তেজপুৰ,২৫ ছেপ্টেম্বৰ:ভাৰতৰ পৰ্বতাৰোহীৰ আন এক সফলতা । ৰাষ্ট্ৰীয় পৰ্বতাৰোহণ আৰু দুঃসাহসিক ক্ৰীড়া সংস্থা ডিৰাঙৰ এটা দলে প্ৰথমবাৰৰ বাবে আৰোহণ কৰিলে এটা সুউচ্চ শৃংগত । দলটোৱে সফলতাৰে আৰোহণ কৰে অৰুণাচল প্ৰদেশৰ টাৱাং তথা পশ্চিম কামেং অঞ্চলৰ হিমালয়ৰ গেৰিচেন অংশৰ ২০,৯৪২ ফুট উচ্চতাৰ এটা নামহীন শৃংগত । যাক লৈ এতিয়া উৎফুল্লিত হৈ পৰিছে সকলো ।
এই সন্দৰ্ভত প্ৰতিৰক্ষা মুখপাত্ৰ লেফটেনেন্ট কৰ্ণেল মহিন্দ্ৰ ৰাৱাটে জনাই যে ১৫ জনীয়া দলটোৰ নেতৃত্বত দিছিল কৰ্ণেল ৰণবীৰ সিং জামুৱালে ৷ দলটোৱে মুঠ ১৫ দিনত এই দুঃসাহসিক আৰোহণ সম্পূৰ্ণ কৰে । তেওঁ কয়,"এই শৃংগটো কাৰিকৰীভাৱে অঞ্চলটোৰ অন্যতম প্ৰত্যাহ্বানমূলক শৃংগ আৰু ইয়াত পূৰ্বে কোনেও আৰোহণ কৰা নাছিল । শুভ্ৰ বৰফৰ আচ্ছাদন, বিশাল শিলাখণ্ড আৰু দুই কিলোমিটাৰ দৈৰ্ঘৰ হিমবাহকে ধৰি অপৰিসীম প্ৰত্যাহ্বান অতিক্ৰম কৰাৰ পিছত দলটোৱে ইয়াত সফলতাৰে আৰোহণ কৰে । পাছত তিব্বতীয় ধৰ্মগুৰু দালাই লামাৰ সন্মানত শৃংগটোক "ছাংয়াং জ্ঞ্যাটচ' শৃংগ" হিচাপে ইয়াৰ নামকৰণ কৰে ।”
উল্লেখযোগ্য যে,এই শৃংগটোৰ নাম ষষ্ঠ দালাই লামাৰ নামেৰে নামাকৰণ কৰি ধৰ্মগুৰুজনৰ যুগজয়ী প্ৰজ্ঞা আৰু মনপা সম্প্ৰদায়ৰ অৱদানক শ্ৰদ্ধাঞ্জলি জনোৱা হৈছে বুলিও তেওঁ উল্লেখ কৰে । “ছাংয়াং জ্ঞ্যাটচ’ শৃংগ” জয় কৰাৰ অভিযানটো আছিল এই দলটোৱে এতিয়ালৈকে কৰা আটাইতকৈ কঠিন পৰ্বত আৰোহণ অভিযানসমূহৰ ভিতৰত অন্যতম । বিপজ্জনক শিলাখণ্ড, বৰফৰ ঠেক পথ আৰু অভাৱনীয় প্ৰতিকূল বতৰৰ পৰিস্থিতিৰ মাজত এই অভিযান সম্পূৰ্ণ কৰা হয় ।
দলটোৰ দৃঢ়তা আৰু দলীয় উৎসাহেৰে বিশেষ পৰ্বতাৰোহী দলটোৱে এই প্ৰত্যাহ্বানসমূহৰ মাজেৰে আগবাঢ়ি শিখৰত উপনীত হ’বলৈ সক্ষম হোৱাৰ লগতে এক নতুন ইতিহাস ৰচনা কৰে । দেশৰ দুঃসাহসিক আৰু পৰ্বতাৰোহণৰ ক্ষেত্ৰত আগৰণুৱা নিমাছে ভাৰতীয় পৰ্বতাৰোহণ ফাউণ্ডেছন (আই এম এফ)ক এই আৰোহণৰ বিষয়ে আৰু শৃংগটোৰ নাম ৰখাৰ বিষয়ে ইতিমধ্যে অৱগত কৰিছে ।