স্প’ৰ্টছ ডেস্ক, 22 জুলাই:প্ৰায় 17 বছৰৰ পিছত চলিত বৰ্ষত টি-20 বিশ্বকাপৰ খিতাপ দখলৰ পিছত ভাৰতীয় ক্ৰিকেট দলটোৰ মনোবল পূৰ্বতকৈ বৃদ্ধি পাইছে ৷ শ্ৰীলংকাৰ বিৰুদ্ধে অনুষ্ঠিত হ’বলগীয়া এক শৃংখলাৰ বাবে ভাৰতীয় দলটো সোমবাৰে উপস্থিত হৈছে দ্বীপৰাষ্ট্ৰখনত ৷ দলটোৱে শ্ৰীলংকা ভ্ৰমণৰ প্ৰাকক্ষণত বিমানবন্দৰত উপস্থিত হোৱাৰ এটি ভিডিঅ’ শ্বেয়াৰ কৰিছে সামাজিক মাধ্যমত ৷
দলটোৰ নৱনিযুক্ত মুখ্য প্ৰশিক্ষক গৌতম গম্ভীৰৰ সৈতে ভাৰতীয় ক্ৰিকেট দলটোৰ সদস্যসকলে বিমানবন্দৰৰ পৰা কৰা প্ৰস্থানৰ এটা ভিডিঅ' পোহৰলৈ আহিছে । ভিডিঅ'টোত মুখ্য প্ৰশিক্ষক গম্ভীৰ, টি-20 শৃংখলাৰ অধিনায়ক সূৰ্যকুমাৰ যাদৱ আৰু অভিষেক নায়াৰো আছে । একে সময়তে হাৰ্দিক পাণ্ডিয়া, সঞ্জু চেমছনৰ লগতে শুভমন গিল আৰু ঋষভ পন্তকো বিমানবন্দৰৰ বাহিৰত দেখা গৈছে । টীম ইণ্ডিয়াই শৃংখলাটোৰ পূৰ্বে প্ৰস্তুতিৰ বাবে মঙলবাৰৰ পৰা অনুশীলনত অংশগ্ৰহণ কৰিব ।
ভাৰতীয় ক্ৰিকেট দলৰ শ্ৰীলংকা ভ্ৰমণ মুখ্য প্ৰশিক্ষক গৌতম গম্ভীৰ আৰু টি-20 ৰ নৱনিৰ্বাচিত অধিনায়ক সূৰ্যকুমাৰ যাদৱৰ বাবে অগ্নিপৰীক্ষাস্বৰূপ হ'ব । বিৰাট কোহলী আৰু ৰোহিত শৰ্মাই টি-20 আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ পিছত দুয়োগৰাকীয়ে মূল একাদশত কাক স্থান দিব, সেইলৈও দোমোজাত পৰাৰ সম্ভাৱনা আছে ৷
অৱশ্যে আই পি এলত কলকাতা নাইট ৰাইডাৰ্ছৰ হৈ দুয়োগৰাকীয়ে একেলগে কাম কৰিছে ৷ চৰ্চা অনুসৰি, টি-20 শৃংখলাৰ অধিনায়কত্বৰ বাবে সূৰ্য গম্ভীৰৰ প্ৰথম পছন্দ আছিল ৷ যাৰ বাবে পৰৱৰ্তী সময়ত বিচিচিআইয়ে যুৱ খেলুৱৈগৰাকীক টি-20 মেচৰ অধিনায়ক হিচাপে নিযুক্তি দিয়ে ।
টীম ইণ্ডিয়াই শ্ৰীলংকাৰ বিৰুদ্ধে অংশগ্ৰহণ কৰিবলগীয়া শৃংখলাটোত আছে 3 খনকৈ টি-20 আৰু এদিনীয়া মেচ ৷ শৃংখলাটোৰ আটাইকেইখন টি-20 মেচ অনুষ্ঠিত হ’ব পাল্লেকেলেত ৷ সূচী অনুসৰি টি-20 শৃংখলাটো 27 জুলাইৰ পৰা আৰম্ভ হৈ 30 জুলাইত শেষ হ'ব । আনহাতে, 2 আগষ্টৰ পৰা কলম্বোত ভাৰত-শ্ৰীলংকাৰ মাজত এদিনীয়া মেচসমূহ অনুষ্ঠিত হ'ব ।
ভাৰত বনাম শ্ৰীলংকাৰ টি-20 সূচী:
- প্ৰথম টি-20 : 27 জুলাই
- দ্বিতীয় টি-20 : 28 জুলাই
- তৃতীয় টি-20 : 30 জুলাই