মৰাণ, ২০ মে’ :প্ৰথমগৰাকী অসমীয়া মহিলা বিমান পাইলট ধীৰা চলিহা হাজৰিকাক দেওবাৰে প্ৰদান কৰা হয় "বীৰাংগনা মূলাগাভৰু বঁটা" । সোণাৰি নগৰত আয়োজিত এক গাম্ভীৰ্যপূৰ্ণ অনুষ্ঠানত ধীৰা চলিহা হাজৰিকাক আয়োজকসকলে এই বঁটা প্ৰদান কৰে । টাই আহোম যুৱ পৰিষদ অসম চমুকৈ টাইপাৰ চৰাইদেউ জিলা সমিতিয়ে বীৰাংগনা মূলাগাভৰুৰ জীৱনাদর্শ, বলিষ্ঠ ভূমিকা আৰু ত্যাগক গভীৰ শ্ৰদ্ধাৰে সুঁৱৰি ২০১৩ বর্ষৰ পৰা ক্ৰমাগতভাৱে ঐতিহ্যমণ্ডিত সোণাৰি নগৰত অনুষ্ঠিত কৰি আহিছে বীৰাংগনা মূলাগাভৰু বঁটা প্ৰদান অনুষ্ঠান ।
এই বৰ্ষত প্ৰথমগৰাকী অসমীয়া মহিলা বিমান পাইলট ধীৰা চলিহা হাজৰিকাক বীৰাংগনা মূলাগাভৰু বঁটা প্ৰদান কৰে সংগঠনটোৱে। দেওবাৰে দিনজোৰা কাৰ্যসূচীৰে অনুষ্ঠিত বঁটা প্ৰদান অনুষ্ঠানৰ মাজনিশা মুকলি সভাত প্ৰদান কৰা হয় এই বঁটাটো । বীৰাংগনা মূলাগাভৰু বঁটা গ্ৰহণ কৰি অতি আনন্দিত হোৱা বুলি নিজৰ ভাষণত মন্তব্য কৰে ধীৰা চলিহা হাজৰিকাই ।
এই মুকলি সভাত ৰাজ্যখনৰ সকলো জাতি-জনগোষ্ঠীয় সংগঠনৰ নেতৃত্বই অংশগ্ৰহণ কৰে । ইপিনে,দিনৰ ভাগত বাৰেৰহণীয়া সাংস্কৃতিক শোভাযাত্ৰাৰ লগতে বিভিন্ন জনগোষ্ঠীয় সাংস্কৃতিক অনুষ্ঠান অনুষ্ঠিত হয় ।