গুৱাহাটী :ৰাজহ বিভাগৰ সংস্কাৰ সাধনেৰে অসম চৰকাৰে গ্ৰহণ কৰা দুটাকৈ অভিলাষী পদক্ষেপ হৈছে ‘‘ই-ডীড’’ আৰু ৰাজহ সম্পৰ্কীয় গোচৰ নিষ্পত্তিৰ নতুন ব্যৱস্থা । ইয়াৰে ই-ডীড ব্যৱস্থাই সম্পত্তি লেনদেনৰ পঞ্জীয়ন প্ৰক্ৰিয়া সৰল, সুৰক্ষিত আৰু সুশৃংখলিত কৰিব ।
আনহাতে ৰাজহ সম্পৰ্কীয় গোচৰ নিষ্পত্তি ব্যৱস্থা আগতে ৰাজহ আদালতত মেন্যুৱেলি আছিল । কিন্তু নতুন ব্যৱস্থাৰ দ্বাৰা প'ৰ্টেলৰ যোগেদি হ'ব । ফলত ৰাজহ সম্পৰ্কীয় গোচৰ ঘৰতে বহি পঞ্জীয়ন কৰিব পৰা যাব ।
অলপতে মুখ্যমন্ত্ৰী ড৹ হিমন্ত বিশ্ব শৰ্মাই এই দুয়োটা নতুন ব্যৱস্থাৰ শুভাৰম্ভণী কৰে । ৰাজহ বিভাগৰ এই দুয়োটা ব্যৱস্থাৰ যোগেদি সাধাৰণ জনতা কিদৰে উপকৃত হ'ব । সেই সন্দৰ্ভত এক বিশেষ প্ৰতিবেদন ।
- নতুন ই-ডীড ব্যৱস্থা :
সম্পত্তিৰ লেনদেনৰ বাবে ডীড কৰাৰ ব্যৱস্থা আগতে মেন্যুৱেলি আছিল । যাৰ ফলত যথেষ্ট সমস্যাৰ সৃষ্টি হৈছিল । বহু সময়ত দলিল হেৰাই যায় নাইবা নথি পত্ৰৰ ক্ষেত্ৰত সমস্যাৰ সৃষ্টি হয় । যাৰ বাবে প'ৰ্টেলৰ ব্যৱস্থা কৰা হৈছে । ইয়াৰ দ্বাৰা অনলাইনতে ডীড কৰিব পৰা যাব ।
অসম চৰকাৰৰ ৰাজহ আৰু দুৰ্যোগ ব্যবস্থাপনা বিভাগৰ দ্বাৰা প্ৰৱৰ্তন কৰা এই উল্লেখনীয় পদক্ষেপ হৈছে ই-ডীড । ই-ডীড হৈছে সম্পত্তি লেনদেনৰ পঞ্জীয়ন প্ৰক্ৰিয়া সৰল, সুৰক্ষিত আৰু সুশৃংখলিত কৰাৰ উদ্দেশ্যে ডিজিটেল দলিল ব্যৱস্থা ।
ই-ডীড ব্যৱস্থাৰ মূল সুবিধাসমূহ হৈছে কাগজ বিহীন আৰু ডিজিটেল প্ৰক্ৰিয়া । নথি সংৰক্ষণৰ সুবিধা । স্বচ্ছ আৰু নিকা ব্যৱস্থা । এই ই-ডীড ব্যৱস্থাই নাগৰিকসকলৰ বাবে আইনী সেৱাৰ সুলভতা আৰু কাৰ্যক্ষমতা বৃদ্ধিৰ ক্ষেত্ৰত এক উল্লেখযোগ্য পদক্ষেপ হিচাপে চিহ্নিত হ'ব ।
ই নাগৰিকসকলৰ তেওঁলোকৰ দলিলসমূহ ডিজিটেলভাৱে প্ৰস্তুত, স্বাক্ষৰ আৰু সংৰক্ষণ কৰিবলৈ সক্ষম কৰিব । ইয়াৰ দ্বাৰা প্ৰচলিত কাগজ-পত্ৰৰ জটিল প্ৰক্ৰিয়াটো সৰল হৈ পৰিব । ই-ডীডৰ জৰিয়তে জনসাধাৰণৰ চৰকাৰী কাৰ্যালয়লৈ অহা-যোৱা কৰাৰ প্ৰয়োজনীয়তা কমিব, নাগৰিকসকলে যিকোনো ঠাইৰ পৰা আইনী নথি-পত্ৰ প্ৰস্তুত কৰাত সহজ হ'ব লগতে সময় ৰাহি হ'ব আৰু আমোলাতান্ত্ৰিক মেৰপেচ হ্ৰাস হ'ব ।
ই-ডীড প্লেটফৰ্মটো ব্যৱহাৰকাৰীৰ অনুকূলভাৱে প্ৰস্তুত কৰা হৈছে । যাতে বিভিন্ন স্তৰৰ ডিজিটেল সাক্ষৰতা থকা ব্যক্তিসকলে সহজেই প্ৰৱেশ আৰু লেনদেন কৰিব পাৰিব । এই ব্যৱস্থাই আইনী নথি-পত্ৰ সংৰক্ষণ আৰু পুনৰীক্ষণৰ বাবে সুৰক্ষিত পৰিৱেশ প্ৰদান কৰিব ।
প্ৰামাণ্যতা নিশ্চিত কৰিব আৰু প্ৰবঞ্চনাৰ আশংকা হ্ৰাস কৰিব । এই প্লেটফৰ্মটো মোবাইল আৰু কম্পিউটাৰ দুয়োটাতেই উপলব্ধ । এই ব্যৱস্থাটো যিহেতু সম্পূর্ণ ডিজিটেল আৰু কাজগৰ ব্যৱহাৰ প্ৰায় শূণ্য, পৰিৱেশৰ ওপৰতো এক ভাল অৰিহনা যোগাব ।
ই-ডীড ব্যৱস্থাটো ৰাজহুৱা সেবাসমূহ ডিজিটেলাইজড কৰাৰ, প্ৰশাসন ব্যৱস্থা উন্নত কৰাৰ আৰু নাগৰিকৰ বাবে অধিক কাৰ্যক্ষম, স্বচ্ছ আৰু জবাবদিহি ব্যৱস্থা গঢ়ি তোলাৰ বহল দৃষ্টিভংগীৰ এক অংশ । ৰাজহুৱা সেৱা প্ৰদানৰ আধুনিকীকৰণৰ লক্ষ্যেৰে চলি থকা ডিজিটেলাইজেচন প্ৰক্ৰিয়াৰ ই এটা পদক্ষেপ ।
সময়ৰ লগে লগে প্লেটফৰ্মৰ কাৰ্যক্ষমতা আৰু ব্যৱহাৰকাৰীৰ অভিজ্ঞতা উন্নত কৰিবলৈ নাগৰিকৰ পৰা মতামত বিচাৰি ইয়াৰ ওপৰত কাম কৰা হ'ব । যাতে এই ব্যৱস্থা আৰু অধিক কাৰ্যক্ষম, সুৰক্ষিত আৰু ব্যৱহাৰকাৰীৰ অনুকূল কৰিব পাৰি ।
- ৰাজহ আদালতৰ গোচৰ ব্যৱস্থাপনা প্ৰণালী :
ৰাজহ বিভাগৰ আন এটা ডাঙৰ সংস্কাৰ হৈছে ৰাজহ আদালতৰ গোচৰ ব্যৱস্থাপনা প্ৰণালী প্ৰৱৰ্তন । ৰাজহ সম্পৰ্কীয় গোচৰ নিষ্পত্তি ব্যৱস্থা আগতে ৰাজহ আদালতত মেন্যুৱেলি আছিল । কিন্তু এতিয়াৰে পৰা ইয়াক অনলাইনৰ মাধ্যমেৰে প'ৰ্টেলৰ যোগেদি কৰাৰ ব্যৱস্থা কৰা হৈছে । ইয়াৰ ফলত ৰাজহ সম্পৰ্কীয় গোচৰ ঘৰতে বহি পঞ্জীয়ন কৰিব পৰা যাব ।
গোচৰৰ সিদ্ধান্ত প'ৰ্টেলতে সংৰক্ষিত হ'ব । ৰাজহ আদালতৰ গোচৰ ব্যৱস্থাপনা প্ৰণালী ৰাজ্যত এক স্বচ্ছ, দক্ষ আৰু নাগৰিক কেন্দ্ৰিক ৰাজহ প্ৰশাসন ব্যৱস্থা বাস্তৱায়িত কৰাৰ দিশত গুৰুত্বপূৰ্ণ পদক্ষেপ । ৰাজহ আদালতৰ গোচৰ ব্যৱস্থাপনা প্ৰণালী সুশৃংখল আৰু আধুনিকীকৰণ, গোচৰসমূহৰ দ্ৰুত নিষ্পত্তি, বিলম্ব হ্ৰাস আৰু সামগ্ৰিক দক্ষতা উন্নত কৰাৰ বাবে এই প'ৰ্টেলটোআৰম্ভ কৰা হৈছে ।
এই ছফ্টৱেৰটো বিকাশ কৰাৰ প্ৰাথমিক উদ্দেশ্য হৈছে এক বিস্তৃত অনলাইন প্লেটফৰ্ম উপলব্ধ কৰা । যিয়ে ৰাজহ আদালতৰ কামসমূহৰ সকলো দিশ কাৰ্যকৰীভাৱে নিয়ন্ত্ৰণ কৰিব পাৰে আৰু MIS জেনেৰেট কৰিব পাৰে৷ ছফ্টৱেৰটোৱে গোচৰ ব্যৱস্থাপনাৰ বাবে এক উপযুক্ত প্লেটফৰ্ম প্ৰদান কৰি গোচৰ দাখিল, নথি সংৰক্ষণ, তথ্য বিশ্লেষণ, প্ৰতিবেদন আৰু সিদ্ধান্ত গ্ৰহণ কৰাৰ সুবিধা প্ৰদান কৰিব ।
সঠিক-সময়ৰ তথ্য লাভ কৰা, গোচৰৰ অগ্ৰগতি ট্ৰেক কৰা, আদালতৰ সিদ্ধান্ত লাভ কৰা আৰু উচ্চ আদালতৰ কাষলৈ যোৱাৰ বাবে অৱগত হৈ সিদ্ধান্ত লোৱাৰ ক্ষেত্ৰতো এই ব্যৱস্থাই নাগৰিকসকলক সহায় কৰিব ।