ ভাব নাই অ' আল্লা, মোৰ মনত ভিন-পৰ নাই অ' আল্লা, হিন্দু কি মুছলমান একে আল্লাৰ ফৰমান ... ' । আৰু এই সম্প্ৰীতি আৰু একতাৰ এনাজৰীডাল এতিয়াও কটকটীয়া হৈ আছে আমগুৰি অঞ্চলত । তাৰেই এক শেহতীয়া নিদৰ্শন হৈছে আমগুৰিৰ দুৰ্গা পূজা । আমগুৰিত ইছলামধর্মী পৰিয়ালে আগবঢ়াইছে দুর্গা পূজাৰ প্ৰতিমা ।
যিসময়ত ধর্মীয় অসহিষ্ণুতাই দেশ-বিদেশত সাম্প্রদায়িক সংঘৰ্ষৰ সৃষ্টি কৰিছে, যিসময়ত দেশত একাংশ ধর্মীয় নেতা, ধুৰন্ধৰ ৰাজনীতিক তথা ৰাজনৈতিক দলে ধৰ্মৰ নামত বিভেদৰ সৃষ্টি কৰিছে, সেই সময়তে শিৱসাগৰ জিলাৰ আমগুৰিত দেখা গৈছে ধর্মীয় সম্প্ৰীতিৰ এক বিৰল নিদর্শন ।