উত্তৰ-পূৰ্বাঞ্চলত ১২০০ টা দক্ষতা বিকাশ কেন্দ্ৰ মুকলি কৰিব এ আই এছ ই চি টিয়ে

উত্তৰ-পূৰ্বাঞ্চলত শিক্ষা আৰু দক্ষতা বিকাশৰ ক্ষেত্ৰত কাম কৰি আহিছে এ আই এছ ই চি টিয়ে । যুৱ প্ৰজন্মক প্ৰশিক্ষণ দিয়াই মূল উদ্দেশ্য় ।

গুৱাহাটী:শিক্ষা আৰু দক্ষতা বিকাশৰ ক্ষেত্ৰত ভাৰতৰ আগশাৰীৰ সামাজিক সংস্থা এ আই এছ ই চি টিয়ে (AISECT) উত্তৰ-পূৰ্বাঞ্চলত ১২০০ টা দক্ষতা বিকাশৰ কেন্দ্ৰ মুকলি কৰাৰ লক্ষ্য বান্ধি লৈছে । সোমবাৰে এই বিষয়ে সদৰী কৰিছে সংস্থাটোৰ অধ্যক্ষ সন্তোষ চৌবেই । আজি মহানগৰীত আয়োজিত উত্তৰ পূব কেন্দ্ৰিক সন্মিলনৰ শেষত অধ্যক্ষগৰাকীয়ে এই বিষয়ে সদৰী কৰি সংস্থাটোৱে উত্তৰ-পূৰ্বাঞ্চলত শিক্ষা আৰু দক্ষতা বিকাশৰ ক্ষেত্ৰত বিভিন্ন কাৰ্যসূচী গ্ৰহণ কৰা বুলি কয় ।

উত্তৰ-পূৰ্বাঞ্চলত শিক্ষা আৰু দক্ষতা বিকাশত পদক্ষেপ

এ আই এছ ই চি টিৰ অধ্যক্ষ সন্তোষ চৌবেই কয়,"বিগত ১৫ বছৰ ধৰি উত্তৰ-পূৰ্বাঞ্চলত শিক্ষা আৰু দক্ষতা বিকাশৰ ক্ষেত্ৰত কাম কৰি আছো । অসম,মেঘালয়,অৰুণাচল প্ৰদেশ, মিজোৰাম,নাগালেণ্ড আৰু ত্ৰিপুৰাৰ ৬৮ খন জিলাত ৬৮৫ টা কেন্দ্ৰ আছে । এই কেন্দ্ৰৰ জৰিয়তে যুৱ প্ৰজন্মক দক্ষতা বিকাশৰ প্ৰশিক্ষণ দিয়া হয় । শেহতীয়াকৈ এ আই, ডিজিটেল মাৰ্কেটিং, চাইবাৰ চিকিউৰিটিৰ প্ৰশিক্ষণ দিয়াৰ লগতে জাপান,জাৰ্মানী ভাষাৰ প্ৰশিক্ষণ দিয়া হয় যাতে বিদেশতো সংস্থাপন লাভ কৰিব পাৰে ।"

অৰ্থনৈতিক বিকাশৰ উদ্ভাৱনীমূলক পদ্ধতিৰ সন্ধান

আজিৰ এই সন্মিলনখনৰ জৰিয়তে উত্তৰ-পূৰ্বাঞ্চলৰ শৈক্ষিক আৰু অৰ্থনৈতিক বিকাশৰ উদ্ভাৱনীমূলক পদ্ধতিৰ সন্ধান কৰা বুলি উল্লেখ কৰি সংস্থাটোৰ অধ্যক্ষ সন্তোষ চৌবেই কয়,“ উত্তৰ-পূৰ্বাঞ্চলত সম্প্ৰদায়সমূহৰ সৱলীকৰণ আৰু প্ৰয়োজন সাপেক্ষে দক্ষতা বিকাশত গুৰুত্ব আৰোপ কৰাই হৈছে আমাৰ প্ৰধান কাম ।" এই সন্মিলনে উত্তৰ-পূব ভাৰতত প্ৰকৃত পৰিৱৰ্তনক আগুৱাই নিয়াত গুৰুত্ব আৰোপ কৰিব বুলি মন্তব্য় কৰে এ আই এছ ই চি টিৰ অধ্যক্ষ সন্তোষ চৌবেই । ভৱিষ্য়তেও এই যাত্ৰা অব্য়াহত থাকিব বুলি কয় এ আই এছ ই চি টিৰ অধ্যক্ষগৰাকীয়ে ।

আজিৰ এই সন্মিলনখন উদ্বোধন কৰে অসম ৰাজ্যিক বিজেপিৰ সভাপতি ভৱেশ কলিতাই । ৰাজ্যিক বিজেপিৰ সভাপতিগৰাকীয়ে দক্ষতা বিকাশৰ পৰিৱৰ্তনশীল সম্ভাৱনাৰ ওপৰত গুৰুত্বসহকাৰে আলোকপাত কৰে ।

লগতে পঢ়ক:সেউজ হ'ব লুইতৰ চাপৰি ! দুই হাজাৰ বিঘা কৃষিভূমিত আৰম্ভ শাক-পাচলিৰ খেতি