গুৱাহাটী : অহা ফেব্ৰুৱাৰীত গুৱাহাটীত অনুষ্ঠিত হ'ব এডভাণ্টেজ অসমৰ দ্বিতীয় সংস্কৰণ তথা এডভাণ্টেজ অসম ২.০। বিশ্ব বিনিয়োগৰ এই বিয়াগোম সন্মিলনৰ প্ৰচাৰৰ বাবে শনিবাৰৰ পৰা মুম্বাইত বাহৰ পাতিছে মুখ্যমন্ত্ৰী ড৹হিমন্ত বিশ্ব শর্মাই । তিনিদিনৰ বাবে মুম্বাইত বাহৰ পতা মুখ্যমন্ত্রীগৰাকীয়ে এডভাণ্টেজ অসম ২.০ সন্মিলনত অংশগ্ৰহণ কৰাৰ বাবে বহুকেইগৰাকী বিশিষ্ট ব্যক্তিক সাক্ষাৎ কৰাৰ উপৰি অহা ৬ জানুৱাৰীত এটা ৰোড শ্ব’ত অংশগ্ৰহণ কৰিব ।
টাটা কোম্পানীৰ অধ্যক্ষৰে আলোচনা :
শনিবাৰে মুম্বাইত উপস্থিত হোৱাৰ পাছতেই মুখ্যমন্ত্রী হিমন্ত বিশ্ব শৰ্মাই টাটা কোম্পানীৰ অধ্যক্ষ এন চন্দ্ৰশেখৰণৰ লগতে টাটা গ্ৰুপৰ বিভিন্ন কোম্পানীৰ মুখ্য কাৰ্যবাহী বিষয়া আৰু প্ৰতিনিধিসকলৰ সৈতে বৈঠকত মিলিত হয় । এই বৈঠকত মুখ্যমন্ত্ৰীগৰাকীয়ে অসমত ৰূপায়ণ কৰা তথা অনাগত দিনত ৰূপায়ণ কৰিবলগীয়া টাটা গ্রুপৰ প্ৰকল্পসমূহৰ সন্দৰ্ভত আলোচনা কৰে । লগতে ২৪ আৰু ২৫ ফেব্ৰুৱাৰীত গুৱাহাটীত অনুষ্ঠিত হ'বলগীয়া এডভাণ্টেজ অসমৰ দ্বিতীয় সংস্কৰণত টাটা গ্রুপক অংশগ্ৰহণ কৰাৰ বাবে নিমন্ত্রণ জনায় ।
দেওবাৰে দ্বিতীয় দিনা মুখ্যমন্ত্রীগৰাকীয়ে মুম্বাইৰ কেইবাটাও বৃহৎ ব্যৱসায়ীক গোষ্ঠীৰ মুৰব্বীক সাক্ষাৎ কৰে । মুখ্যমন্ত্ৰীয়ে আজি মুম্বাইত এইচ ডি এফ চি বেংকৰ পৰিচালন সঞ্চালক আৰু মুখ্য কাৰ্যবাহী বিষয়া শশীধৰ জগদীশন আৰু এইচ ডি এফ চি বেংকৰ উপ-পৰিচালন সঞ্চালক কাইজাড ভাৰুচাক সাক্ষাৎ কৰি অসমৰ বিকাশৰ গতিৰ লগত জড়িত হোৱা বিভিন্ন বিষয়ত আলোচনা কৰে । লগতে আগন্তুক এডভাণ্টেজ অসম ২.০ সন্মিলনৰ অংশ হ'বলৈ তেওঁলোকক আমন্ত্ৰণ জনায় ।
হিন্দুস্তান ইউনিলিভাৰৰ মুখ্য কাৰ্যবাহী বিষয়াক সাক্ষাৎ :
ইয়াৰ পিছত মুখ্যমন্ত্ৰীগৰাকীয়ে মুম্বাইত হিন্দুস্তান ইউনিলিভাৰৰ মুখ্য কাৰ্যবাহী বিষয়া ৰোহিত জৱাক সাক্ষাৎ কৰি অসমৰ চাহ উদ্যোগক আৰু অধিক বিকশিত কৰাৰ উপায় সন্দৰ্ভত এক ফলপ্ৰসূ আলোচনাত মিলিত হয় । লগতে তেওঁৰ সৈতে আগন্তুক এডভাণ্টেজ অসম ২.০ সন্মিলনত নিজৰ উপস্থিতি সাব্যস্তৰ কথা বিবেচনা কৰিবলৈ মুখ্যমন্ত্রীয়ে অনুৰোধ জনায় ।
আনহাতে, মুম্বাইত মুখ্যমন্ত্ৰী হিমন্ত বিশ্ব শৰ্মাই আজি লক্ষ্মী টীৰ পৰিচালন সঞ্চালক ৰুদ্ৰ চেটাৰ্জীক সাক্ষাৎ কৰি আগন্তুক এডভাণ্টেজ অসম ২.০ শীৰ্ষ সন্মিলনলৈ আমন্ত্ৰণ জনায় । সেইদৰে ৱেলছপুন গ্ৰুপৰ অধ্যক্ষ বি কে গোৱেংকাৰ লগতে অন্যান্য বিষয়াবৰ্গ কপিল মহেশ্বৰী, সন্দীপ গাৰ্গ আৰু উপদীপ সিং চত্ৰথক সাক্ষাৎ কৰি আগন্তুক এডভাণ্টেজ অসম সন্মিলনলৈ আমন্ত্ৰণ জনায় ।