গুৱাহাটী, ২৮ মে’ : বংগোপসাগৰত নিম্নচাপৰ ফলত সৃষ্টি হোৱা ৰেমল নামৰ বিধ্বংসী সামুদ্ৰিক ধুমুহাই ৰাজ্যৰ আন আন অঞ্চলৰ লগতে গুৱাহাটী মহানগৰীতো ব্যাপক ক্ষতিসাধন কৰে । সোমবাৰে মাজনিশাৰ পিচত আৰম্ভ হোৱা ধুমুহাজাকে মঙলবাৰৰ দুপৰীয়াপৰ্যন্ত তাণ্ডৱলীলা চলায় । ফলত মহানগৰীখনৰ বহু অঞ্চলত গছ-গছনি উভালি আৰু গছৰ ডাল ভাঙি পৰি হাহাকাৰ অৱস্থাৰ সৃষ্টি হয় । ঠাই বিশেষে পথ বন্ধ হৈ পৰাৰ লগতে বিদ্যুৎ সংযোগ বিচ্ছিন্ন হৈ পৰে ।
তাৰ পিচত বন বিভাগৰ উৰ্দ্ধতম কৰ্তৃপক্ষৰ নিৰ্দেশত গুৱাহাটী বনাঞ্চলিক বিষয়াৰ কাৰ্যালয়ৰ তৰফৰ পৰা পুৱাৰে পৰা গছ কটাৰ বাবে এক যৌথ অভিযান চলোৱা হয় । এই যৌথ অভিযানত বন বিভাগৰ উপৰিও এছ ডি আৰ এফ, ডি ডি এম এ, জি এম চি, মহানগৰ আৰক্ষী, এ পি ডি চি এল, ৰাজহ চক্ৰ বিষয়াৰ কাৰ্যালয় আৰু স্থানীয় ৰাইজে সহযোগ কৰে ।