এতিয়াৰে পৰা মুখ্যমন্ত্রী, মন্ত্রী-আমোলাই বহন কৰিব লাগিব চৰকাৰী আৱাসৰ বিদ্যুৎ মাচুল - Electricity bill Assam

Himanta Biswa Sarma on electricity bill: পহিলা জুলাইৰ পৰা বিদ্যুতৰ মাচুল নিজে বহন কৰিব লাগিব মুখ্যমন্ত্ৰীসহ মন্ত্ৰী-আমোলাই । অৱসান ঘটিব ৭৫ বছৰীয়া পৰম্পৰাৰ ৷ ইমান দিনে ৰাজ্য চৰকাৰে বহন কৰি আহিছিল এওঁলোকৰ বিদ্যুতৰ মাচুল । বিদ্যুতৰ মাচুল প্ৰতি ইউনিটত এটকাকৈ হ্ৰাস কৰাৰো চিন্তা-চৰ্চা চৰকাৰৰ ।

গুৱাহাটী, ১৬ জুন : অৱসান ঘটিব এটা ৭৫ বছৰীয়া পৰম্পৰাৰ । এতিয়াৰে পৰা মুখ্যমন্ত্ৰীকে ধৰি মন্ত্ৰী-আমোলা তথা জ্যেষ্ঠ বিষয়াসকলে নিজে বহন কৰিব লাগিব চৰকাৰী আৱাসৰ বিদ্যুতৰ মাচুল ৷ পহিলা জুলাইৰ পৰা কাৰ্যকৰী হ’ব এই ব্যৱস্থা ৷ পূৰ্বতে ৰাজ্য চৰকাৰে বহন কৰিছিল তেওঁলোকৰ বিদ্যুতৰ মাচুল ৷ অৱশেষত পূৰ্বৰ পৰা চলি অহা এই পৰম্পৰাৰ অৱসান ঘটালে মুখ্যমন্ত্ৰী হিমন্ত বিশ্ব শৰ্মাই ৷ দেওবাৰে দিছপুৰৰ লোকসেৱা ভৱনত এই ঘোষণা কৰে খোদ মুখ্যমন্ত্ৰী হিমন্ত বিশ্ব শৰ্মাই ।

জনতা ভৱনত সৌৰ প্ৰকল্প উদ্বোধন কৰি দিয়া ভাষণত মুখ্যমন্ত্ৰীয়ে কয় যে পহিলা জুলাইৰ পৰা মুখ্যমন্ত্ৰীৰ লগতে মন্ত্ৰী আৰু জ্যেষ্ঠ বিষয়াসকলে বিদ্যুতৰ মাচুল নিজে বহন কৰিব লাগিব ৷ বিগত ৭৫ বছৰ ধৰি ৰাজ্য চৰকাৰে এই মাচুল বহন কৰি আহিছিল ৷ চৰকাৰী আৱাসৰ বিদ্যুতৰ মাচুল পহিলা জুলাইৰ পৰা নিজে বহন কৰিব লাগিব ৷

লগতে পঢ়ক:স্মাৰ্ট মিটাৰৰ নামত সাধাৰণ জনতাক মাধমাৰ বিদ্যুৎ বিভাগৰ

বিদ্যুতৰ মাচুলৰ এই কথাটো আগতে গম পোৱা নাছিল বুলি উল্লেখ কৰি মুখ্যমন্ত্ৰী ড৹ শৰ্মাই কয় যে কিবা কথাতহে এই বিষয়টো জানিব পাৰিলে । জ্ঞাত হোৱাৰ পিচতে উদ্যোগ গ্ৰহণ কৰা হৈছে । এই ব্যৱস্থাৰ দ্বাৰা বিদ্যুৎ পৰিষদৰ সহায় হ'ব বুলি মুখ্যমন্ত্ৰীয়ে আশা প্ৰকাশ কৰে । মুখ্যমন্ত্ৰীগৰাকীয়ে লগতে কয় যে সচিবালয়ৰ চৰকাৰী আৱাসত থকা কৰ্মচাৰীসকলকো বিদ্যুতৰ মাচুল নিজে বহন কৰাৰ বাবে কোৱা হৈছে ।

বিদ্যুতৰ মাচুল প্ৰতি ইউনিটত এটকাকৈ হ্ৰাস কৰাৰ চিন্তা-চৰ্চা চৰকাৰৰ :

২০২৫ চনৰ পহিলা এপ্ৰিলৰ পৰা বিদ্যুতৰ মাচুল প্ৰতি ইউনিটত এটকা হ্ৰাস কৰাৰ বাবে এ পি ডি চি এলৰ প্ৰতি আহ্বান জনায় মুখ্যমন্ত্ৰী হিমন্ত বিশ্ব শৰ্মাই ৷ ইয়াৰ পিচত ২০২৬ চনত আৰু ৫০ পইচা হ্ৰাস কৰাৰ বাবেও আহ্বান জনায় মুখ্যমন্ত্ৰীয়ে । যাতে ইয়াৰ দ্বাৰা নিম্ন মধ্যবিত্তৰ উপভোক্তাসকলে সকাহ লাভ কৰিব পাৰে ।

বৰ্তমান সময়ত ৩০০ ইউনিট বিদ্যুৎ ব্যৱহাৰ কৰিলে প্ৰতি ইউনিটত ৫.৮৫ টকাকৈ লোৱা হয় ৷ ২০২৫ চনৰ পহিলা এপ্ৰিলত প্ৰতি ইউনিটত এটকা হ্ৰাস কৰাৰ লক্ষ্যৰে মুখ্যমন্ত্ৰীয়ে এ পি ডি চি এলক আগন্তুক ছমাহত পৰিকল্পনা কৰাৰ বাবে আহ্বান জনায় । ড৹ শৰ্মাই বিদ্যুতৰ ক্ষতি তথ‍া চুৰি ৰোধ কৰাৰ বাবেও এ পি ডি চি এলৰ প্ৰতি আহ্বান জনায় । যাতে লক্ষ্যত উপনীত হ'ব পৰা যায় ৷

লগতে পঢ়ক:বিদ্যুৎ মাচুল নিদিয়াকৈ ঘৰতে বিনামূলীয়াকৈ কেনেকৈ লাভ কৰিব শক্তি ?

তেল নাইবা গেছৰ দাম বৃদ্ধি নহ’লে অহা বছৰত এটকা আৰু পৰৱৰ্তী বছৰত উপৰঞ্চি ৫০ পইচা প্ৰতি ইউনিটত হ্ৰাস কৰিব পৰা যাব । এনে কৰিব পাৰিলে বিদ্যুতৰ মাচুল অসমত দেশৰ ভিতৰতে কম হ’ব বুলি সদৰী কৰি মুখ্যমন্ত্ৰীয়ে কয় যে দেশৰ আন ডাঙৰ ৰ‍াজ্যৰ তুলনাত অসমত পেট্ৰ’ল আৰু ডিজেলৰ দাম কম ৷

মুখ্যমন্ত্ৰীয়ে লগতে কয় যে বিগত তিনি বছৰত ৰাজ্যৰ শক্তিখণ্ডৰ ব্যাপক সংস্কাৰ সাধন কৰা হৈছে ।

লগতে পঢ়ক:এপিডিচিএলৰ কৰ্মচাৰীক চোকা অস্ত্ৰৰে আক্ৰমণ গ্ৰাহকৰ