যোৰহাটত স্বদেশ দৰ্শন ২.০ আঁচনি উদ্বোধন অনুষ্ঠানত মন্ত্ৰী জয়ন্ত মল্লবৰুৱা যোৰহাট, ৭ মাৰ্চ : প্ৰধানমন্ত্ৰী নৰেন্দ্ৰ মোদীয়ে বৃহস্পতিবাৰে শ্ৰীনগৰৰ পৰা ৬,৪০০ কোটি টকা ব্যয় সাপেক্ষে স্বদেশ দৰ্শন ২.০ আঁচনিৰ অধীনত ৫৩ টা বিভিন্ন প্ৰকল্পৰ শিলান্যাস কৰে । এই অনুষ্ঠানৰ যোৰহাট জিলা পুথিভঁৰাল প্ৰেক্ষাগৃহত আয়োজিত ভাৰ্চুৱেল অনুষ্ঠানত উপস্থিত থাকে ৰাজ্যৰ পৰ্যটন মন্ত্ৰী জয়ন্ত মল্লবৰুৱা ।
উক্ত আঁচনিৰ অধীনত যোৰহাট আৰু কোকৰাঝাৰৰ পৰ্যটন ক্ষেত্ৰৰ বাবে দুটা প্ৰকল্পও শুভাৰম্ভ কৰা হয় । আনহাতে, উক্ত অনুষ্ঠানত অংশগ্ৰহণ কৰি মন্ত্ৰী জয়ন্ত মল্লবৰুৱাই কয় যে কাজিৰঙাত প্ৰধানমন্ত্ৰী নৰেন্দ্ৰ মোদীৰ নৈশযাপন আৰু জীপ, হাতী ছাফাৰিত অংশগ্ৰহণে বিশ্বত কাজিৰঙাৰ পৰ্যটন ক্ষেত্ৰক এক নতুন মাত্ৰা প্ৰদান কৰিব । কাৰণ প্ৰধানমন্ত্ৰী নৰেন্দ্ৰ মোদীয়ে পৰ্যটন ক্ষেত্ৰৰ প্ৰসাৰৰ বাবে যি স্থানতে গৈ উপস্থিত হয়, সেই স্থানেই বিশ্ববিখ্যাত হৈ পৰে বুলি উল্লেখ কৰে মন্ত্ৰীগৰাকীয়ে ।
সেয়েহে প্ৰধানমন্ত্ৰী নৰেন্দ্ৰ মোদীৰ যোৰহাট আৰু কাজিৰঙা আগমনে পৰ্যটন মানচিত্ৰত অসমত এক নতুন দিগন্তৰ সূচনা কৰিব বুলি তেওঁ কয় । ইয়াৰ লগতে পৰ্যটন ক্ষেত্ৰত সংস্থাপনৰ বাট আৰু অধিক মুকলি কৰিব বুলিও উল্লেখ কৰে । উল্লেখ্য যে ৮ আৰু ৯ মাৰ্চত দুদিনীয়া ভ্ৰমণসূচীৰে যোৰহাট আৰু কাজিৰঙালৈ আহিব প্ৰধানমন্ত্ৰী নৰেন্দ্ৰ মোদী ।
৮ মাৰ্চত প্ৰধানমন্ত্ৰী নৰেন্দ্ৰ মোদীয়ে কাজিৰঙা ৰাষ্ট্ৰীয় উদ্যানৰ আৰক্ষী অতিথিশালাত নৈশযাপন কৰিব আৰু ৯ মাৰ্চত প্ৰধানমন্ত্ৰীয়ে কাজিৰঙা ৰাষ্ট্ৰীয় উদ্যান পৰিদৰ্শন কৰিব । তাৰ পৰা গৈ তেওঁ যোৰহাটৰ হোলোঙাপাৰস্থিত লাচিত মৈদামত ১২৫ ফুট উচ্চতাৰ লাচিত বৰফুকনৰ ব্ৰঞ্জৰ প্ৰতিমূৰ্তি উন্মোচন কৰিব । তাৰ পিচত তেওঁ মেলেং মেটেলিত এক ৰাজহুৱা সভাত অংশগ্ৰহণ কৰিব ।
লগতে পঢ়ক :১০৫ টা বিধানসভা সমষ্টিত কাৰো মাতেই নাই, গজাল মাৰি দিয়া হৈছে : মুখ্যমন্ত্রী
