শিলচৰ,১২ অক্টোবৰ: যি সময়ত একাংশ ৰাজনৈতিক নেতাই ৰাজ্যখনত হিন্দু-মুছলমানৰ মাজত বিভেদৰ বিষবাস্প বিয়পাই ৰাজনৈতিক মুনাফা আদায়ৰ চেষ্টা চলাইছে, ঠিক তেনে সময়ত কাছাৰৰ এখন দুৰ্গা পূজা সমিতিয়ে দাঙি ধৰিলে সম্প্ৰীতিৰ অনন্য নিৰ্দশন । অষ্টমীৰ সন্ধিয়া পূজা মণ্ডপৰ মাইকত বাজিল ইছলামিক গান । হয়, দুৰ্গা পূজাৰ মন্ত্ৰৰ লগতে পূজা মণ্ডপৰ মাইকত বাজিল পয়গম্বৰ হজৰত মহম্মদৰ জীৱনগাঁথা ।
কাছাৰৰ কাটিগড়া কালীবাৰী সাৰ্ব্বজনীন দুৰ্গা পূজা কমিটিৰ মণ্ডপত দেখা গ'ল এই দৃশ্য । অষ্টমীৰ সন্ধিয়া পূজা সমিতিখনে দাঙি ধৰিলে সম্প্ৰীতিৰ এক অপূৰ্ব নিদৰ্শন । সন্ধিয়াৰ ভাগত কাটিগড়া কালীবাৰী দুৰ্গাপূজা সমিতিৰ আয়োজিত পূজাস্থলীৰ মাইকত হঠাৎ শুনা গ’ল বাংলা ভাষাৰ এক বিখ্যাত ইছলামিক গান “দে দে পাল তুলে, দে মাঝি হেলা কৰিছ না, ছেড়ে দে নৌকা মাঝি যাব মদিনা ।”
আনকি শুকুৰবাৰে জুম্মাৰ নামাজৰ সময়ত মণ্ডপৰ মাইক বন্ধ ৰাখে পূজা সমিতিয়ে । যাতে মণ্ডপৰ কাষতে থকা মছজিদত নিৰ্বিঘ্নে নামাজ আদায় কৰিব পাৰে ইছলামধৰ্মী লোকসকলে । দুৰ্গা পূজাৰ মণ্ডপৰ পৰা সাম্প্ৰতিক সম্প্ৰীতিৰ এনে অনন্য নিদৰ্শন দাঙি ধৰাৰ বাবে পূজা সমিতিক ধন্যবাদ জ্ঞাপন কৰে স্থানীয় ইছলামধৰ্মী লোকসকলে ।