নলবাৰী,৬ অক্টোবৰ:ধৰ্মীয় সংকীৰ্ণতাৰ বিপৰীতে সম্প্ৰীতিৰ নিদৰ্শন দাঙি ধৰিলে এজন ইছলাম ধৰ্মাৱলম্বী লোকে । একাংশ লোকে সমাজত সাম্প্ৰদায়িক বিষবাষ্প বিয়পোৱাৰ চেষ্টা চলাই থকাৰ সময়তেই শাৰদীয় দুৰ্গা পূজাত সমাজত সম্প্ৰীতিৰ বাৰ্তা লৈ ওলাই অহা এইগৰাকী ইছলাম ধৰ্মাৱলম্বী লোকৰ আদৰ্শই এতিয়া এটা অঞ্চলৰ ৰাইজৰ মাজত বিশেষ চৰ্চা লাভ কৰিছে । কোন বাৰু এইগৰাকী লোক ? তেওঁক লৈ ৰাইজৰ মাজত কিয় হৈছে চৰ্চা ।
নলবাৰীৰ এগৰাকী ইছলাম ধৰ্মাৱলম্বী লোকে দেখুৱাইছে সামাজত সম্প্ৰীতিৰ বান্ধোন কটকটীয়া কৰাৰ নিদৰ্শন । সম্প্ৰীতিৰ মিলনভূমি নলবাৰী জিলাৰ বাঁহজানীৰ প্ৰাণকেন্দ্ৰ চান্দকুছিৰ ঘিল্লা চ'ক দুৰ্গা পূজাত এইবাৰ প্ৰতিমা দান কৰিছে মৰনৈপাৰৰ এগৰাকী মুছলমান লোকে । বাঁহ-বেতৰ ব্যৱসায়ী মজিব আলীয়ে এই দুৰ্গা পূজাস্থলীত বিগত ২৬ বছৰে ব্যৱসায় কৰি আহিছে । তেওঁ এই দুৰ্গা পূজাত প্ৰতিবছৰে কিবা এটা অংশ হ'লেও দান কৰি আহিছে ।
যোৱা বছৰ নাগাৰা নামৰ পাঠকৰ দল এটিৰ বাবে অৰ্থ সাহায্য আগবঢ়োৱাৰ পিচত এইবাৰ প্ৰতিমা দান কৰিছে মজিব আলীয়ে । ২৪ বছৰত ভৰি দিয়া ঘিল্লা চ'ক দুৰ্গা পূজাত মৰনৈপাৰৰ মজিব আলীয়ে সম্প্ৰীতিৰ নিদৰ্শন দাঙি ধৰা প্ৰসংগত কয়, "এইদৰে প্ৰতিমা দান কৰিবলৈ সুযোগ পাই খুউব ভাল লাগিছে ।"