মৰাণ, 21 মে’:শাৰিৰীকঅসুস্থতাত ভুগিছে মাজুলীৰ শ্ৰীশ্ৰী উত্তৰ কমলাবাৰী সত্ৰৰ বুঢ়া ভকত পদ্মশ্ৰী গোপীৰাম বৰগায়ন । কাঁহ আৰু শ্বাসজনিত সমস্যাত ভুগি যোৱা 9 মে’ত ডিব্ৰুগড়ৰ অসম চিকিৎসা মহাবিদ্যালয় ভৰ্তি কৰোৱা হয় বুঢ়া ভকতগৰাকীক । অসম চিকিৎসা মহাবিদ্যালয়ৰ ICU ত চিকিৎসাধীন হৈ আছে পদ্মশ্ৰী গোপীৰাম বৰগায়ন । অসম চিকিৎসা মহাবিদ্যালয়ৰ জ্যেষ্ঠ চিকিৎসকৰ তত্ত্বাৱধানত চিকিৎসা চলিছে বুঢ়া ভকতগৰাকীৰ ।
পদ্মশ্ৰী গোপীৰাম বৰগায়ন বুঢ়া ভকতৰ উন্নত চিকিৎসাৰ ব্যৱস্থা গ্ৰহণ কৰিবলৈ নিৰ্দেশ দিছে মুখ্যমন্ত্ৰীয়ে । অসম চিকিৎসা মহাবিদ্যালয় কৰ্তৃপক্ষৰ লগতে স্বাস্থ্য বিভাগৰ বিষয়াক চিকিৎসাৰ ক্ষেত্ৰত সকলো ধৰণৰ সুবিধা প্ৰদান কৰিবলৈ মুখ্যমন্ত্ৰীয়ে নিৰ্দেশ দিয়া বুলি জানিব পৰা গৈছে । মুখ্যমন্ত্ৰীৰ নিৰ্দেশত সোমবাৰৰ নিশা AMCH ত মাজুলীৰ শ্ৰীশ্ৰী উত্তৰ কমলাবাৰী সত্ৰৰ বুঢ়া ভকত পদ্মশ্ৰী গোপীৰাম বৰগায়নৰ স্বাস্থ্যৰ বুজ ল'লে মন্ত্ৰী বিমল বড়াই ।
সাংস্কৃতিক আৰু উদ্যোগ বিভাগৰ মন্ত্ৰীগৰাকীয়ে নিশা অসম চিকিৎসা মহাবিদ্যালয়ত উপস্থিত হৈ পদ্মশ্ৰী গোপীৰাম বৰগায়ন বুঢ়া ভকতৰ স্বাস্থ্যৰ বুজ লোৱাৰ লগতে, চিকিৎসক তথা মহাবিদ্যালয় কৰ্তৃপক্ষৰ সৈতে তেওঁৰ চিকিৎসা সম্পৰ্কে আলোচনাত মিলিত হয় ।