স্প’ৰ্টছ ডেস্ক, 22 আগষ্ট: বহু উত্থান-পতনৰ লগতে গুৰুত্বপূৰ্ণ অভিলেখৰ সাক্ষী হৈ ৰোৱা পেৰিছ অলিম্পিক 2024 ৰ পিছত 28 আগষ্টৰ পৰা আৰম্ভ হ’ব পেৰিছ পেৰালিম্পিক 2024 ৷ এই ক্ৰীড়া প্ৰতিযোগিতাত অংশগ্ৰহণ কৰিবলৈ সাজু হৈ উঠিছে তাৰকা এথলীটৰে পূৰ্ণ ভাৰতীয় দলটো ৷ দলটোৱে বিশেষভাৱে সক্ষম খেলুৱৈসকলৰ বাবে বিশ্বৰ সৰ্বশ্ৰেষ্ঠ ক্ৰীড়া প্ৰতিযোগিতাত অংশগ্ৰহণ কৰিবলৈ সাজু হৈছে । প্ৰেমৰ চহৰ পেৰিছৰো আকাশে-বতাহে গুঞ্জৰিত হৈছে পেৰালিম্পিকৰ ধ্বনি ৷
পেৰিছ অলিম্পিক ভাৰতীয় খেলুৱৈসকলৰ বাবে বিশেষ চমকপ্ৰদ নাছিল ৷ কিয়নো ভাৰতৰ এগৰাকী খেলুৱৈও লাভ কৰিবলৈ সক্ষম হোৱা নাছিল স্বৰ্ণপদক ৷ তদুপৰি প্ৰায় ছয়গৰাকী খেলুৱৈয়ে অতি কম ব্যৱধানত পদক লাভৰ পৰা বঞ্চিত হৈছিল আৰু এগৰাকী খেলুৱৈ ফাইনেলত অংশগ্ৰহণৰ বাবে অযোগ্য বিবেচিত হৈছিল ৷ ভাৰতৰ পদকৰ সংখ্যা দুটা অংকত অতিক্ৰম কৰাৰ লক্ষ্য সপোন হিচাপে ৰৈ গৈছিল ৷ কিয়নো দলটোৱে পাঁচটা ব্ৰঞ্জ আৰু এটা ৰূপসহ মাত্ৰ ছয়টা পদক লাভ কৰি ঘৰলৈ উভতি আহিছিল ৷
ইতিমধ্যে পেৰিছ পেৰালিম্পিকৰ বাবে ভাৰতে 32 গৰাকী মহিলাসহ মুঠ 84 জনীয়া দলটোৰ নাম ঘোষণা কৰিছে ৷ দলটোৱে 12 টা ক্ৰীড়া ইভেণ্টত প্ৰতিদ্বন্দ্বিতা আগবঢ়াব ৷ তদুপৰি এইবেলি ইয়াত যোগ দিয়া হৈছে পেৰা-চাইক্লিং, পেৰা-ৰোয়িং আৰু অন্ধ জুডোৰ দৰে খেলসমূহো ৷
পেৰালিম্পিকত ভাৰতৰ আত্মপ্ৰকাশ:
পেৰালিম্পিকত ভাৰতৰ যাত্ৰা 1968 চনৰ গেমছত আৰম্ভ হৈছিল । অৱশ্যে 1976 আৰু 1980 সংস্কৰণত অংশগ্ৰহণৰ পৰা বিৰত আছিল ভাৰত ৷ ভাৰতে 1968 চনত ইজৰাইলৰ তেল আভিভত পেৰালিম্পিকত প্ৰথমবাৰৰ বাবে প্ৰদৰ্শন আগবঢ়াইছিল । ভাৰতীয় দলৰ অংশ হিচাপে মুঠ 10 জন খেলুৱৈক এই ক্ৰীড়া প্ৰতিযোগিতালৈ প্ৰেৰণ কৰা হৈছিল, যাৰ ভিতৰত আছিল আঠজন পুৰুষ আৰু দুগৰাকী মহিলা । অৱশ্যে ভাৰতে পদক অবিহনে স্বদেশলৈ উভতি আহিছিল ৷ কিন্তু বিশ্বৰ সৰ্ববৃহৎ ক্ৰীড়ামঞ্চত ভাৰতৰ পেৰা-এথলীটসকলৰ বাবে আছিল এয়া প্ৰথম বাস্তৱ অভিজ্ঞতা ।
ভাৰতৰ ট্ৰেক ৰেকৰ্ড:
পেৰালিম্পিকৰ দৰে প্ৰতিযোগিতাত অংশগ্ৰহণৰচাৰি বছৰ পিছত জাৰ্মানীত অনুষ্ঠিত হাইডেলবাৰ্গ গেমছত ভাৰতে পেৰালিম্পিকত প্ৰথম পদক লাভ কৰে । পেৰা-সাঁতোৰবিদ মুৰলীকান্ত পেটকাৰে 50 মিটাৰ ফ্ৰী-ষ্টাইল সাঁতোৰ প্ৰতিযোগিতাত 37.331 ছেকেণ্ডত লক্ষ্যত উপনীত হৈ সোণৰ পদক অৰ্জন কৰাৰ লগতে স্থাপন কৰে বিশ্ব অভিলেখ ৷ শেহতীয়াকৈ, কাৰ্তিক আৰিয়ান অভিনীত বলীউডৰ ছবি "চন্দু চেম্পিয়ন" পেটকাৰৰ পেৰালিম্পিক চেম্পিয়ন হোৱাৰ যি যাত্ৰা, তাৰ ওপৰত ভিত্তি কৰি নিৰ্মাণ কৰা হৈছে ।
এইটোৱেই আছিল একমাত্ৰ পদক, যিয়ে তেওঁলোকক 42 খন অংশগ্ৰহণকাৰী দেশৰ পৰা সামগ্ৰিক পদক তালিকাত 24 তম স্থানত উপনীত হোৱাত সহায় কৰিছিল । 1972 চনত ভাৰতে প্ৰথম স্বৰ্ণ জয় কৰাৰ পিছত, 1976 আৰু 1980 গেমছত অংশগ্ৰহণ কৰা নাছিল ৷ পৰৱৰ্তী সময়ত ভাৰতে 1984 চনৰ পেৰালিম্পিক গেমছত অংশগ্ৰহণ কৰে ৷ 1984 চনত যোগিন্দৰ সিং বেদীয়ে তিনিটা পৃথক ইভেণ্টত তিনিটা পদক অৰ্জন কৰি ইতিহাস সৃষ্টি কৰিছিল ।
অৱশ্যে, বেদীৰ বীৰত্বৰ পিছত ভাৰতীয় খেলুৱৈসকলে 2004 চনত এথেন্স পেৰালিম্পিকলৈকে জয় কৰিবলৈ সক্ষম হোৱা নাছিল কোনো পদক ৷ এথেন্স পেৰালিম্পিকত পুৰুষৰ জেভলিন এফ 44/46 ত দেৱেন্দ্ৰ ঝাঝাৰিয়াই স্বৰ্ণ জয় কৰে আৰু ৰজিন্দৰ সিং ৰাহেলুৱে 2004 চনৰ এথেন্স গেমছত ভাৰোত্তোলনৰ 56 কিল’গ্ৰাম শাখাত ব্ৰঞ্জৰ পদক অৰ্জন কৰে ।
2016 চনৰ ৰিঅ’ পেৰালিম্পিকত ভাৰতে লাভ কৰে চাৰিটাকৈ পদক ৷ যাৰ ভিতৰত আছিল প্ৰথম মহিলা পেৰালিম্পিক পদক বিজয়ী দীপা মালিক, যি এফ 53 শ্বটপুট ইভেণ্টত অৰ্জন কৰিছিল ৰূপৰ পদক ।
2020 চনত টকিঅ’ পেৰালিম্পিকত ভাৰতে আগবঢ়াইছিল সৰ্বশ্ৰেষ্ঠ প্ৰদৰ্শন ৷ য’ত ভাৰতীয় খেলুৱৈসকলে লাভ কৰিছিল পাঁচটাকৈ সোণৰ পদক, আঠটা ৰূপৰ পদক আৰু ছয়টা ব্ৰঞ্জৰ পদকৰ সৈতে মুঠ 19 টা পদক ৷
লক্ষণীয়ভাৱে টকিঅ’ পেৰালিম্পিকত ভাৰতে সৰ্ববৃহৎ দল প্ৰেৰণ কৰাও দেখা গৈছিল, য’ত আছিল 54 গৰাকী খেলুৱৈ ৷
বিভিন্ন সংস্কৰণত ভাৰতৰ পদক লাভৰ সংখ্যা হৈছে এনেধৰণৰ:
| ক্ৰমিক নং | সংস্কৰণ | স্বৰ্ণ | ৰূপ | ব্ৰঞ্জ | মুঠ |
| 1 | 1972 হাইডেলবাৰ্গ | 1 | - | - | 1 |
| 2 | 1984 গ্ৰেট বৃটেইন/আমেৰিকা যুক্তৰাজ্য | - | 2 | 2 | 4 |
| 3 | 2004 এথেন্স | 1 | - | 1 | 2 |
| 4 | 2012 লণ্ডন | - | 1 | - | 1 |
| 5 | 2016 ৰিঅ’ ডি জেনেৰিঅ’ | 2 | 1 | 1 | 4 |
| 6 | 2020 টকিঅ’ | 5 | 8 | 6 | 19 |
পেৰালিম্পিকত পদক বিজয়ী ভাৰতীয়সকলৰ সম্পূৰ্ণ তালিকা:
| ক্ৰমিক নং | নাম | পদক | সংস্কৰণ | খেল | ইভেণ্ট |
| 1 | মুৰলীকান্ত পেটকাৰ | স্বৰ্ণ | 1972 হাইডেলবাৰ্গ | সাঁতোৰ | পুৰুষৰ 50 মিটাৰ ফ্ৰী-ষ্টাইল 3 |
| 2 | ভীমৰাও কেশৰকাৰ | ৰূপ | 1984 গ্ৰেট বৃটেইন/আমেৰিকা যুক্তৰাজ্য | এথলেটিকছ | পুৰুষৰ জেভলিন থ্ৰ’ |
| 3 | যোগিন্দৰ সিং বেদী | ৰূপ | 1984 গ্ৰেট বৃটেইন/আমেৰিকা যুক্তৰাজ্য | এথলেটিকছ | পুৰুষৰ শ্বট পুট |
| 4 | যোগিন্দৰ সিং বেদী | ব্ৰঞ্জ | 1984 গ্ৰেট বৃটেইন/আমেৰিকা যুক্তৰাজ্য | এথলেটিকছ | পুৰুষৰ জেভলিন থ্ৰ’ |
| 5 | যোগিন্দৰ সিং বেদী | ব্ৰঞ্জ | 1984 গ্ৰেট বৃটেইন/আমেৰিকা যুক্তৰাজ্য | এথলেটিকছ | পুৰুষৰ ডিচকাচ থ্ৰ’ |
| 6 | দেৱেন্দ্ৰ ঝাঝাৰিয়া | স্বৰ্ণ | 2004 এথেন্স | এথলেটিকছ | পুৰুষৰ জেভলিন থ্ৰ’ |
| 7 | ৰাজিন্দৰ সিং ৰাহেলু | ব্ৰঞ্জ | 2004 এথেন্স | ভাৰোত্তোলন | পুৰুষৰ 56 কিল’গ্ৰাম |
| 8 | গিৰিচা নাগাৰাজেগৌড়া | ৰূপ | 2012 লণ্ডন | পেৰা এথলেটিকছ | পুৰুষৰ হাই জাম্প |
| 9 | মাৰিয়াপ্পান থাংগেভেলু | স্বৰ্ণ | 2016 ৰিঅ’ ডি জেনেৰিঅ’ | পেৰা এথলেটিকছ | পুৰুষৰ হাই জাম্প |
| 10 | দেৱেন্দ্ৰ ঝাঝাৰিয়া | স্বৰ্ণ | 2016 ৰিঅ’ ডি জেনেৰিঅ’ | পেৰা এথলেটিকছ | পুৰুষৰ জেভলিন থ্ৰ’ |
| 11 | দীপা মালিক | ৰূপ | 2016 ৰিঅ’ ডি জেনেৰিঅ’ | পেৰা এথলেটিকছ | মহিলাৰ শ্বটপুট |
| 12 | বৰুণ সিং ভাটি | ব্ৰঞ্জ | 2016 ৰিঅ’ ডি জেনেৰিঅ’ | পেৰা এথলেটিকছ | পুৰুষৰ হাই জাম্প |
| 13 | ভাবিনা পেটেল | ৰূপ | 2020 টকিঅ’ | পেৰা টেবল টেনিছ | মহিলাৰ একক টেবুল টেনিছ শ্ৰেণী 4 |
| 14 | নিশাদ কুমাৰ | ৰূপ | 2020 টকিঅ’ | পেৰা এথলেটিকছ | পুৰুষৰ হাই জাম্প টি 47 |
| 15 | অৱনী লেখাৰা | স্বৰ্ণ | 2020 টকিঅ’ | পেৰা শ্বুটিং | মহিলাৰ 10 মিটাৰ এয়াৰ ৰাইফল শ্বুটিং ষ্টেণ্ডিং এছ এইচ 1 |
| 16 | দেৱেন্দ্ৰ ঝাঝাৰিয়া | ৰূপ | 2020 টকিঅ’ | পেৰা এথলেটিকছ | পুৰুষৰ জেভলিন থ্ৰ’ এফ 46 |
| 17 | সুন্দৰ সিং গুৰ্জাৰ | ব্ৰঞ্জ | 2020 টকিঅ’ | পেৰা এথলেটিকছ | পুৰুষৰ জেভলিন থ্ৰ’ এফ 46 |
| 18 | যোগেশ কাথুনিয়া | ৰূপ | 2020 টকিঅ’ | পেৰা এথলেটিকছ | পুৰুষৰ ডিচকাচ থ্ৰ’ এফ 56 |
| 19 | সুমিত এণ্টিল | স্বৰ্ণ | 2020 টকিঅ’ | পেৰা এথলেটিকছ | পুৰুষৰ জেভলিন থ্ৰ’ এফ 64 |
| 20 | সিংৰাজ আধানা | ব্ৰঞ্জ | 2020 টকিঅ’ | পেৰা শ্বুটিং | পুৰুষৰ 10 মিটাৰ এয়াৰ পিষ্টল শ্বুটিং এছ এইচ 1 |
| 21 | মাৰিয়াপ্পান থাংগেভেলু | ৰূপ | 2020 টকিঅ’ | পেৰা এথলেটিকছ | পুৰুষৰ হাই জাম্প টি 42 |
| 22 | শৰদ কুমাৰ | ব্ৰঞ্জ | 2020 টকিঅ’ | পেৰা এথলেটিকছ | পুৰুষৰ হাই জাম্প টি 42 |
| 23 | প্ৰবীণ কুমাৰ | ৰূপ | 2020 টকিঅ’ | পেৰা এথলেটিকছ | পুৰুষৰ হাই জাম্প টি 64 |
| 24 | অৱনী লেখাৰা | ব্ৰঞ্জ | 2020 টকিঅ’ | পেৰা শ্বুটিং | মহিলাৰ 50 মিটাৰ ৰাইফল 3 অৱস্থান এছ এইচ 1 |
| 25 | হৰবিন্দৰ সিং | ব্ৰঞ্জ | 2020 টকিঅ’ | পেৰা আৰ্চাৰী | পুৰুষৰ ব্যক্তিগত ৰিকাৰ্ভ - মুকলি ধনুৰ্বিদ্যা |
| 26 | মনীষ নাৰৱাল | স্বৰ্ণ | 2020 টকিঅ’ | শ্বুটিং | পুৰুষৰ 50 মিটাৰ পিষ্টল এছ এইচ 1 |
| 27 | সিংৰাজ আধানা | ৰূপ | 2020 টকিঅ’ | শ্বুটিং | পুৰুষৰ 50 মিটাৰ পিষ্টল এছ এইচ 1 |
| 28 | প্ৰমোদ ভগত | স্বৰ্ণ | 2020 টকিঅ’ | পেৰা বেডমিণ্টন | পুৰুষৰ একক বেডমিণ্টন এছ এল 3 |
| 29 | মনোজ সৰকাৰ | ব্ৰঞ্জ | 2020 টকিঅ’ | পেৰা বেডমিণ্টন | পুৰুষৰ একক বেডমিণ্টন এছ এল 3 |
| 30 | সুহাস যথিৰাজ | ৰূপ | 2020 টকিঅ’ | পেৰা বেডমিণ্টন | পুৰুষৰ একক বেডমিণ্টন এছ এল 4 |
| 31 | কৃষ্ণ নগৰ | স্বৰ্ণ | 2020 টকিঅ’ | পেৰা বেডমিণ্টন | পুৰুষৰ একক বেডমিণ্টন এছ এইচ 6 |
লগত পঢ়ক:পেৰালিম্পিকত গ্ৰীষ্মকালীন অলিম্পিকৰ পদক জয়ৰ অভিলেখ ভংগৰ সম্ভাৱনা ভাৰতৰ - PARIS PARALYMPICS 2024
