জোনাই, ১১ আগষ্ট : হঠাতে অসম মুলুকত ভুমুকি মাৰিলে এটা বিশেষ এপে ৷ আলাদিনৰ চাকি হিচাপে বহুলোকে গ্ৰহণ কৰিলে এপটো ৷ প্ৰথমে লাভান্বিতও হৈছিল বহুলোক ৷ যিহেতু এপটোৰ জৰিয়তে ধন বিনিয়োগ কৰিলে এদিনতে ৬ শতাংশপৰ্যন্ত অতিৰিক্ত ধন লাভ কৰিব পাৰি ৷
একেনিশাই ধনী হোৱাৰ সপোনত চেঁচাপানী YBYৰ (ETV Bharat Assam) খাটিখোৱা অসমীয়াক সেয়া যে এটা প্ৰকাণ্ড টুপী পিন্ধোৱা হৈছিল, সেই কথা অনুমানেই কৰিব নোৱাৰিলে যেনেতেনে ভাতমুঠি মুকলি কৰি থকাজনৰ পৰা ব্যৱসায়ী, চাকৰিয়ালসকলেও ৷ ৰাইজক আভুৱা ভাৰিবলৈকে এপটোৰ তৰফৰ পৰা সাহাৰ্যও প্ৰদান কৰা হৈছিল দুৰ্গতক ৷ তাকে দেখি এপটোত কমেও ৬ হাজাৰৰ পৰা লাখ টকাপৰ্যন্ত বিনিয়োগ কৰিবলৈ ধৰিলে অসমৰ ভিন্নপ্ৰান্তৰ লোকে ৷
কিন্তু হঠাতে চেঁচাপানী পৰিল লাখপতি, কোটিপতি হোৱাৰ সপোনত ৷ YBY নামৰ এপটোৱে পেলোৱা প্ৰৱঞ্চনাৰ জালখন পোহৰলৈ আহিল, যেতিয়াই 6 হাজাৰ টকা পুনৰ জমা কৰি KYC দিবলৈ কোৱা হ’ল ৷ লগেলগে বন্ধ হৈ পৰিল খাটিখোৱা জনতাই জমা কৰা কোটিকোটি টকা উলিওৱাৰ বাট ৷
YBYই পেলোৱা প্ৰৱঞ্চনাৰ জালখনত সোমাই পৰিল জোনাইৰ জনতাও ৷ লাখপতি হোৱাৰ সপোন ৰচি জোনাইৰ বহুলোকে YBYত বিনিয়োগ কৰিছিল ৬০০০ৰ পৰা ২০,০০০ টকা পৰ্যন্ত ৷ কিন্তু নিশাটোৰ ভিতৰত অন্তৰ্ধান হ’ল সপোন দেখুওৱা YBY. ফলত বিনিয়োগকাৰীসকলৰ সপোন সপোন হৈয়েই ৰ’ল, পানীত পৰিল সৰ্বমুঠ বহুলক্ষ টকা ৷
হাজাৰ হাজাৰ লোকৰ সপোনত চেঁচাপানী ঠলা অনলাই ট্ৰেডিং এপ YBYৰ ৰামঠগন এতিয়া ৰাজ্যৰ সৰ্বত্ৰে চৰ্চিত হৈ আছে ৷ তীব্ৰ চৰ্চা চলিছে সামাজিক মাধ্যমতো ৷ কাৰ কিমান টকা পানীত পৰিল তাক লৈ চলিছে হিচাপ-নিকাচ ৷ উল্লেখ্য যে কেৱল YBYই নহয়, ইয়াৰ পূৰ্বেও এনে বহু অনলাইন এপ্লিকেশ্যনে সৰ্বস্বান্ত কৰি থৈছে অসমৰ বহুলোকক ৷ সেইসমূহ ঘটনায়ো কোনোধৰণৰ সচেতনতা বৃদ্ধি কৰিব নোৱৰাৰ ফলত পুনৰ ৰাজ্যত সংঘটিত হ’ল এনে প্ৰৱঞ্চনাৰ ঘটনা ৷
একেনিশাই ধনী হোৱাৰ প্ৰলোভনত ভোল নাযাবলৈ বিভিন্ন পক্ষই আহ্বান জনাইছে ৰাইজক ৷ অসম জাতীয়তাবাদী যুৱ ছাত্ৰ পৰিষদৰ ধেমাজি জিলা সমিতিৰ সভাপতি জ্ঞান শৰ্মায়ো জনাইছে একেই আহ্বান ৷ তেওঁ কয়, ‘‘সমগ্ৰ অসমত কিছুমান ভুৱা ট্ৰেডিং এপে গা কৰি উঠিছে ৷ আমি থলুৱা খাটিখোৱা জনগণক সজাগ হ’বলৈ অনুৰোধ জনাইছো ৷ এনেধৰণৰ কোনো আলাদিনৰ চাকি নাই, যিয়েই ২০ দিনত টকা দুগুণ কৰি দিব পাৰে ৷ প্ৰলোভনেৰে অসমৰ দুখীয়া, খাটিখোৱা লোকৰ কষ্টোপাৰ্জিত ধন সংগ্ৰহ কৰি থকা দেখা গৈছে ৷ এই ব্যৱসায়টো অসমলৈ অনাসকলো জগৰীয়া ৷ এই ক্ষেত্ৰত প্ৰশাসনো সজাগ হ’ব লাগে ৷’’
লগতে পঢ়ক :লোভত পৰি হেৰুৱালে লাখে-লাখে টকা, শিক্ষকৰ বিৰুদ্ধে যোৰহাটত গোচৰ
বিপদজনক হ’ব পাৰে অনলাইনত চাকৰিৰ সন্ধান : ব্য়ক্তিগত তথ্য় হেকাৰৰ হাতত পৰা সম্ভাৱনা
