তেজপুৰ, ২ এপ্ৰিল:এফালে লোকসভা নিৰ্বাচনৰ গৰম বতাহ আৰু সমান্তৰালভাৱে ৰাজ্যত বাপতি সাহোন ৰঙালী বিহুক আদৰাৰ উখল-মাখল পৰিবেশ । ডালে-পাতে ফুলে এতিয়া বসন্তৰ আগমনৰ বতৰা । সন্মুখত হেঁপাহৰ ৰঙালী বিহুৰ বাবে গাত তৎ নাই ডেকা-গাভৰুৰ । হেঁপাহৰ ৰঙালী বিহুলৈ মাজত মাত্ৰ কেইটামান দিন বাকী ৷ ব'হাগ অহাৰ বতৰা পায় আনন্দত মতলীয়া হৈ পৰিছে অসমীয়া ডেকা-গাভৰু । ব্যস্ততা বাঢ়িছে সমগ্ৰ ৰাজ্যত ৷ ইপিনে, ব'হাগত এপাক কঁকাল ঘূৰাই নাচিবৰ মনেৰে দিনে নিশাই ডেকা-গাভৰু ব্যস্ত বিহুৰ আখৰাত । ইয়াৰ মাজতেই তেজপুৰত চলিছে বিহু নৃত্য়ৰ লগতে ঢোলৰ প্ৰশিক্ষণ তথা কৰ্মশালা ।
তেজপুৰৰ ঐতিহাসিক শ্বহীদ বাকৰিত তেজপুৰ আঞ্চলিক ছাত্র সন্থাৰ উদ্যোগত বিগত বছৰৰ দৰে এইবাৰো ন-শিকাৰুক প্ৰশিক্ষণ দিয়া হৈছে । বিহুৱে বিশ্বৰ দৰবাৰত প্ৰতিষ্ঠা হোৱাৰ পিচত সেইসকল বিহুৱা ঢুলীয়া-নাচনীয়ে এতিয়া ৰাজ্যৰ ভিন্ন প্ৰান্তত প্ৰশিক্ষণ দিয়া আৰম্ভ কৰিছে । তেজপুৰ আঞ্চলিক ছাত্ৰ সন্থাই এই প্ৰশিক্ষকসকলৰ প্ৰচেষ্টাত ৩৭০ গৰাকী যুৱক-যুৱতীক প্ৰশিক্ষণ দিছে ।