নলবাৰী: অহা ১৫ নৱেম্বৰৰ পৰা ২৭ নৱেম্বৰলৈ নলবাৰীৰ ঐতিহাসিক শ্ৰীশ্ৰী হৰিমন্দিৰ বাকৰিত অনুষ্ঠিত হ'ব ৰাস মহোৎসৱ । উত্তৰ-পূৱৰ ধৰ্মীয় অনুষ্ঠানসমূহৰ ভিতৰত অন্যতম হৰিমন্দিৰৰ ৰাস এইবাৰ ১৩ দিনীয়া বৰ্ণাঢ্য কাৰ্যসূচীৰে অনুষ্ঠিত হ'ব । ৯১ সংখ্যক শ্ৰীকৃষ্ণৰ ৰাস মহোৎসৱৰ বাবে সাজু হৈছে আয়োজক সমিতি । এইবাৰ 'ৰামায়ণ'ৰ ৰাম আৰু সীতা দেৱী আহিব নলবাৰীলৈ ।
ৰাস মহোৎসৱৰ উদ্বোধনী অনুষ্ঠানৰ মুখ্য় আকৰ্ষণ হ'ব 'ৰামায়ণ'ৰ ৰামৰ চৰিত্ৰত অভিনয় কৰি খ্য়াতি লাভ কৰা অৰুণ গোভিল আৰু সীতা দেৱীৰ চৰিত্ৰত অভিনয় কৰা অভিনেত্ৰী দিপীকা চিখলিয়া । তদুপৰি 'ৰামায়ণ'ধাৰাবাহিকৰ আন অভিনেতা-অভিনেত্ৰীয়েও এইবাৰ নলবাৰীৰ ৰাস মহোৎসৱত উপস্থিত থাকিব ।
ইয়াকে লৈ অভিনেতা তথা বিজেপি নেতাগৰাকীয়ে শনিবাৰে নলবাৰীৰ ৰাসত সকলোকে অংশগ্ৰহণ কৰিবলৈ এক ভিডিঅ'যোগে আহ্বান জনায় । লগতে তেওঁক ৰাসলৈ নিমন্ত্ৰণ জনোৱাৰ বাবে নলবাৰীৰ স্থানীয় বিধায়ক তথা কেবিনেট মন্ত্ৰী জয়ন্ত মল্লবৰুৱাক ধন্যবাদ জনায় । উল্লেখ্য় যে ৰাসত 'শুনো শ্ৰীৰাম কাহানি' প্ৰদৰ্শন কৰা হ'ব ।