বঙাইগাঁও,২৫ আগষ্ট: শনিবাৰে নিশা বঙাইগাঁৱৰ অল্ড ক'লনীত সৃষ্টি হয় এক উত্তেজনাময় পৰিস্থিতিৰ । ৬ অস্ত্ৰধাৰী যুৱকে ৰাতুল মেধি নামৰ এজন যুৱকক আক্ৰমণ কৰাৰ ঘটনাক লৈ বিৰাজ কৰে তীব্ৰ চাঞ্চল্য । ৰাতুল মেধিক ঘৰৰ পৰা মাতি নি প্ৰথমে ব্যক্তিগত কিছু কাৰণত তৰ্কাতৰ্কিত লিপ্ত হয় অস্ত্ৰধাৰী যুৱক কেইজন । তাৰ পিছতে ৰাতুল মেধি আৰু তেওঁৰ পিতৃৰ সৈতে অস্ত্ৰধাৰী যুৱকৰ দলটোৰ মাজত সংঘটিত হয় মাৰপিটৰ ঘটনা । উক্ত সংঘৰ্ষৰ ফলত ৰাতুল মেধি, তেওঁৰ পিতৃৰ লগতে অস্ত্ৰধাৰী যুৱকৰ দলটোৰো তিনিজন আঘাতপ্ৰাপ্ত হয় ।
যুৱকজনক আক্ৰমণ কৰিবলৈ অহা দলটোৱে মাৰণাস্ত্ৰ লৈ অহাৰ অভিযোগ ভুক্তভোগীৰ । পিচে অস্ত্ৰধাৰী যুৱকৰ দলটোৱে বন্দুক দেখুৱাই ভয়-ভাবুকি দি উক্ত স্থান ত্যাগ কৰাৰ সময়ত পতিত হয় দুৰ্ঘটনাত । AS 26 F 0001 নম্বৰৰ বাহনত আহিছিল অস্ত্ৰধাৰী যুৱকৰ দলটো । ৰাতুল মেধিক ভয়-ভাবুকি দি পলায়নৰ সময়তে সময়ত পথৰ কাষত ৰৈ থকা এখন বলেৰ' পিকআপ বাহনত খুন্দা মৰাৰ ফলত দলটোৱে ব্যৱহাৰ কৰা বাহনখন পথৰ কাষৰ নলাত সোমাই পৰে । ইয়াৰোপৰি বাহনখনে খুন্দিয়ায় আঘাতপ্ৰাপ্ত কৰে আন এজন লোককো ।
ঘটনা সংঘটিত কৰিয়েই অস্ত্ৰধাৰী যুৱক কেইজনে বন্দুক গাড়ীৰ ভিতৰতে এৰি উক্ত স্থানৰ পৰা পলায়ন কৰে । ঘটনাৰ খবৰ পোৱা মাত্ৰকে ঘটনাস্থলীত উপস্থিত হয় বঙাইগাঁও জিলাৰ অতিৰিক্ত আৰক্ষী অধীক্ষক সবিতা দাসসহ আৰক্ষীৰ এটা বৃহৎ দল । আৰক্ষীৰ দল উপস্থিত হৈ সমগ্ৰ ঘটনাৰ সন্দৰ্ভত তদন্ত আৰম্ভ কৰে । কি কাৰণত দুই ফৈদৰ মাজত কাজিয়াৰ সৃষ্টি হৈছে সেয়া এতিয়ালৈকে পোহৰলৈ অহা নাই যদিও আৰক্ষীয়ে সমগ্ৰ ঘটনা সন্দৰ্ভত তদন্ত আৰম্ভ কৰে ।