গুৱাহাটী, 1 জুন : মূল্যবৃদ্ধিয়ে ৰামটাঙোন সোধাইছে সৰ্বসাধাৰণ জনতাৰ মূৰত । অত্যাৱশ্যকীয় সামগ্ৰীৰ মূল্যবৃদ্ধিয়ে জুৰুলা কৰি পেলাইছে সৰ্বসাধাৰণ ৰাইজক । সকলোবোৰ সামগ্ৰীৰ মূল্যবৃ্দ্ধি অব্যাহত থকাৰ মাজতে পুনৰ আহিল আন এবিধ অত্যাৱশ্যকীয় সামগ্ৰীৰ মূল্যবৃদ্ধিৰ খবৰ ।
বৃদ্ধি হ’ল গাখীৰৰ মূল্য :
এইবাৰ পুনৰ বৃদ্ধি পালে গাখীৰৰ মূল্য । গুৱাহাটীত গাখীৰৰ মূল্যবৃদ্ধিৰ সিদ্ধান্ত গ্ৰহণ কৰিছে বৃহত্তৰ গুৱাহাটী গো-পালক সন্থাই । প্ৰতিলিটাৰ গাখীৰত 9 টকাকৈ বৃদ্ধি কৰাৰ দাবী কৰিছে গো-পালক সন্থাই । আন আন সামগ্ৰীৰ মূল্যবৃদ্ধিৰ লগতে পশুখাদ্যৰ মূল্যবৃদ্ধি হোৱাৰ বাবে গাখীৰৰ মূল্যবৃদ্ধিৰ সিদ্ধান্ত গ্ৰহণ কৰা হৈছে বুলি জানিবলৈ দিয়ে সন্থাৰ মালিগাঁও শাখাৰ সাধাৰণ সম্পাদক নাৰায়ণ ভাণ্ডাৰীয়ে ।
পূৰ্বৰ মূল্য :
মহানগৰীত বৰ্তমান গাখীৰৰ পাইকাৰী মূল্য আছিল 56 টকা । গৰুৰ খুঁটিৰ পৰা দুগ্ধ ব্যৱসায়ীসকলে ক্ৰয় কৰি আনি বজাৰত 60-70 টকা পৰ্যন্ত বিক্ৰী কৰিছিল । বিগত তিনি মাহ ধৰি দুগ্ধ ব্যৱসায়ীসকলৰ লগত আলোচনা কৰি গাখীৰৰ পাইকাৰী মূল্য 65 টকা পৰ্যন্ত বৃদ্ধি কৰাৰ দাবী জনায় আহিছিল । কেবাবাৰো আলোচনাত মিলিত হৈছিল দুগ্ধ ব্যৱসায়ী আৰু গোপালকসকল ।
বৰ্ধিত মূল্য :
কিন্তু গো-পালকসকলৰ এই দাবী মানি লোৱা নাছিল দুগ্ধ ব্যৱসায়ীসকলে । যাৰ বাবে আজিৰে পৰা বজাৰত নিজাববীয়াকৈ 65 টকা প্ৰতিলিটাৰ গাখীৰ বিক্ৰীৰ ব্যৱস্থা কৰিছে গোপালকসকলে । যদি পৰৱৰ্তী সময়ত গোপালকসকলে এই দাবী মানি লয় তেতিয়া হ'লে ব্যৱসায়ীসকলক গাখীৰ দিব ।
উল্লেখ্য যে, লকডাউনৰ পূৰ্বে প্ৰতিলিটাৰ গাখীৰ 48 টকা হোৱাৰ পিছত লকডাউনৰ অন্তত দুই-টকা বৃদ্ধি হৈ 50 টকা হৈছিল ৷2022 ত তিনি টকা বৃদ্ধি হৈ 53 টকা পৰ্যন্ত বৃদ্ধি হৈছে । ইয়াৰ পিছত 2023 বৰ্ষত প্ৰতিলিটাৰ গাখীৰৰ 3 টকা মূল্য বৃদ্ধি কৰি 56 টকালৈ বৃদ্ধি কৰা হৈছিল ।
লগতে পঢ়ক:ধেমাজিত মূল্যবৃদ্ধিৰ বিৰুদ্ধে কৃষক মুক্তি সংগ্ৰাম সমিতিৰ প্ৰতিবাদ - Dhemaji KMSS protest
