যোৰহাট : অসম প্ৰকাশন পৰিষদ, সদৌ অসম পুথি প্ৰকাশক আৰু বিক্ৰেতা সংস্থাৰ উদ্যোগত যোৰহাট ক্ৰীড়া সন্থা খেলপথাৰত দহদিনীয়া কাৰ্যসূচীৰে অনুষ্ঠিত হৈছে অসম গ্ৰন্থমেলা । এই গ্ৰন্থমেলাৰ এক অনুষ্ঠানত একেখন মঞ্চতে দেখিবলৈ পোৱা গ'ল অসম সাহিত্য় সভাৰ সভাপতি পদৰ দুগৰাকী প্ৰাৰ্থী ড৹ বসন্ত কুমাৰ গোস্বামী আৰু উপেন ৰাভা হাকাচামক । ধ্ৰুপদী ভাষাৰ মৰ্যদা সন্দৰ্ভত আয়োজিত এক অনুষ্ঠানত অংশগ্ৰহণ কৰাৰ সময়ত দুয়োগৰাকী বিশিষ্ট সাহিত্য়িকে হাঁহিমুখে পৰস্পৰক জনালে শুভেচ্ছা ।
একেখন মঞ্চত অসম সাহিত্য সভাৰ সভাপতি পদৰ দুই প্ৰাৰ্থীয়ে বিগত কেইবাবছৰ ধৰি পৰস্পৰে একেলগে কাম কৰাৰ কথা উল্লেখ কৰে । দুয়োগৰাকী প্ৰাৰ্থীয়ে সাহিত্য সভাৰ সংবিধান সংশোধনীৰ পৰা আৰম্ভ কৰি ৰিগিং বন্ধ কৰা সন্দৰ্ভত মন্তব্য় কৰে । অসম প্ৰকাশন পৰিষদ, সদৌ অসম পুথি প্ৰকাশক আৰু বিক্ৰেতা সংস্থাৰ উদ্যোগত আয়োজিত 'অসমীয়া ভাষালৈ ধ্ৰুপদী ভাষাৰ মৰ্যদা:চৰ্চা আৰু দায়বদ্ধতা' শীৰ্ষক আলোচনা চক্ৰত অংশগ্ৰহণ কৰে দুইগৰাকী বিশিষ্ট ব্যক্তিয়ে । এই বিষয়বস্তু সন্দৰ্ভত বিস্তৃতভাৱে মত প্ৰকাশ কৰিলে বিশিষ্ট সাহিত্য়িক দুগৰাকীয়ে ।
গণতান্ত্ৰিক ব্যৱস্থাৰ স্বাৰ্থত বেলেটত ৰিগিং বন্ধ কৰাৰ দাবী
উপেন ৰাভা হাকাচামে সুস্থ সৱল গণতান্ত্ৰিক ব্যৱস্থাৰ স্বাৰ্থত বেলেটত ৰিগিং নহয় তাৰ বাবে সকলোকে গুৰুত্ব প্ৰদান কৰিবলৈ আহ্বান জনায় । লগতে সভাপতি পদৰ প্ৰাৰ্থী বসন্ত কুমাৰ গোস্বামীকো শুভেচ্ছা জ্ঞাপন কৰে বিশিষ্ট সাহিত্য়িকগৰাকীয়ে ।