গুৱাহাটী, ৯ আগষ্ট:সোণৰ দামৰ ক্ষেত্ৰত চৰকাৰে শেহতীয়াভাৱে গ্ৰহণ কৰা সিদ্ধান্তৰ বিৰুদ্ধে সৰৱ হৈ পৰিছে ৰাজ্য়ৰ স্বৰ্ণশিল্পীসকল । অসমৰ স্বৰ্ণশিল্পী সকলে 'এক দেশ এক দাম'ৰ বিৰোধিতা কৰি 'এক ৰাজ্য় এক দাম' কৰাৰ দাবী উত্থাপন কৰিছে । শুকুৰবাৰে নিখিল অসম স্বৰ্ণশিল্পী সমিতিয়ে উদযাপন কৰা ৬২ সংখ্যক সংহতি দিৱসত এইদৰে দাবী উত্থাপন কৰিছে স্বৰ্ণশিল্পীসকলে ।
থলুৱা স্বৰ্ণশিল্পীৰ ব্যৱসায় ৪০ % হ্ৰাস:
কেন্দ্ৰীয় চৰকাৰৰ এই নীতিৰ বিৰুদ্ধে সৰৱ হৈ অখিল ভাৰত স্বৰ্ণকাৰ সংঘৰ সাধাৰণ সম্পাদক তগৰ পোদ্দাৰে কয় ,"পুঁজিপতিৰ আগ্ৰাসনত বঞ্চিত হৈছে থলুৱা স্বৰ্ণশিল্পীসকল । সোণৰ ব্যৱসায়ত পুঁজিপতিৰ আগ্ৰাসন হোৱাৰ ফলত থলুৱা স্বৰ্ণশিল্পীসকলৰ ব্যৱসায় দেশজুৰি ৪০ % হ্ৰাস পাইছে ।" তেওঁ পুনৰ কয়," সমগ্ৰ দেশতে ডাঙৰ ডাঙৰ শ্বৰূম স্থাপনৰ ফলত পৰম্পৰাগতভাৱে থলুৱা সোণৰ ব্যৱসায় কৰি অহা স্বৰ্ণশিল্পীসকলৰ অৱস্থা পানীত হাঁহ নচৰা হৈছে । থলুৱা স্বৰ্ণশিল্পীসকলক নিঃশেষ কৰিছে । এই সকলৰ বিৰুদ্ধে আমাৰ যুঁজ । বজাৰ মূল্যতকৈ কম মূল্যত সোণ দি মজুৰি অধিক লৈ গ্ৰাহকক ঠগি আহিছে । সমগ্ৰ দেশতে সোণৰ ব্যৱসায়ীত পুঁজিপতিৰ আগ্ৰাসন হোৱাৰ ফলত থলুৱা স্বৰ্ণশিল্পীৰ ৪০% ব্যৱসায়ী হ্ৰাস পাইছে ।"
ৰাজ্যত আছে ৫০ হাজাৰ থলুৱা স্বৰ্ণশিল্পী :
আনহাতে, নিখিল অসম স্বৰ্ণশিল্পী সমিতিৰ কামৰূপ জিলাৰ সাধাৰণ সম্পাদক নয়ন চন্দ্ৰ ধৰ কয়," সোণৰ ব্যৱসায়ত পুঁজিপতিৰ আগ্ৰাসনত ৰাজ্যৰ ৫০ হাজাৰ থলুৱা স্বৰ্ণশিল্পীৰ ভাতেমৰা অৱস্থা হৈছে । এইক্ষেত্ৰত চৰকাৰে দৃষ্টি দিব লাগে । তদুপৰি ৰাজ্যখনত সকলোতে একে দামত সোণ বিক্ৰী হ'ব লাগে । "