মৰাণ, ১০ ছেপ্টেম্বৰ : ডিব্ৰুগড় জিলাৰ চাবুৱাত জেৰাই গাঁৱত সোমবাৰে নিশা সংঘটিত হয় এক নৃশংস হত্যাকাণ্ড । নিশা ঘৰৰ ভিতৰতে চোকা অস্ত্ৰৰে আক্ৰমণ কৰি হত্যা কৰিলে জলসম্পদ বিভাগৰ কৰ্মচাৰীক । শোৱাপাটীতেই চাৰিজনীয়া দুৰ্বৃত্তৰ দলে পত্নী আৰু কণমানি কন্যাৰ সন্মুখত চোকা অস্ত্ৰৰে হত্য়াকাণ্ড সংঘটিত কৰা ঘটনাই চাঞ্চল্য়ৰ সৃষ্টি কৰিছে । পিছে পোহৰলৈ অহা নাই এই হত্য়াকাণ্ডৰ আঁৰৰ কাহিনী ।
- কোনে হত্য়া কৰিলে মাধুৰ্য বৰুৱাক ?
জলসম্পদ বিভাগৰ কৰ্মচাৰী মাধুৰ্য বৰুৱাক কোনে নিশা শোৱাপাটীতেই হত্য়া কৰিব পাৰে ? এই প্ৰশ্নৰ উত্তৰ এতিয়াও ওলোৱা নাই । কাৰণ নিশা প্ৰায় ১:৩০ বজাত চাবুৱাৰ জেৰাই গাঁৱৰ নিবাসী মাধুৰ্য বৰুৱাক চাৰিজনীয়া অচিনাকী দূৰ্বৃত্তৰ দল এটাই অতি নিৰ্মমভাৱে ঘৰৰ ভিতৰতে হত্যা কৰে । পৰিয়ালৰ ভাষ্যমতে ঘৰত শুই থকা অৱস্থাতে দুৰ্বৃত্তই মাধুৰ্যক শোৱাপাটীত হত্যা কৰে দলটোৱে ।
নিশা মুখত ক'লা কাপোৰ বান্ধি আহিছিল এটা ৪ জনীয়া দুৰ্বৃত্তৰ দল । মাধুৰ্য বৰুৱাৰ পত্নীয়ে খুলি দিছিল ঘৰৰ দৰ্জা । ইয়াৰ পাচতে পত্নী আৰু কণমানি কন্যাৰ সন্মুখত চোকা অস্ত্ৰ আৰু ধুমুচেৰে মূৰত আঘাত কৰি নিৰ্মমভাৱে হত্যা কৰে । ডিব্ৰুগড়স্থিত জল সম্পদ বিভাগৰ মাণ্ডলিক কাৰ্যালয়ৰ কৰ্মচাৰী আছিল মাধুৰ্য বৰুৱা ।
এই ঘটনাটো সংঘটিত হোৱাৰ পাচতে নিশাই চাবুৱা থানাৰ আৰক্ষী উপস্থিত হয় যদিও পুৱাই দণ্ডাধীশ ঘটনাস্থলীলৈ আহে । আৰক্ষীৰ প্ৰাৰম্ভিক তদন্তত কোনো ধৰণৰ তথ্য পোহৰলৈ অহা নাই । ঘটনাস্থলীলৈ বিশেষ তদন্তকাৰী দল আহি সকলো দিশ তন্নতন্নকৈ পৰীক্ষা কৰিছে ।
- উচ্চ পৰ্যায়ৰ তদন্তৰ দাবী ৰাইজৰ