নগাঁও,২৮ ছেপ্টেম্বৰ: নগাঁৱৰ ধিঙৰ এগৰাকী কিশোৰী ধৰ্ষণৰ ঘটনাই সমগ্ৰ ৰাজ্য জোকাৰি যোৱাৰ সময়ত পুনৰ আন এক ভয়ংকৰ ঘটনা সংঘটিত হৈছে নগাঁও জিলাতেই । এইবাৰ ঘটনাৰ স্থান নগাঁৱৰ ৰূপহীহাট । নগাঁৱৰ ৰূপহীহাট আৰক্ষী থানাৰ এলেকাধীন কাছখাইটিৰ ইমৰান হুছেইন নামৰ এজন লোকে দীৰ্ঘদিনৰ পৰাই নিজা বাসগৃহত চলাই আহিছিল তন্ত্ৰ-মন্ত্ৰৰ চিকিৎসা । কিন্তু তন্ত্ৰ-মন্ত্ৰৰ চিকিৎসাৰ নামত ইমৰান হুছেইন নামৰ লোকজনে এইবাৰ সংঘটিত কৰিলে এক ভয়ংকৰ কাণ্ড ।
বেজালি চিকিৎসাৰ প্ৰতি বিশ্বাসী বৃহত্তৰ ৰূপহীহাট এলেকাৰ এটা পৰিয়ালৰ এগৰাকী অষ্টম শ্ৰেণীৰ ছাত্ৰীক শুকুৰবাৰে সন্ধিয়া বেজালি পদ্ধতিৰ চিকিৎসাৰ বাবে লৈ গৈছিল ৰূপহীহাটৰ কাছখাইটিৰ ইমৰাণ হুছেইন নামৰ তন্ত্ৰ-মন্ত্ৰ কৰা ভণ্ড বেজৰ ওচৰলৈ । কিন্তু কিশোৰীগৰাকীক সন্ধিয়াৰ আন্ধাৰ হোৱাৰ পাছত চিকিৎসাৰ বাবে মাতি পঠিওৱা বেজ ইমৰানে চিকিৎসাৰ নামত কিশোৰীগৰাকীৰ সৈতে সংঘটিত কৰে ভয়ংকৰ কাণ্ড ।
অকলশৰীয়াকৈ চিকিৎসা প্ৰদানৰ নামত পোন্ধৰ বছৰীয়া কিশোৰীগৰাকীক যৌন নিৰ্যাতন চলোৱাৰ অভিযোগ উত্থাপন হৈছে । ভণ্ড বেজ ইমৰান হুছেইনৰ বন্ধ কোঠাৰ পৰা ওলায়েই আতংকিত কিশোৰীগৰাকীয়ে ঘটনাৰ বিষয়ে অৱগত কৰে পৰিয়ালৰ লোকক । লগে লগেই হতভন্ব হৈ পৰে পৰিয়ালৰ লোক । ইয়াৰ পাছতেই ভণ্ড বেজ ইমৰানৰ কু-কাণ্ডৰ বিষয়ে অৱগত হৈ কিশোৰীগৰাকীৰ পৰিয়ালৰ লোক কাষ চাপে আৰক্ষীৰ ।
নিশাই ৰূপহীহাট আৰক্ষী থানাৰ অন্তৰ্গত কাৱৈমাৰী আৰক্ষী চকীত কিশোৰীগৰাকীৰ পৰিয়ালৰ লোকে দাখিল কৰা এজাহাৰৰ ভিত্তিত এক গোচৰ ৰুজু কৰি আৰক্ষীয়ে বেজ ইমৰানক গ্ৰেপ্তাৰ কৰি শনিবাৰে আদালতত হাজিৰ কৰাৰ অন্তত জেল হাজেতলৈ প্ৰেৰণ কৰে ।