কলিয়াবৰ, ৫ আগষ্ট :অৱশেষত গ্ৰেপ্তাৰ হ'ল কংগ্ৰেছৰ বিধায়ক নুৰুল হুদাৰ পুত্ৰ ৰকিবুল হুদা । তেলচুৰি চক্ৰৰ সৈতে জড়িত থকাৰ অভিযোগত নগাঁও আৰক্ষীয়ে গ্ৰেপ্তাৰ কৰে ৰকিবুল হুদাক । দেওবাৰে নিশা কলিয়াবৰ আৰক্ষী নিৱেশত গ্ৰেপ্তাৰ কৰে কংগ্ৰেছী বিধায়কগৰাকীৰ পুত্ৰক ।
বিধায়ক নুৰুল হুদাৰ পুত্ৰক গ্ৰেপ্তাৰ (ETV Bharat) বিধায়কৰ পুত্ৰক গ্ৰেপ্তাৰ :
তেলচুৰি চক্ৰৰ সৈতে নাম সাঙোৰ খাইছিল কংগ্ৰেছী বিধায়ক নুৰুল হুদাৰ পুত্ৰ ৰকিবুল হুদাৰ । চক্ৰটোৰ সৈতে জড়িত কেইবাজনকো আৰক্ষীয়ে গ্ৰেপ্তাৰ কৰি তদন্ত অব্যাহত ৰাখিছিল । ৰকিবুলক বিচাৰি নগাঁও আৰক্ষীয়ে অভিযান চলাই থকাৰ মাজতে দেওবাৰে তেওঁ উলুৱনী আৰক্ষী নিৱেশত আত্মসমৰ্পণ কৰে ।
আত্মসমৰ্পণৰ পিচতে ৰকিবুলক দীৰ্ঘ সময় ধৰি জেৰা চলোৱা হয় । নগাঁৱৰ আৰক্ষী অধীক্ষক স্বপ্ননীল ডেকাৰ নেতৃত্বত শীৰ্ষ আৰক্ষীৰ এটা দলে ৰকিবুলক জেৰা চলায় । কেইবা ঘণ্টা ধৰি চলা জেৰাৰ অন্তত দেওবাৰে নিশা ৰকিবুল হুদাক আৰক্ষীয়ে গ্ৰেপ্তাৰ কৰে ।
আৰক্ষীৰ মন্তব্য :
নিশা আৰক্ষীয়ে বহু সময় ধৰি ৰকিবুলক জেৰা চলাই আৰু জেৰাৰ অন্তত তেলচুৰি চক্ৰৰে জড়িত থকাৰ অভিযোগত বিধায়কৰ পুত্ৰক গ্ৰেপ্তাৰ কৰা হয় । গ্ৰেপ্তাৰৰ পিচত আৰক্ষী অধীক্ষক স্বপ্ননীল ডেকাই নিশা সংবাদ মাধ্যমক কয়, "ঘটনাটো সন্দৰ্ভত তদন্ত অব্যাহত আছে । ৰকিবুলক আমি জেৰা চলাই আছো । ইতিমধ্যে তেওঁক গ্ৰেপ্তাৰ কৰা হৈছে । কাইলৈ আমি তেওঁক আদালতত হাজিৰ কৰিম আৰু পৰৱৰ্তী সময়ত তদন্ত অব্যাহত থাকিব । বিভিন্ন ধৰণৰ প্ৰমাণ উদ্ধাৰ কৰিছো আৰু সেইবোৰ আদালতত দাখিল কৰা হ'ব ।"
অৱশ্যে এই চক্ৰটোৰ সৈতে আৰু কোন কোন জড়িত আছে, সেই সন্দৰ্ভত কোনো ধৰণৰ মন্তব্য কৰা নাই আৰক্ষী অধীক্ষকগৰাকীয়ে ।
