গুৱাহাটী: অসম আৰক্ষীৰ বিদায়ী সঞ্চালক প্ৰধান জি পি সিঙে আজি আনুষ্ঠানিকভাৱে দায়িত্বভাৰ অৰ্পণ কৰিলে ভাৰপ্ৰাপ্ত আৰক্ষী সঞ্চালক প্ৰধান হৰমীত সিঙক । অসম আৰক্ষীৰ মুখ্য কাৰ্যালয়ত আজি বিয়লি আয়োজন কৰা এক অনুষ্ঠানত জি পি সিঙে অসম আৰক্ষীৰ সঞ্চালক প্ৰধানৰ দায়িত্বভাৰ হৰমীত সিঙক অৰ্পন কৰে ।
এক আবেগিক পৰিৱেশৰ মাজত সতীৰ্থসকলৰ বিদায় সম্ভাষণ গ্ৰহণ কৰি কাৰ্যালয়ৰ পৰা সপৰিয়ালে ওলাই যাই জি পি সিং । কাৰ্যালয়ৰ পৰা ওলাই যোৱাৰ সময়ত বিষয়া-কৰ্মচাৰীসকলে ফুলেৰে বিদায় জনাই জি পি সিঙক । দায়িত্বভাৰ অপৰ্ণ কৰি আজি সন্ধিয়া সপৰিয়ালে নতুন দায়িত্ব গ্ৰহণৰ বাবে দিল্লী অভিমুখে ৰাওনা হয় জি পি সিং ।
অসম আৰক্ষীৰ ভাৰপ্ৰাপ্ত সঞ্চালক প্ৰধান হিচাপে দায়িত্ব ল'লে হৰমীত সিঙে (ETV Bharat Assam) আজিৰে পৰা অসম আৰক্ষীৰ ভাৰপ্ৰাপ্ত সঞ্চালক প্ৰধান হিচাপে দায়িত্ব গ্ৰহণ কৰিলে হৰমীত সিঙে । উল্লেখ্য যে চি আৰ পি এফৰ সঞ্চালক প্ৰধানৰূপে জি পি সিঙে দায়িত্ব লাভ কৰাৰ পাছতে ৰাজ্যৰ গৃহ বিভাগে ভাৰপ্ৰাপ্ত আৰক্ষী সঞ্চালক প্ৰধানৰ দায়িত্ব দিয়ে অতিৰিক্ত আৰক্ষী সঞ্চালক প্ৰধান হৰমীত সিঙক ।
দায়িত্ব অৰ্পন (ETV Bharat Assam) আজি অসম আৰক্ষীৰ ভাৰপ্ৰাপ্ত সঞ্চালক প্ৰধানৰূপে দায়িত্বভাৰ গ্ৰহণ কৰা হৰমীত সিং ১৯৯২ বৰ্ষৰ অসম-মেঘালয় কেডাৰৰ আই পি এছ বিষয়া । গৃহ বিভাগৰ নিৰ্দেশমৰ্মে পৰৱৰ্তী সময়ত এগৰাকী স্থায়ী আৰক্ষী সঞ্চালক প্ৰধান নাইবা নতুন নিৰ্দেশনা নিদিয়ালৈকে সিঙে এই ভাৰপ্ৰাপ্ত দায়িত্ব বহন কৰিব । হৰমীত সিঙে গুৱাহাটীৰ আৰক্ষী আয়ুক্তৰ দৰে গুৰুত্বপূৰ্ণ পদৰ লগতে অসম আৰক্ষীৰ আন ভালেমান গুৰুত্বপূৰ্ণ পদবীত কাৰ্যনিৰ্বাহ কৰি আহিছে ।
দায়িত্ব গ্ৰহণ কৰিলে হৰমীত সিঙে (ETV Bharat Assam) ১৯৯২ চনত ভাৰতীয় আৰক্ষী সেৱাত যোগদান কৰি সিঙে ১৯৯৮ চনলৈকে অসমত কটায় । মঙলদৈৰ অতিৰিক্ত আৰক্ষী অধীক্ষক হিচাপে কাৰ্যনিৰ্বাহ কৰি বোকাখাতৰ এছ ডি পি অ’, অসমৰ ৰাজ্যপালৰ এ ডি চি আৰু নগাঁৱৰ আৰক্ষী অধীক্ষকৰূপেও তেওঁ কাৰ্যনিৰ্বাহ কৰিছিল । ১৯৯৮ চনৰ পৰা ২০১৭ চনলৈকে সিঙে ডেপুটেচনত ভাৰত চৰকাৰৰ বিভিন্ন পদবীত সেৱা আগবঢ়াইছিল ।
জি পি সিঙক বিদায় (ETV Bharat Assam) এই সূত্ৰে তেওঁ দিল্লী, ছিকিমৰ গেংটক, ৰাছিয়াৰ মস্কো আৰু জম্মু-কাশ্মীৰৰ শ্ৰীনগৰকে ধৰি বিভিন্ন ঠাইতো সেৱা আগবঢ়াইছিল । সংঘাতজৰ্জৰ অঞ্চলৰ সমস্যাৰ সমাধান, সন্ত্ৰাসবাদ বিৰোধী, মৌলবাদ বিৰোধী, চাইবাৰ নিৰাপত্তা আৰু আন্তঃগাঁথনি, নিৰাপত্তা আৰু সুৰক্ষা প্ৰশাসন, মেগা ইভেণ্ট মেনেজমেণ্ট, দুৰ্যোগ-মহামাৰী সাহায্য আৰু যোগাযোগ-নাগৰিককেন্দ্ৰিক আন্তঃগাঁথনি বিকশিত কৰাত বিশেষজ্ঞৰূপে সুনাম আছে হৰমীত সিঙৰ ।
বিদায় জনালে অসমক (ETV Bharat Assam) ইযাৰ উপৰি কৰ্মদক্ষতা আৰু বীৰত্বৰ বাবে ভালেমান গুৰুত্বপূৰ্ণ পদকেৰে অলংকৃত হৈছে হৰমীত সিঙে । গেলেণ্টাৰী আৰক্ষী পদক, বিশিষ্ট সেৱাৰ বাবে ৰাষ্ট্ৰপতিৰ আৰক্ষী পদক, মেধাৱী সেৱাৰ বাবে ভাৰতীয় আৰক্ষী পদক, অতি উৎকৃষ্ট সেৱা পদক আদি লাভ কৰি আহিছে নতুন ভাৰপ্ৰাপ্ত আৰক্ষী সঞ্চালক প্ৰধানগৰাকীয়ে । আজিৰে পৰা অসম আৰক্ষীৰ সঞ্চালক প্ৰধান হিচাপে তেওঁ সেৱা আগবঢ়াব ।
