মৰাণ, 8 অক্টোবৰ: "কংগ্ৰেছে বিজয়ৰ পৰা শিক্ষা ল'ব আৰু পৰাজয়ৰ পৰা শিক্ষা লৈ দলটোক শক্তিশালী কৰাৰ বাবে কাম কৰিব ।" এই ভাষ্য কংগ্ৰেছ নেতা গৌৰৱ গগৈৰ ৷ হাৰিয়ানা আৰু জম্মু-কাশ্মীৰৰ নিৰ্বাচনী ফলাফল ঘোষণাৰ পিছতে মঙলবাৰে ডিব্ৰুগড়ৰ তিলৈত এইদৰে কয় গগৈয়ে ৷ উল্লেখ্য যে 2024 ৰ লোকসভা নিৰ্বাচনৰ পাছত প্ৰথমবাৰলৈ হাৰিয়ানা আৰু জম্মু-কাশ্মীৰত বিধানসভা নিৰ্বাচন অনুষ্ঠিত হৈছিল । আজি হাৰিয়ানা আৰু জম্মু-কাশ্মীৰৰ বিধানসভা নিৰ্বাচনৰ ফলাফল ঘোষণা কৰা হয় ৷
হাৰিয়ানাত তৃতীয়বাৰৰ বাবে চৰকাৰ গঠন কৰিবলৈ সক্ষম হ'ল বিজেপি । দুয়োখন ৰাজ্যত ৯০ টাকৈ সমষ্টিত অনুষ্ঠিত হোৱা নিৰ্বাচনৰ এগজিট প'লত হাৰিয়ানাত কংগ্ৰেছ দলে চৰকাৰ গঠন কৰিব বুলি তথ্য প্ৰকাশ পোৱাত হাৰিয়ানাত চৰকাৰ গঠন কৰাক লৈ প্ৰৱল আত্মবিশ্বাসী আছিল কংগ্ৰেছ । কিন্তু হাৰিয়ানাত কংগ্ৰেছৰ আশা পূৰণ নহ'ল । ইয়াৰ সমান্তৰালভাৱে জম্মু-কাশ্মীৰত তীব্ৰ প্ৰতিদ্বন্দ্বিতা হ'লেও কংগ্ৰেছ দলে চৰকাৰ গঠন কৰিবলৈ সক্ষম হ'ল ।
দুই ৰাজ্যৰ ফলাফল ঘোষণাৰ পাছতে ডিব্ৰুগড়ৰ তিলৈত কৰ্মীসভাত অংশগ্ৰহণ কৰি হাৰিয়ানাৰ পৰাজয়ৰ পৰা প্ৰদেশ কংগ্ৰেছে শিক্ষা ল'ব বুলি মন্তব্য কৰিলে সাংসদ গৌৰৱ গগৈয়ে । উল্লেখ্য যে আজি তিলৈত খোৱাং ব্লক কংগ্ৰেছে এক কৰ্মীসভা অনুষ্ঠিত কৰিছিল । এই সভাত অংশগ্ৰহণ কৰি দলীয় কৰ্মীসকলৰ সৈতে মত বিনিময় কৰে সাংসদ গগৈয়ে । দলটোক তৃণমূল পৰ্যায়ৰ পৰা কেনেকৈ শক্তিশালী কৰিব পাৰি সেই বিষয়ে এই কৰ্মীসভাত অলোচনা কৰে সাংসদগৰাকীয়ে।