হোজাই, ২ জুন :হ্ৰাস পাইছে কপিলী নৈৰ জলপৃষ্ঠ । লাহে লাহে কমিছে বানৰ প্ৰকোপ । হোজাই জিলাৰ তিনিটা ৰাজহচক্ৰ ক্ৰমে লংকা, হোজাই আৰু বিনাকান্দিত বিগত তিনিদিন ধৰি বানে যি সংহাৰীৰূপ ধাৰণ কৰিছিল, তাৰ তুলনাত শুকুৰবাৰে দিনৰ ২ বজাৰ পৰা কমিছে কপিলী নৈৰ জলপৃষ্ঠৰ লগতে কপিলী নৈৰ বাঢ়নী পানী । হোজাই জিলা আয়ুক্ত লাচিত কুমাৰ দাসে সদৰী কৰে এই তথ্য ।
আয়ুক্তগৰাকীয়ে জনাই যে জিলাখনৰ ৫৩ খন গাঁৱত কপিলী বাঢ়নী পানী সোমাইছে ৷ তাৰে প্ৰায় ৯৪ হাজাৰ মানুহ বানপানী প্ৰভাৱত পৰিছে । জিলাখনত বৰ্তমানলৈকে ৬২ টা বানাক্ৰান্তৰ বাবে স্থাপন কৰা শিবিৰত ৪৪,৪৭৯ জন ব্যক্তিয়ে আশ্ৰয় লৈ আছে । অৱশ্যে কপিলী নৈৰ জলপৃষ্ঠ ৭১ মিটাৰৰ পৰা ৭০ মিটাৰলৈ নামিছে । শুকুৰবাৰে দুপৰীয়া ২ বজাৰৰ পৰা ক্ৰমান্বয়ে পানী তললৈ নামি আহিছে ।
বানৰ ফলত হোজাইৰ পৰা টুম্পেং অৰ্থাৎ কাৰ্বি আংলং সংযোগী পথ আৰু নীলবাগানৰ পৰা যমুনামুখ সংযোগী দুটা ৰাজ্যিক পথ বানৰ বাবে বন্ধ কৰি দিয়া হৈছিল । যমুনামুখ সংযোগী পথটো হয়টো দুদিনৰ ভিতৰত খুলিব পৰা যাব । হোজাই-টুম্পেং পথটোও বানপানীৰ বাবে ক্ষতি হোৱা এটা অংশ মেৰামতি কৰি খুলিব পৰা যাব বুলি উল্লেখ কৰাৰ লগতে বৰ্তমানলৈকে জিলা প্ৰশাসনৰ ফালৰ পৰা আশ্ৰয় শিবিৰকে ধৰি সকলো লোককে পৰ্যাপ্ত পৰিমাণৰ বয় বস্তু দিয়া হৈছে আৰু ক'তো কোনো অভাৱ হোৱা নাই বুলি মন্তব্য কৰে আয়ুক্তগৰাকীয়ে ।