শিলচৰ, ১৩ জুলাই:শুকুৰবাৰে নিশা শিলচৰ চহৰত সংঘটিত হয় এক ভয়ংকৰ হিট এণ্ড ৰাণৰ ঘটনা । সুৰাৰ ৰাগীত মাতাল হৈ এগৰাকী মিজো চালকে নিশা চহৰখনত চলাই তাণ্ডৱ । সুৰামত্ত চালকে ব'লেৰ' বাহনেৰে মহতিয়াই নিয়ে কেইবাখনো বাহনসহ এজন এজনকৈ প্ৰায় ১০ জনক পথচাৰীক । ঘটনাত গুৰুতৰভাৱে আহত এজন । উত্তেজিত ৰাইজে ভাঙি চূৰমাৰ কৰে ব'লেৰ' বাহনখন ।
জানিব পৰা মতে, নিশা চহৰৰ চদৰঘাট অঞ্চলত এগৰাকী মিজো চালকে সুৰা ৰাগীত মাতাল হৈ ব'লেৰ' বাহনখনেৰে প্ৰথমে তিনিগৰাকী পথচাৰীক মহতিয়াই নিয়ে ৷ ঘটনা সংঘটিত কৰিয়ে চহৰৰ মাজেৰে পলায়নৰ চেষ্টা কৰোতেই বাহনখনে ৰাজপথত থকা কেইবাখনো বাহনসহ ইজনৰ পাচত সিজনকৈ লোকক খুন্দিয়াই দ্ৰুতগতিত আগবাঢ়ি যায় । ঘটনা প্ৰত্যক্ষ কৰি একাংশ যুবকে ঘাটক বাহনখনৰ পিছে পিছে খেদি যায় ৷ এটা সময়ত বাহনখন চহৰৰ পাৰ্কৰোডৰ ৰাজপথত থকা প্ৰকাণ্ড গাঁতৰ বাবে ৰাজপথতে আৱদ্ধ হৈ পৰে ।
লগে লগে উত্তেজিত ৰাইজে বাহনখন ভাঙি চূৰমাৰ কৰে । লগতে উপস্থিত ৰাইজে বাহনখনৰ পৰা উদ্ধাৰ কৰে কেইবা কাৰ্টন সুৰাৰ বটল । আনহাতে ঘটনাৰ খবৰ পোৱাৰ মাত্ৰকে ঘটনাস্থলীত আৰক্ষী উপস্থিত হৈ পৰিস্থিতি নিয়ন্ত্ৰণ কৰাৰ লগতে বাহনখনৰ চালকক আটক কৰি থানালৈ লৈ যায় । ধৃত চালকজন মিজোৰামৰ আইজলৰ বাসিন্দা বুলি জানিব পৰা গৈছে । প্ৰত্যক্ষদৰ্শীয়ে জনোৱা অনুসৰি, বাহনখনত চালকজনৰ লগত থকা আন এজন লোকে পৰিস্থিতি বিষম দেখি পলায়ন কৰে ।