গোৱালপাৰা, ২৩ জুন: গোৱালপাৰা জিলাৰ বিভিন্ন প্ৰান্তত অব্যাহত আছে হাতী-মানুহৰ সংঘাত । শনিবাৰে নিশা জিলাখনৰ ৰংজুলিৰ পণ্ডিতপাৰা গাঁৱত পুনৰ এগৰাকী লোকে প্ৰাণ হেৰুৱালে বনৰীয়া হাতীৰ আক্ৰমণত । হাতীৰ আক্ৰমণত নিহত হোৱা লোকজন পণ্ডিতপাৰা গাঁৱৰ সুভাষ চন্দ্ৰ ৰাভা (৪৫) বুলি চিনাক্ত কৰা হৈছে ।
গোৱালপাৰাত বন্যহস্তীৰ গচকত পুনৰ এজনৰ মৃত্যু (ETV Bharat Assam) জানিব পৰা মতে, শনিবাৰে নিশা বিদ্যুৎ নথকাত গৰমৰ বাবে ঘৰৰ সন্মুখৰ ৰাস্তাত ঠাণ্ডা বতাহ পাবলৈ ওলাই গৈছিল সুভাষ চন্দ্ৰ ৰাভা নামৰ লোকজন । ৰাস্তাৰ কাষেৰে ঘূৰি ফুৰি থাকোতে হঠাৎ মুখামুখি হয় এটা অকলশৰীয়া বনৰীয়া হাতীৰ সৈতে । হঠাতে প্ৰকাণ্ড বনৰীয়া হাতীৰ মুখামুখি হোৱাত হতভম্ব হৈ লোকজনে চিঞৰ-বাখৰ কৰাত বনৰীয়া হাতীটোৱে সুভাষক শুঁৰেৰে মেৰিয়াই ধৰি ভৰিৰে গচকি প্ৰাণ কাঢ়ি নি ওচৰৰে আন এঘৰৰ বাৰীত পেলাই থৈ যায় ।
লগতে পঢ়ক:হাতী-মানুহৰ সংঘাত: খাদ্যৰ যোগান ধৰি সংঘাত ৰোধৰ চেষ্টা বিহালীত
পৰৱৰ্তী সময়ত গাঁৱৰ ৰাইজ ওলাই আহি সুভাষ চন্দ্ৰ ৰাভাৰ মৃতদেহ প্ৰত্যক্ষ কৰি পৰিয়াল লোকক খবৰ দিয়াৰ লগতে বন বিভাগক অৱগত কৰোৱায় । নিশাই বন বিভাগৰ লোক আৰু ৰংজুলি আৰক্ষী ঘটনাস্থলীত উপস্থিত হৈ মৃতদেহটো ৰংজুলি থানালৈ লৈ আহে । উল্লেখ্য যে গাঁওখনৰ ভিতৰত অকলশৰীয়া বনৰীয়া হাতী এটা সোমাই থকাৰ কোনো সম্ভেদ পোৱা নাছিল গাঁওবাসীয়ে ৷
লগতে পঢ়ক:বনমন্ত্ৰী কিহত ব্যস্ত ? গোৱালপাৰাত হাতী-মানুহৰ সংঘাতে কি ৰূপ লৈছে জানেনে ?
পিচত স্থানীয় ৰাইজৰ সহযোগত বন বিভাগৰ লোকে অকলশৰীয়া বনৰীয়া হাতীটোক জংঘললৈ খেদি পঠিয়ায় । আনহাতে দেওবাৰে পুৱা সুভাষ চন্দ্ৰ ৰাভাৰ মৃতদেহ মৰণোত্তৰ পৰীক্ষাৰ বাবে গোৱালপাৰা অসামৰিক চিকিৎসালয়লৈ প্ৰেৰণ কৰা হয় । উল্লেখযোগ্য যে, সম্প্ৰতি গোৱালপাৰা জিলাৰ বিভিন্ন প্ৰান্তত বনৰীয়া হাতীৰ উপদ্ৰৱত ৰাইজে বিনিদ্ৰ ৰজনী কটাবলগীয়া হৈছে । বন বিভাগে বনৰীয়া হাতীৰ উপদ্ৰৱৰ স্থায়ী সমাধানৰ ব্যৱস্থা নকৰিলে ইয়াতকৈ ভয়াৱহ ঘটনা সংঘটিত হোৱাৰ সম্ভাৱনা ঘণীভূত হৈ পৰিছে জিলাখনত ।
লগতে পঢ়ক:গোলাঘাটত হাতী খেদিবলৈ শকতি নাই বনবিভাগৰ, ৰাইজেই কান্ধপাতি ল’লে দায়িত্ব
