নতুন দিল্লী:ইণ্ডিয়ান প্ৰিমিয়াৰ লীগৰ আগন্তুক ছিজনৰ বাবে সাজু হৈছে ৰাজস্থান ৰয়েলছ ৷ বুধবাৰে দলটোৱে নিজৰ নতুন জাৰ্চি মুকলি কৰে ৷
আই পি এলৰ প্ৰথম ছিজনৰ বিজয়ী দল ৰাজস্থান ৰয়েলছে নিজৰ সামাজিক মাধ্যমৰ একাউণ্ট এক্সত এক ভিডিঅ' পোষ্ট কৰে ৷ এই ভিডিঅ'টোৰ জৰিয়তে অনুৰাগীসকলৰ সন্মুখত দলটোৱে জাৰ্চিটোৰ প্ৰথমটো দৃশ্য ৰাজহুৱা কৰে ৷
আই পি এল 2025 ৰ বাবে ৰাজস্থান ৰয়েলছৰ নতুন জাৰ্চি মুকলি
এই ভিডিঅ'টোত ৰাজস্থান ৰয়েলছে আই পি এল 2025 ত দলটোৰ খেলুৱৈসকলে পৰিধান কৰিবলগা জাৰ্চিটো মুকলি কৰা দেখা গৈছে ৷ ভিডিঅ'টোৰ আৰম্ভণিতে জাৰ্চিটো যি কাপোৰৰ পৰা তৈয়াৰ কৰা হৈছে, সেয়া কেঁচীৰে কাটি থকা দেখা গৈছে । তাৰপিছত আধুনিক ডিজাইনৰে জাৰ্চিটো তৈয়াৰ কৰা দেখা গৈছে ৷
অত্যাধুনিক ডিজাইনৰ সৈতে নতুন জাৰ্চি মুকলি ৰাজস্থানৰ
ৰাজস্থান ৰয়েলছে তেওঁলোকৰ জাৰ্চিৰ ৰঙৰ ক্ষেত্ৰত কোনো সালসলনি কৰা নাই । জাৰ্চিটো গুলপীয়া ৰঙৰ ৷ লগতে কলাৰ আৰু কান্ধৰ সমীপত নীলা ৰং দিয়া হৈছে, যিটো প্ৰথম জাৰ্চিতো দেখা গৈছিল । কিন্তু এই জাৰ্চিৰ ডিজাইন প্ৰথম জাৰ্চিতকৈ সামান্য সুকীয়া । এই জাৰ্চিটোৰ বুকু আৰু কঁকালৰ ওচৰত এক অনন্য ডিজাইন আছে, যিটো যথেষ্ট ভাল দেখা যাব ।
ৰাহুল দ্ৰাবিড় আৰু ছাংগাকাৰাই নতুন জাৰ্চি মুকলি কৰে
ৰাজস্থান ৰয়েলছে টীম ইণ্ডিয়াৰ প্ৰাক্তন অধিনায়ক তথা মুখ্য প্ৰশিক্ষক ৰাহুল দ্ৰাবিড়ক ইতিমধ্যে দলৰ মুখ্য প্ৰশিক্ষক হিচাপে নিযুক্তি দিছে । কুমাৰ ছাংগাকাৰাকো দ্ৰাবিড়ৰ সৈতে প্ৰশিক্ষকৰ ভূমিকাত দেখা যাব । তেওঁলোক দুয়োজনে অনুৰাগীসকলৰ সন্মুখত নতুন জাৰ্চিটো মুকলি কৰে ।
সঞ্জু চেমছনক আকৌ এবাৰ ৰাজস্থান ৰয়েলছৰ অধিনায়ক হিচাপে অনুৰাগীয়ে দেখা পাব ৷ দলটোৱে বিগত কেইটামান ছিজনৰ পৰা উন্নত প্ৰদৰ্শন দাঙি ধৰিছে যদিও খিতাপ দখল কৰিব পৰা নাই ৷ চলিত ছিজনত দলটোৱে নতুন ৰং আৰু ডিজাইনৰ সৈতে এই জাৰ্চি পিন্ধি আই পি এল খিতাপ জয় কৰাৰ সুযোগ পাব ।
লগতে পঢ়ক:চেম্পিয়নছ ট্ৰফীৰ পূৰ্বে ভাৰতৰ সন্মুখত আন এক প্ৰত্যাহ্বান !
