জোনাই, ৩১ জুলাই : এক আগষ্টৰ পৰা পুনৰ আৰম্ভ হ’ব বিদ্যালয়সমূহৰ পাঠদান ৷ গৰমবন্ধ শেষ হোৱাৰ লগে লগে বিদ্যালয়সমূহ চাফ-চিকুণ কৰি পুনৰ পাঠদানৰ বাবে সাজু কৰি তুলিছে শিক্ষকসকলে ৷ কিন্তু জোনাইৰ এখন চৰকাৰী বিদ্যালয়ৰ দুৰৱস্থাই প্ৰতিফলিত কৰিছে চৰকাৰী বিদ্যালয়ৰ আন্তঃগাঁথনি ৷
এটা জৰাজীৰ্ণ জুপুৰিত বছৰ বছৰ ধৰি পাঠদান অব্যাহত ৰখা হৈছে ৷ বিদ্যালয়খন হ’ল জোনাইৰ ২নং বেৰামাজগাঁও প্ৰাথমিক বিদ্যালয় ৷ ২০১৩ চনতে চৰকাৰী হোৱা বিদ্যালয়খনৰ দুৰৱস্থা চাই অভিভাৱকে কেনেকৈ নিজৰ সন্তানক বিদ্যালয়লৈ পঠিয়াব তাক লৈও চিন্তা কৰিবলগীয়া হৈছে ৷
এটা সৰু ভগা-চিগা বাহঁৰ বেৰাৰে আৱৰা, দুখনমান ডেস্ক-বেঞ্চ, এখন ভগা বেক্ল ব’ৰ্ড লৈ প্ৰথম শ্ৰেণীৰ পৰা পঞ্চম শ্ৰেণীলৈকে পাঠদান অব্যাহত ৰখা হৈছে ৷ বিদ্যালখনত ৩৪ গৰাকী শিক্ষাৰ্থী থকাৰ বিপৰীতে শিক্ষক আছে দুগৰাকী ৷ তদুপৰি বিদ্যালয়খনত থকা অংগনৱাড়ী কেন্দ্ৰতো আছে ১৪-১৫ গৰাকীমান শিশু ৷ এটা শ্ৰেণীৰ পাঠদান কৰিলে বাকী চাৰিটা শ্ৰেণী ৰৈ থাকিবলগীয়া হয় শ্ৰেণীকোঠাৰ অভাৱত ৷ আনহাতে বেঞ্চৰ নাটনিৰ ফলত মাটিত বস্তা পাৰিও বহুৱাবলগীয়া হয় ছাত্ৰ-ছাত্ৰীক ৷
বিদ্যালয়খনত নাই ৰান্ধনীগৃহও ৷ এখন চালি দি ৰান্ধিবলগীয়া হৈছে মধ্যাহ্ন ভোজনৰ আহাৰ ৷ খাদ্য সামগ্ৰী ৰাখিবলগীয়া হয় শৌচাগাৰতে ৷ ইফালে বৰষুণ দিলে বিদ্যালয়খন বন্ধ ৰাখিবলগীয়া হয় বুলি জানিবলৈ দিছে শিক্ষকসকলে ৷