ডিব্ৰুগড় বিশ্ববিদ্যালয়ৰ ৰেগিংকাণ্ড : অনশনথলীতে ঢলি পৰিল চাৰি ছাত্ৰ - DU RAGGING INCIDENT

PNGB Hostel DU: ডিব্ৰুগড় বিশ্ববিদ্যালয়ৰ পদ্মনাথ গোহাঞি বৰুৱা ছাত্ৰাৱাসৰ জ্যেষ্ঠ ছাত্ৰক স্থানান্তৰকৰণক লৈ আমৰণ অনশন হোষ্টেলৰ আৱাসীৰ ৷ ডিব্ৰুগড় বিশ্ববিদ্যালয়ত সংঘটিত ৰেগিংকাণ্ডৰ পাচতে এই সিদ্ধান্ত গ্ৰহণ বিশ্ববিদ্যালয় কৰ্তৃপক্ষ‌ৰ ৷ আমৰণ অনশনত বহা চাৰিজনকৈ ছাত্ৰ ঢলি পৰিল অনশনস্থলীত ৷ চাওক সবিশেষ...

মৰাণ, 6 আগষ্ট : উজনি অসমৰ বৌদ্ধিক আৰু উচ্চ শিক্ষাৰ প্ৰাণকেন্দ্ৰস্বৰূপ ডিব্ৰুগড় বিশ্ববিদ্যালয় ৷ এই ডিব্ৰুগড় বিশ্ববিদ্যালয়ৰ প্ৰৱেশদ্বাৰৰ সন্মুখত থকা জিৰণি চ’ৰাত আমৰণ অনশনত বহিছে ঐতিহ্যমণ্ডিত পদ্মনাথ গোহাঞি বৰুৱা ছাত্ৰাৱাসৰ ছাত্ৰসকলে ৷ ইতিমধ্যে 80 ঘণ্টা অতিক্ৰম কৰিছে ডিব্ৰুগড় বিশ্ববিদ্যালয়ৰ ছাত্ৰ সমাজৰ এই প্ৰতিবাদে ৷

ঘটনাৰ বিৱৰণী অনুসৰি, পদ্মনাথ গোহাঞি বৰুৱা ছাত্ৰাৱাসৰ জ্যেষ্ঠ আৱাসীসকলক স্থানান্তকৰণৰ সিদ্ধান্ত বাতিল কৰা বিশ্ববিদ্যালয় অনুদান আয়োগৰ নিয়মাৱলী সম্পূৰ্ণৰূপে মানি চলাৰ দাবীত ছাত্ৰ সমাজে ৰূপায়ণ কৰিছে এই প্ৰতিবাদী অনশন কাৰ্যসূচী ৷ ডিব্ৰুগড় বিশ্ববিদ্যালয়ৰ জ্যোতি বাটচ'ৰাত বিগত 1 আগষ্টৰ পৰা ৰূপায়ণ কৰা প্ৰতিবাদী কাৰ্যসূচীক গুৰুত্ব নিদিয়াক লৈ বিশ্ববিদ্যালয় প্ৰশাসনৰ বিৰুদ্ধে ক্ষোভ উজাৰিছে প্ৰতিবাদকাৰী ছাত্ৰ সমাজে ৷

আনহাতে, অনশনত বহা বহুকেইজন প্ৰতিবাদকাৰী ছাত্ৰ ইতিমধ্যে অসুস্থ হৈ পৰিছে ৷ প্ৰাপ্ত তথ্য অনুসৰি, ডিব্ৰুগড় বিশ্ববিদ্যালয়ত এটা বছৰৰ পূৰ্বে সংঘটিত হৈছিল ভয়ংকৰ ৰেগিংকাণ্ড ৷ এই ঘটনাৰ পাছতে ডিব্ৰুগড় বিশ্ববিদ্যালয় কৰ্তৃপক্ষ‌ই বিশ্ববিদ্যালয়ৰ ছাত্ৰাৱাসত জ্যেষ্ঠ আৰু কনিষ্ঠ ছাত্ৰসকলক পৃথক পৃথক ছাত্ৰাৱাসত ৰখাৰ সিদ্ধান্ত গ্ৰহণ কৰিছিল ৷ সেই সিদ্ধান্ত কাৰ্যকৰী কৰিবলৈ বিশ্ববিদ্যালয় কৰ্তৃপক্ষই জাননী জাৰি কৰা পাচতেই পদ্মনাথ গোহাঞি বৰুৱা ছাত্ৰাৱাসৰ একাংশ ছাত্ৰই এইদৰে প্ৰতিবাদত নামিছে ৷

লক্ষণীয় বিষয়টো হ'ল, পদ্মনাথ গোহাঞি বৰুৱা ছাত্ৰাৱাসত সংঘটিত হৈছিল ৰেগিঙৰ দৰে ভয়ংকৰ কাণ্ড আৰু ৰহস্যজনকভাৱে এবছৰ পিছত এই ছাত্ৰাৱাসৰ ছাত্ৰসকলে নামিছে প্ৰতিবাদত ৷ ডিব্ৰুগড় বিশ্ববিদ্যালয়ৰ আন সমূহ ছাত্ৰাৱাসৰ ছাত্ৰক বিশ্ববিদ্যালয়ৰ কৰ্তৃপক্ষই দিয়া জাননীৰ পাচতে নিজৰ ছাত্ৰাৱাস সলনি কৰিছে ৷

তেনেস্থলত পদ্মনাথ গোহাঞি বৰুৱা ছাত্ৰাৱাসৰ একাংশ ছাত্ৰই এইদৰে প্ৰতিবাদত নমা বিষয়টোত গুৰুত্ব প্ৰদান কৰা নাই বিশ্ববিদ্যালয় কৰ্তৃপক্ষই ৷ সোমবাৰে বিশ্ববিদ্যালয় কৰ্তৃপক্ষই অনশনস্থলীত উপস্থিত হৈ বিশ্ববিদ্যালয়ৰ কৰ্তৃপক্ষই কেতিয়াও এই সিদ্ধান্ত বাতিল নকৰে বুলি জনাই দিয়ে ৷

সোমবাৰে আবেলি আমৰণ অনশনত বহা চাৰিজনকৈ ছাত্ৰ ঢলি পৰাৰো খবৰ পোহৰলৈ আহিছে ৷ অধিক সংকটজনক অৱস্থাত ততালিকে এম্বুলেঞ্চৰ জৰিয়তে অসম চিকিৎসা মহাবিদ্যালয় হাস্পতাললৈ প্ৰেৰণ কৰা হয় ছাত্ৰকেইজনক ৷

লগতে পঢ়ক:DU ragging incident: ডিব্ৰুগড় বিশ্ববিদ্যালয়ৰ ৰেগিং কাণ্ডৰ অন্যতম অভিযুক্ত শুভ্ৰজিৎ বৰুৱাক আটক