তিনিচুকীয়া, ৯ আগষ্ট: তিনিচুকীয়া জিলাৰ দিব্যাংগসকলক চিনাক্ত কৰি তেওঁলোকৰ বাবে গ্ৰহণ কৰা হৈছে এক বিশেষ পদক্ষেপ । এই পদক্ষেপ হিচাপে শুক্ৰবাৰে আৰম্ভ কৰা হয় 'মিছন থট্ফুল তিনিচুকীয়া ' । উক্ত মিছন থট্ফুল তিনিচুকীয়াৰ জৰিয়তে জিলাখনৰ ১৬০ গৰাকী দিব্যাংগৰ ওঁঠত বিৰিঙিল হাঁহি । মিছন থট্ফুলৰ জৰিয়তে ইণ্ডিয়ান অইল, ডিগবৈ শোধনাগাৰ আৰু ভাৰত চৰকাৰৰ বিশেষ আঁচনিৰ জৰিয়তে তিনিচুকীয়াৰ দিব্যাংগ আৰু বয়োজ্যেষ্ঠসকলক প্ৰদান কৰা হয় হুইল চেয়াৰ, লাখুটি, বেটাৰিৰে চালিত বাহনকে আদি কৰি বিভিন্ন সামগ্ৰী ৷
উল্লেখ্য় যে তিনিচুকীয়াত অসমৰ ভিতৰতে প্ৰথমবাৰৰ বাবে জিলা আয়ুক্ত স্বপ্নীল পালৰ তৎপৰতাত চিকিৎসকৰ জৰিয়তে স্বাস্থ্য পৰীক্ষা শিবিৰ অনুষ্ঠিত কৰি দিব্যাংগৰ প্ৰমাণপত্ৰ প্ৰদান কৰা হৈছিল । জিলাখনত ৫৫৬ গৰাকী দিব্যাংগক প্ৰমাণপত্ৰ প্ৰদান কৰা হয় এই শিৱিৰত ৷ দিব্যাংগসকলৰ মুখত হাঁহি বিৰিঙাবলৈ শুক্ৰবাৰে তিনিচুকীয়াৰ বৰগুৰিত আয়োজিত এক অনুষ্ঠানত বিশেষভাৱে উপস্থিত থাকে তিনিচুকীয়া জিলাৰ অভিভাৱক মন্ত্ৰী ৰণজিৎ কুমাৰ দাস, জিলা আয়ুক্ত স্বপ্নীল পালৰ লগতে ইণ্ডিয়ান অইলৰ বিষয়াসকল ।