শ শ পৰিয়ালৰ মুখত কেনেদৰে হাঁহি বিৰিঙাইছে জাগৃতিয়ে ?

বিভিন্ন কাৰণত গৃহহীন হোৱা, পৰিয়াল-পৰিজনৰ পৰা বিচ্ছিন্ন হোৱা বহু অশীতিপৰৰ আশ্রয়স্থল এই কেন্দ্রটো ।

লখিমপুৰ :মানৱীয় সকলো দিশক সংপৃক্ত কৰি জনহিতাৰ্থে কাম কৰা লখিমপুৰৰ এটা কেন্দ্র । এই কেন্দ্রটোৰ বাবে আজি শ শ পৰিয়ালৰ মুখত হাঁহি বিৰিঙিছে । গৃহহীনক আশ্ৰয়, নিচাসক্তক নিচামুক্ত, অনাথ শিশুৰ আশ্ৰয়, বয়োজ্যেষ্ঠৰ স্বাস্থ্যৰ যতনকে ধৰি জনহিতৈষী বহু কামেৰে জনমানসত উজলিছে কেন্দ্ৰটো । সম্প্ৰতি পদপথৰ ভিক্ষাৰীৰ বাবেও নতুন পদক্ষেপ গ্ৰহণ কৰিছে লখিমপুৰৰ জাগৃতি সন্মিলিত উন্নয়ন কেন্দ্রই ।

জাগৃতি সন্মিলিত উন্নয়ন কেন্দ্র

উল্লেখ্য যে সমাজৰ আৰ্তজনৰ পৰা আৰম্ভ কৰি বিভিন্ন স্তৰৰ লোকৰ বাবে কাম কৰিছে কেন্দ্রটোৱে । বিভিন্ন কাৰণত গৃহহীন হোৱা, পৰিয়াল-পৰিজনৰ পৰা বিচ্ছিন্ন হোৱা বহু অশীতিপৰৰ আশ্রয়স্থল এই কেন্দ্রটো । বৰবিহৰ কবলত পৰি একোটা পৰিয়ালক ধ্বংস কৰাৰ উপক্ৰম কৰা শ শ লোকক স্বাভাৱিক জীৱনলৈ ওভতাই অনাৰ ভৰসাৰ স্থল এই কেন্দ্রটো । কেন্দ্রটো নিষ্পাপ তথা পিতৃ-মাতৃৰ পৰিচয়হীন বহু দেৱশিশুৰ আশ্রয়স্থল । সমাজৰ প্ৰায় সকলো ক্ষেত্রতে জনসেৱাত ব্ৰতী এই কেন্দ্রটোৱে হ'ল জাগৃতি সন্মিলিত উন্নয়ন কেন্দ্র । জিলাখনৰ কেইগৰাকীমান সমাজহিতৈষী লোকৰ মানস পুত্রৰূপে জাগৃতিক ১৯৮২ চনতে প্ৰতিষ্ঠা কৰা হৈছিল । তেতিয়াৰে পৰা লখিমপুৰৰ উপৰিও ধেমাজি, ডিব্ৰুগড়, তিনিচুকীয়া আদি বিভিন্ন জিলালৈ প্ৰকল্প সম্প্ৰসাৰণ কৰি এক অগ্ৰণী সমাজ সেৱাৰ কেন্দ্রৰূপে জাগৃতিয়ে পৰিচয় দাঙি ধৰিছে ।

কেন্দ্ৰটোৰ কেইবাটাও বিভাগ আছে

কেন্দ্রটোৰ সম্পাদক গৌতম কুমাৰ শইকীয়াই কয়, "১৯৮২ চনতে গঠন হোৱা আৰু বঙালমৰাত মুখ্য কাৰ্যালয় থকা জাগৃতি সন্মিলিত উন্নয়ন কেন্দ্রৰ কেইবাটাও বিভাগ অন্তৰ্ভুক্ত কৰা হৈছে । নিৰাশ্ৰয় অশীতিপৰসকলক আশ্ৰয় দিয়া, নিচাসক্তক নিচামুক্ত কৰা, একোটা অঞ্চল সামৰি বয়োজ্যেষ্ঠজনৰ স্বাস্থ্যৰ আপডাল কৰা, অনাথ শিশুক আশ্ৰয় দিয়া আদি ভালেকেইটা বিভাগত কেন্দ্রটোৱে কাম কৰি আছে । লখিমপুৰত বিশেষ শিশু দত্তক কেন্দ্র, মানসিক ৰোগীৰ চিকিৎসা ও আশ্ৰয় আদিৰ কেন্দ্র গঢ়ি তুলি কাম কৰি থকা হৈছে । লখিমপুৰৰ উপৰিও ধেমাজি, ডিব্ৰুগড়, তিনিচুকীয়া আদিতো কেন্দ্রটোৰ শাখা স্থাপন কৰি জনসেৱা আগবঢ়োৱা হৈছে । অচিৰেই মাজুলীলৈও কেন্দ্রটোৰ শাখা সম্প্ৰসাৰণ কৰা হ'ব । ভাৰত চৰকাৰৰ সামাজিক ন্যায় আৰু সৱলীকৰণ তথা মহিলা আৰু শিশু বিকাশ মন্ত্রণালয়ৰ সহযোগত নিষ্ঠাৰে জনসেৱামূলক কামত ব্ৰতী হৈছো । আমি ভিক্ষাৰীসকলৰ বাবেও আঁচনি লৈছো । অচিৰেই গৃহহীন ভিক্ষাৰীসকলৰ বাবে আমি কাম কৰিম ।"

৪,৭৮০ গৰাকীয়ে লাভ কৰিছে চিকিৎসা

কেন্দ্রটোৰ অধীনত বৰ্তমান শতাধিক লোকক সংস্থাপিত কৰা হৈছে । ৪ সহস্রাধিক পৰিয়ালৰ মুখত হাঁহি বিৰিঙাইছে এই কেন্দ্রটোৱে । নিচামুক্তি আৰু পুনৰসংস্থাপন কেন্দ্রৰ আঁচনি সমন্বয়ক দুষ্মন্ত হাজৰিকাই এই সন্দৰ্ভত কয়, "জাগৃতি সন্মিলিত উন্নয়ন কেন্দ্রৰ নিচামুক্তি আৰু পুনৰ সংস্থাপন কেন্দ্রত এই পৰ্যন্ত ৪,৭৮০ গৰাকী লোকৰ চিকিৎসা কৰা হৈছে । ইয়াৰে প্ৰায় ৩,৫০০ গৰাকীয়ে এতিয়া স্বাভাৱিক জীৱন যাপন কৰিছে । প্ৰতি বছৰে এনে ২০০ লোকক সেৱা কৰাৰ লক্ষ্য লোৱা হৈছে । বছৰি এই কেন্দ্রৰ পৰা নিচামুক্ত হৈ ১৫০ ৰ পৰা ১৬০ লোক ওলাই যায় । কেন্দ্রৰ পৰা ওলাই যোৱাৰ পাছতো আমি তেওঁলোকক নিৰীক্ষণ কৰি থাকো ।"

চিকিৎসা, পৰিচৰ্যা, যোগ আদি বিভিন্ন পদ্ধতি অৱলম্বন কৰি নিচাসক্তসকলক নিচাৰ পৰা মুক্ত কৰা হয় । এজন পৰিচয়বিহীন নিচাসক্তই নিচামুক্ত হৈ কেন্দ্রটোতে বৰ্তমান কাম কৰি আছে । বৰ্তমান কেন্দ্রটোত এনে ১৫ গৰাকী নিচাসক্তৰ চিকিৎসা চলি থকা বুলি উল্লেখ কৰে সমন্বয়কগৰাকীয়ে ।

আৱাসীসকলৰ অতি আপোন জাগৃতি

ইফালে পৰিচালক মনোজ কুমাৰ ফুকনে কয়, "নিজৰ ঘৰতকৈও কেন্দ্রটোক বেছি আপোন কৰি লৈছে গৃহহীন একাংশ অশীতিপৰে । বৃদ্ধ-বৃদ্ধাৰ আশ্ৰয়স্থলৰূপে গঢ়ি তোলা হৈছে আশ্ৰয় নামৰ বিভাগটোক । ২০১৮ চনৰ পৰা আৰম্ভ কৰা আশ্ৰয়ত এই পৰ্যন্ত ১০৮ গৰাকী লোকে আশ্ৰয় গ্রহণ কৰিছে ৷ বৰ্তমান সময়ত ২৪ গৰাকী লোকে ইয়াত আশ্ৰয় গ্রহণ কৰি আছে ।"

আনহাতে আশ্ৰয়ত থাকি আৰু তাত লাভ কৰা সেৱাৰ পৰা আনন্দিত আৱাসীসকল । এৰি অহা নিজৰ ঘৰখনতকৈয়ো আশ্ৰয় বেছি ভাল বুলিহে তেওঁলোকে স্বীকাৰ কৰিছে । গৃহহীনক আশ্ৰয় দি, নিচাসক্তক নিচামুক্ত কৰি, অনাথ শিশুক আশ্ৰয় দি নাইবা সন্তানহীনৰ কোলাত এটি সন্তান তুলি দি শ শ পৰিয়ালৰ মুখত হাঁহি বিৰিঙাইছে লখিমপুৰৰ জাগৃতিয়ে । যাৰ বাবে জনসেৱাৰ ক্ষেত্রত বে-চৰকাৰী খণ্ডত অগ্ৰণী অনুষ্ঠান হিচাপে পৰিগণিত হৈছে জাগৃতি সন্মিলিত উন্নয়ন কেন্দ্র ।

লগতে পঢ়ক :গ্ৰন্থমেলাত কেতিয়াও নেদেখা দৃশ্য: পূৰ্বে কোনেও নকৰা কাম কৰিলে কলিয়াবৰ গ্ৰন্থমেলাই - KALIABOR BOOK FAIR