গুৱাহাটী, 7 জুলাই : অসম চৰকাৰে এক নিৰ্দেশযোগে ৰাজ্যৰ আৰক্ষী প্ৰশাসনৰ শীৰ্ষ পৰ্যায়ত ব্যাপক ৰদ-বদল কৰিছে ৷ সেই অনুসৰি, কোকৰাঝাৰৰ (বি টি এ ডি) আই জি পি সত্যৰাজ হাজৰিকাক তিনিচুকীয়াৰ (এন ই আৰ) আই জি পি হিচাপে বদলি কৰা হৈছে ৷ লগতে তেওঁক যোৰহাটৰ (ই আৰ) অতিৰিক্ত দায়িত্ব দিয়া হৈছে ৷ আনহাতে আই জি পি (এম পি চি) বিবেক ৰাজ সিঙক কোকৰাঝাৰৰ আই জি পি হিচাপে অতিৰিক্ত দায়িত্ব প্ৰদান কৰা হৈছে ৷ সেইদৰে চি আই ডিৰ ডি আই জি পি ইন্দ্ৰানী বৰুৱাক চি ডব্লিউ আৰৰ ডি আই জি পি হিচাপে বদলি কৰা হৈছে ৷
মুখ্য কাৰ্যালয়ত সংলগ্ন হৈ থকা আৰক্ষী অধীক্ষক অংকুৰ জৈনক কাহিলিপাৰাৰ দশম অসম আৰক্ষী বাহিনীৰ অধিনায়ক হিচাপে বদলি কৰা হৈছে ৷ লখিমপুৰৰ আৰক্ষী অধীক্ষক অপৰ্ণা নটৰাজনক অসম আৰক্ষীৰ বিশেষ শাখাৰ আৰক্ষী অধীক্ষক হিচাপে বদলি কৰা হৈছে ৷ বৰপেটাৰ আৰক্ষী অধীক্ষক পংকজ যাদৱক ভিজিলেন্স এণ্ড এণ্টি ক'ৰাপচনৰ আৰক্ষী অধীক্ষক হিচাপে বদলি কৰা হৈছে ৷ পাণ্ডুৰ ৰে'লৱে পুলিচৰ অধীক্ষক অক্ষত গাৰ্গক চিৰাঙৰ আৰক্ষী অধীক্ষক হিচাপে বদলি কৰা হৈছে ৷
এ আই জি পি (ক্ৰীড়া) বেদান্ত মাধৱ ৰাজখোৱাক ভিজিলেন্স এণ্ড এণ্টি ক'ৰাপচনৰ আৰক্ষী অধীক্ষক হিচাপে বদলি কৰা হৈছে ৷ অসম আৰক্ষীৰ বিশেষ শাখাৰ আৰক্ষী অধীক্ষক মিহিৰজিৎ গায়নক লখিমপুৰৰ আৰক্ষী অধীক্ষক হিচাপে বদলি কৰা হৈছে ৷ ভিজিলেন্স এণ্ড এণ্টি ক'ৰাপচনৰ আৰক্ষী অধীক্ষক পবিন্দ্ৰ কুমাৰ নাথক একেটা বিভাগৰ আন এটা শাখাৰ আৰক্ষী অধীক্ষক হিচাপে বদলি কৰা হৈছে ৷ ভিজিলেন্স এণ্ড এণ্টি ক'ৰাপচনৰ আৰক্ষী অধীক্ষক সিংহৰাম মিলিক একেটা বিভাগৰে আন এটা শাখাৰ আৰক্ষী অধীক্ষক হিচাপে বদলি কৰা হৈছে ৷