গুৱাহাটী, ৫ জুলাই : গুৱাহাটী বিশ্ববিদ্যালয়ে আন এক সাফল্য়ৰে পুনৰ জিলিকি উঠিছে । উত্তৰ পূৰ্বাঞ্চলৰ উচ্চ শিক্ষাৰ অন্যতম মহৎ প্ৰতিষ্ঠান হিচাপে পৰিগণিত ঐতিহ্যমণ্ডিত গুৱাহাটী বিশ্ববিদ্যালয়ে শেহতীয়াভাৱে এক সু-খবৰ কঢ়িয়াই আনিছে । উল্লেখ্য যে ঐতিহ্যমণ্ডিত গুৱাহাটী বিশ্ববিদ্যালয়ে ৰাষ্ট্রীয় মূল্যাংকণ আৰু প্ৰত্যায়ন পৰিষদৰ (নাক) মূল্যায়ন আৰু স্বীকৃতিৰ চতুৰ্থ চক্ৰত এ+ গ্ৰেড লাভ কৰিবলৈ সক্ষম হয় । এই খবৰে বিশ্ববিদ্যালয় পৰিয়ালৰ মাজত উৎসাহৰ ধল বোৱাই আহিছে ।
উল্লেখ্য যে শুক্ৰবাৰে সন্ধিয়া গুৱাহাটী বিশ্ববিদ্যালয়ৰ পঞ্জীয়ক গৰাকীয়ে এক বিবৃতি যোগে উল্লেখ কৰা মতে, 'নাক' কৰ্তৃপক্ষই আজি সন্ধিয়া নাকৰ মূল্যায়ন আৰু স্বীকৃতিৰ চতুৰ্থ চক্ৰত এ+ গ্ৰেড প্ৰদান কৰাৰ কথা আনুষ্ঠানিক ভাবে ঘোষণা কৰে । নাকে প্ৰদান কৰা মূল্যায়ন অনুসৰি গুৱাহাটী বিশ্ববিদ্যালয়ে বিশেষ সফলতা কঢ়িয়াই অনা বাবে বিশ্ববিদ্যালয়খনৰ উপাচাৰ্য অধ্যাপক ড৹ প্ৰতাপ জ্যোতি সন্দিকৈয়ে বিশ্ববিদ্যালয় পৰিয়ালবৰ্গক অভিনন্দন জ্ঞাপন কৰে । লগতে গুৱাহাটী বিশ্ববিদ্যালয়ৰ অধ্যাপক ড৹ ননীগোপাল মহন্তই গুৱাহাটী বিশ্ববিদ্যালয়ে এনে গৌৰৱ কঢ়িয়াই অনা বাবে শিক্ষানুষ্ঠানখনৰ উপাচাৰ্যকে ধৰি বিশ্ববিদ্যালয়খনৰ আই কিউ এ চি, শিক্ষক-শিক্ষয়িত্ৰী, ছাত্ৰ-ছাত্ৰী তথা অনা শিক্ষক-কৰ্মচাৰী সকলক অভিনন্দন জনায় ।